Yesaya
13 Disi na wan krutuboskopu gi Babilon di Yesaya, a manpkin fu Amos, yere na ini wan fisyun:
2 „Poti wan fraga* na tapu wan stonbergi meki a legre si.
Wai nanga yu anu èn kari den
meki den kon na den portu fu den heihei sma.
3 Mi gi den fetman fu mi* wan wroko fu du.
Mi kari den fu feti gi mi fu di mi ati e bron.
Den e meki bigi èn den e prisiri.
4 Yere a bigi b’bari na den bergi!
A gersi a b’bari fu wan bigi pipel.
Yere a b’bari fu kownukondre
nanga pipel di kon makandra!
Iya, Yehovah di e tiri den legre e tyari wan legre kon na wán fu go feti.
5 Den e kon fu wan kondre di de farawe.
Den e kon fu a moro fara presi na grontapu.*
Yehovah e kon nanga den fetsani fu en
fu strafu èn pori heri grontapu.
6 Un bari krei, bika a dei fu Yehovah de krosbei!
Na Almaktiwan o tyari pori kon na a dei dati.
7 Fu dati ede ala sma o frede
èn ala sma o las’ati.
8 Den sma e bruya srefsrefi.
Den e kisi krampu nanga pen
neleki wan uma di de fu meki wan pkin.
Nanga opo mofo den e luku makandra.
Na den fesi a de fu si taki den e frede srefsrefi.
9 Luku! A dei fu Yehovah e kon èn a ogri trutru.
A de nanga bigi atibron èn en ati faya.
Sma o skreki srefsrefi te den si san a du nanga a kondre.
A o figi ala den sondusma puru na ini a kondre.
10 Den stari fu hemel nanga den starigrupu fu den*
no o skèin leti.
Te a son o opo, a o dungru
èn a mun no o skèin a leti fu en.
11 Mi o strafu den sma na grontapu fu den ogri di den du.
Mi o strafu den ogrisma gi den sondu di den du.
Mi o puru bigifasi gi den heimemre sma
èn mi o meki den ogr’ati tiriman di abi heimemre, kon lagi.
12 Nowan sma o de fu feni na ini a kondre.
Srefi finfini gowtu èn a gowtu fu Ofir o de moro makelek fu feni leki libisma.
13 Fu dati ede mi, Yehovah di e tiri den legre, o meki hemel beifi
èn mi o meki grontapu seki kmoto fu en presi
na a dei fu mi bigi atibron.
14 Neleki wan dia di sma e onti èn neleki wan ipi skapu di no abi wan skapuman fu luku den,
na so ibri sma o drai go na en eigi pipel
èn ibri sma o lowe go na den eigi kondre.
15 Den feanti o dyuku ibri sma di den feni
èn nanga fet’owru den o kiri ibri sma di den kisi.
16 Leti na den fesi, den feanti o kiri den pkin na wan ogr’ati fasi
èn den o teki ala den gudu na ini den oso.
Nanga tranga den feanti o d’don nanga den frow fu den.
17 Mi o meki den Mediasma go feti nanga den.
Den sma dati e si solfru leki noti
èn den no gridi fu gowtu.
18 Nanga den bo den o naki den yongu man kiri.
Den no o sari den beibi srefi.
Den no o abi sar’ati gi nowan pkin.
19 Babilon, a moro moi foto fu ala den kownukondre,
a moi foto di e gi den Kaldeyasma biginen,
o tron neleki Sodom nanga Gomora di Gado ben pori.
20 Noiti moro wan sma o tan na ini Babilon.
Nowan bakapkin fu den o tan drape.
Nowan Arabiri o seti en tenti drape
èn nowan skapuman o tyari en skapu go drape.
21 Na den meti di e tan na den sabana, o tan drape.
Owrukuku o tan na ini den oso.
Den stroisfowru o tan drape
èn den bergikrabita* o dyompodyompo drape.
22 Busmeti o bari na ini den toren fu den.
Sabanadagu o tan na ini den kfalek moi oso.
A ten fu Babilon doro èn a no o teki langa moro fosi a kisi pori.”