Gi den Kolosesma

4 Unu di de basi fu srafu, du nanga den srafu fu unu san reti èn san fiti, bika unu sabi taki unu abi wan Masra na hemel tu.

2 Tan begi. No frigiti fu du disi ala ten èn taki Gado tangi. 3 Boiti dati, begi gi wi tu taki Gado kan opo na okasi gi wi fu preiki a wortu, so taki wi kan fruteri sma fu a santa kibritori di abi fu du nanga Krestes. Fu taki en leti, na fu dati ede mi de na strafu-oso. 4 Iya, begi gi wi, so taki mi kan fruteri sma fu a kibritori disi na a fasi fa mi musu du dati.

5 Tan waka nanga koni te unu e kisi fu du nanga den wan di de na dorosei fu a Kresten gemeente. Gebroiki a ten fu unu na wan koni fasi. 6 Taki na wan switi fasi ala ten. Den wortu fu unu musu abi sowtu. Te unu e taki na so wan fasi, dan unu o sabi fa fu piki ibriwan sma.

7 Tikikus, mi lobi brada di e gi yesi na Gado ala ten èn di de wan srafu fu Masra neleki wi, o fruteri unu ala sani di abi fu du nanga mi. 8 Mi e seni en kon na unu. Dan unu o sabi fa sani e go nanga wi èn a kan trowstu unu. 9 Mi e seni en kon, makandra nanga Oneisimus, mi lobi brada di de wan fu unu èn di e gi yesi na Gado ala ten. Den o fruteri unu ala sani di e pasa dya.

10 Aristarkus, di de nanga mi na strafu-oso, e seni taki unu odi. Markus, wan omupikin fu Barnabas, e seni taki unu odi tu. (Na fu en mi ben taigi unu taki efu a kon na unu, un musu gi en wan switikon.) 11 Yesus, di den e kari Yustus, e seni taki unu odi tu. En na wan fu den sma di besnèi. Na den sma disi wawan e wroko makandra nanga mi gi a Kownukondre fu Gado. Den ben trowstu mi trutru. 12 Epafras, wan srafu fu Krestes Yesus di de wan fu unu, e seni taki unu odi. Ala ten a e begi fayafaya gi unu, so taki te fu kaba unu kan de lepi sma di no e tweifri kwetikweti na den sani di Gado wani. 13 Mi e taigi unu taki a e du furu muiti gi unu, gi den wan di de na Laodisea èn gi den wan di de na Hirapolis.

14 Lukas, wi lobi brada di de wan datra, e seni taki unu odi. Deimas e seni taki unu odi tu. 15 Taki den brada na Laodisea odi gi mi, sosrefi wi sisa Nimfa nanga a gemeente di e kon makandra na en oso. 16 Te unu leisi a brifi disi kaba, dan un musu seti sani taki a leisi tu na ini a gemeente fu den Laodiseasma èn taki unu leisi a brifi di a gemeente fu Laodisea ben kisi. 17 Boiti dati, taigi Arkepus: „Yu musu du a wroko di yu ben agri fu du leki bakaman fu Masra èn yu musu klari en tu.”

18 Mi, Paulus, e seni taki unu odi. Na mi srefi skrifi unu. Tan hori na prakseri taki mi de na strafu-oso. Meki a bun-ati fu Gado de nanga unu.