Yohanes skrifi en

10 „Mi e taigi unu: Efu wan sma no e waka na a doro fu go na ini a skapukoi, ma a e kren kon na insei na wan tra presi, dan a sma dati na wan fufurman nanga wan abani. 2 Ma a sma di e waka na a doro go na insei, na a skapuman fu den skapu. 3 A man di e hori wakti na a doro e opo a doro gi en èn den skapu e arki en sten. A e kari en eigi skapu na den nen èn a e tyari den go na dorosei. 4 Te a tyari ala den skapu fu en go na dorosei, a e waka na den fesi èn den skapu e waka na en baka, fu di den sabi en sten. 5 Noiti den o waka baka wan sma di den no sabi. Na presi fu dati den o lowe gi en fu di den no sabi en sten.” 6 Yesus ben ferteri den sma na agersitori disi, ma den no ben e ferstan san a ben wani taigi den.

7 Fu dati ede Yesus taki ete wan leisi: „Bribi mi: Mi na a doro pe den skapu musu psa. 8 Ala sma di ben e kon fu teki mi presi, na fufurman nanga abani. Ma den skapu no arki den. 9 Mi na a doro. Efu wan sma waka psa mi fu go na insei, a o feni ferlusu. A o man go na insei èn na dorosei. A o go na weigron pe a man feni n’nyan. 10 A fufurman no e kon fu soso. A e kon fu fufuru, fu kiri èn fu pori sani. Mi kon fu meki sma kisi libi, iya, den o kisi têgo libi. 11 Mi na a moro bun skapuman. A moro bun skapuman e gi en libi gi den skapu fu en. 12 Ma wan man di den pai fu luku den skapu, no de wan trutru skapuman èn a no en abi den skapu. Te a si wan busdagu e kon, dan a o lon gwe libi den skapu. Dan a busdagu o grabu wan tu fu den skapu èn den trawan o lon go na ala sei. 13 A man o lon gwe fu di a de wan wrokoman èn a no e broko en ede nanga den skapu. 14 Mi na a moro bun skapuman. Mi sabi mi skapu èn mi skapu sabi mi, 15 neleki fa a P’pa sabi mi èn mi sabi a P’pa. Mi o gi mi libi* gi den skapu.

16 Mi abi tra skapu tu, di no de fu a skapukoi disi. Mi musu tyari den kon na insei tu. Den o arki mi sten èn den o tron wán ipi di abi wán skapuman. 17 A P’pa lobi mi fu di mi gi mi libi gi den. Dati meki mi man kisi mi libi baka. 18 Nowan sma puru en na mi anu, ma na fu di mi wani, meki mi gi mi libi. Mi abi a reti fu gi mi libi èn mi abi a reti fu kisi mi libi baka. Na mi P’pa taigi mi fu du disi.”

19 Baka dati den Dyu bigin hartaki nanga makandra baka fu den sani di Yesus taki. 20 Furu fu den ben e taki: „A abi wan ogri yeye na en tapu èn a e law. Fu san ede unu e arki en?” 21 Trawan taki: „Wan sma di abi wan ogri yeye na en tapu no man taki den sani disi. Wan ogri yeye no man meki brenisma si, tòg?”

22 Na a ten dati, wan fesa ben e hori na Yerusalem pe den sma ben memre a ten di den Dyu ben gi a tempel abra na Gado. A ben de a kowru ten fu a yari 23 èn Yesus ben e waka na ini a tempel na ini a Gadri fu Salomo.* 24 Ne den Dyu lontu en èn den taigi en: „O langa yu o meki wi wakti? Efu yu na a Krestes, dan taigi wi dati krin.” 25 Yesus piki den: „Mi taigi unu kba, ma tòg unu no e bribi. Den sani di mi e du na ini a nen fu mi P’pa, e sori krin suma na mi. 26 Ma unu no e bribi, fu di unu a no mi skapu. 27 Mi skapu e arki mi sten. Mi sabi den èn den e waka na mi baka. 28 Mi o gi den têgo libi èn noiti den no o dede. Nowan sma o puru den na mi anu. 29 Den skapu di mi P’pa gi mi prenspari moro ala tra sani. Nowan sma kan puru den na mi P’pa anu. 30 Mi nanga a P’pa na wán.”

31 Ne den Dyu teki ston baka fu trowe na en tapu. 32 Yesus piki den Dyu: „Mi sori unu furu moi sani di a P’pa taigi mi fu du. Fu sortuwan fu den sani disi unu wani ston mi kiri?” 33 Den Dyu piki en: „A no fu di yu du wan moi sani, meki wi wani trowe ston na yu tapu fu kiri yu, ma na fu di yu wiswasi Gado. Yu meki yusrefi tron wan gado, aladi yu na wan libisma.” 34 Yesus piki den: „Na ini a Wet fu unu Gado skrifi: ’Mi taki: „Unu na gado.”’* 35 Libisma no man puru san skrifi na ini Gado Buku. Efu Gado e kari den sma di a krutu ’gado’, 36 dan fa fu mi dan? Mi na a sma di Gado meki kon santa èn na mi a seni kon na grontapu. Dan fa unu kan taigi mi taki mi wiswasi Gado di mi taki dati mi na Gado Manpkin? 37 Efu mi no e du den sani di mi P’pa taigi mi fu du, dan un no musu bribi mi. 38 Ma efu mi e du den, dan bribi den sani di mi e du, awinsi unu no wani bribi mi. Na so unu o sabi èn unu o ferstan krin taki a P’pa de wán nanga mi èn mi de wán nanga a P’pa.” 39 Dati meki den pruberi fu grabu en baka. Ma a gwe, so taki den no ben man kisi en.

40 Ne a abra Yordan-liba èn a go baka na a presi pe Yohanes ben e dopu sma fosi, dan a tan drape. 41 Furu sma ben kon na en èn den taki: „Yohanes no du nowan wondru, ma ala den sani di Yohanes taki fu a man disi tru.” 42 Na so furu sma drape bigin bribi na ini en.