Sakaria
12 Wan boskopu fu Gado:
Yehovah, a sma di bradi hemel na tapsei fu grontapu,
di poti a fundament fu grontapu
èn di gi libisma libi,* taki:
„Disi na san Yehovah taki fu Israel:
2 Mi o meki Yerusalem kon de leki wan kan* nanga win di e meki ala pipel na en lontu slingerslinger. Feanti o kon feti nanga Yuda èn nanga Yerusalem. 3 Na a ten dati mi o meki Yerusalem tron wan hebi ston gi ala den pipel. Ala sma di wani opo en o kisi hebi mankeri. Ala den pipel fu grontapu o kon makandra fu feti nanga en. 4 Na a ten dati”, na so Yehovah taki, „mi o meki ala den asi bruya èn den sma di e rèi na den tapu o kon law. Mi o tan luku den sma fu Yuda, ma mi o meki ala den asi fu den pipel kon breni. 5 Den edeman fu Yuda o prakseri: ’Den sma di e tan na Yerusalem e gi mi krakti, bika Yehovah di e tiri den legre na a Gado fu den.’ 6 Na a ten dati mi o meki den edeman fu Yuda de leki wan faya na mindri udu èn leki wan frambo* na mindri den bosu aleisi di sma koti. Den o bron ala den pipel na a ret’anusei èn na a kruktu-anusei fu den. Ma den sma fu Yerusalem o tan na den eigi presi,* iya, den o tan libi na Yerusalem.
7 Ma Yehovah o ferlusu den tenti fu Yuda fosi, so taki den sma fu David nanga den sma di e tan na Yerusalem no o abi moro grani* leki Yuda. 8 Na a ten dati Yehovah o feti gi den sma di e tan na Yerusalem. Na a ten dati a sma di no man tnapu* o kon tranga leki David èn den sma fu David o kon de leki wan tranga gado. Den o de leki na engel fu Yehovah di e sori a pipel pe den musu go. 9 Na a ten dati mi o kiri ala den pipel di wani feti nanga Yerusalem.
10 Mi o meki mi yeye kon na tapu den sma fu David nanga den sma di e tan na Yerusalem. Mi o feni den bun èn den o begi mi. Den o si a sma di den dyuku èn na fu en ede den o bari krei neleki fa sma e bari krei te a wan-enkri manpkin fu den dede. Na fu en ede den o de nanga bigi sari neleki fa sma e sari te a fosi manpkin fu den dede. 11 Na a ten dati bun furu sma o bari krei na ini Yerusalem neleki di sma ben e bari krei na Hadad-Rimon na ini Megido-lagipresi. 12 A heri kondre o bari krei. Ibri famiri o bari krei den w’wan. Den frow fu a famiri fu David o krei makandra èn den man o krei makandra. Den frow fu a famiri fu Natan o krei makandra èn den man o krei makandra. 13 Den frow fu a famiri fu Leifi o krei makandra èn den man o krei makandra. Den frow fu a famiri fu Simei o krei makandra èn den man o krei makandra. 14 Ala den famiri di tan abra o bari krei den w’wan, iya, den frow o krei makandra èn den man o krei makandra.