Sakaria
11 „Opo den doro fu yu, Libanon,
so taki faya kan pori den sedrebon fu yu.
2 Bari krei, yaneifer-bon, bika a sedrebon fadon.
Den moi bigi bon kisi pori!
Bari krei, un eik-bon fu Basan,
bika a bun bigi busi kisi pori!
3 Arki fa den skapuman e bari krei,
bika den moi weigron fu den kisi pori.
Arki fa den yongu lew* e bari,
bika a bigi busbusi na sei Yordan-liba kisi pori.
4 Disi na san mi Gado Yehovah taki: ’Sorgu den skapu di sma wani srakti. 5 Den sma di bai den skapu srakti den, ma nowan sma aksi den frantwortu fu san den du. Den sma di e seri den skapu e taki: „Prèise Yehovah, fu di mi o kon gudu.” Den skapuman fu den skapu no abi sar’ati gi den.’
6 Yehovah taki: ’Mi no o abi sar’ati moro gi den sma di e libi na ini a kondre. Mi o meki ala sma pina makandra èn a kownu o pina den tu. Den o pori a kondre fu den èn mi no o ferlusu den.’”
7 Un skapu di sma e pina èn di sma wani srakti, mi bigin sorgu unu, so taki sani kan go bun nanga unu. Dati meki mi teki tu tiki. A wan mi kari Switifasi èn a trawan mi kari Wánfasi. Dan mi go luku den skapu. 8 Mi puru dri skapuman na wroko na ini wán mun, fu di mi no ben abi pasensi nanga den moro. Den srefi no ben lobi mi. 9 Dan mi taki: „Mi no o tan sorgu unu. Den sma di de fu dede, o dede. Den sma di musu kisi pori, o kisi pori. Den sma di tan abra, o nyan makandra.” 10 Dan mi teki mi tiki di nen Switifasi èn mi koti en pispisi. Na so mi broko a ferbontu di mi ben meki nanga mi pipel. 11 Sobun, a ferbontu broko na a dei dati. Den skapu di ben e luku mi, den wan di sma ben e pina, ben ferstan taki na Yehovah ben taki den sani disi.
12 Dan mi taigi den: „Efu unu feni en bun, dan gi mi a moni di mi musu kisi. Ma efu unu no feni en bun, dan unu no abi fu pai mi.” Ne den pai* mi 30 pisi solfru moni.
13 Baka dati Yehovah taigi mi: „Na a waarde disi mi abi gi den? Trowe a moni na a presi pe den e kibri a moni fu a tempel.” Dati meki mi teki den 30 pisi solfru moni, dan mi trowe den na a presi pe den e kibri moni na a oso fu Yehovah.
14 Dan mi koti a tra tiki fu mi di nen Wánfasi pispisi. Na so mi broko a wánfasi fu Yuda nanga Israel.
15 Dan Yehovah taigi mi: „Teki den wrokosani fu wan skapuman di no e du en wroko bun. 16 Mi o meki wan skapuman kon na ini a kondre. A no o sorgu den skapu di de fu dede èn a no o go suku den yongu skapu di lasi. A no o dresi den wan di kisi mankeri èn a no o gi n’nyan na den skapu di man tnapu ete. Na presi fu dati a o nyan den fatuwan èn a o hari den futu* fu den puru.
17 Bigi ogri o miti a skapuman fu mi di no e du en wroko bun èn di gwe libi den skapu!
Wan fet’owru o koti en anu nanga en retsei ai.
En heri anu o kon malengri
èn a no o man si noti moro nanga en retsei ai.”*