Mateyus skrifi en

19 Baka di Yesus kba taki den sani disi, a gwe fu Galilea èn a go na ini a birti fu Yudea, na abrasei fu Yordan-liba. 2 Bun furu sma ben e waka na en baka èn drape a meki den kon betre.

3 Ne den Fariseiman kon na en fu di den ben wani tesi en. Den aksi en: „Wan man abi a reti fu broko trow nanga en frow fu ala sortu sani ede?” 4 A piki den: „Unu no leisi taki a sma di meki den na a bigin, meki wan man nanga wan frow 5 èn taki a ben taki: ’Dati meki wan man o gwe libi en p’pa nanga en m’ma, a o tan nanga en frow* èn den tu sma dati o de wán skin’? 6 Sobun, den no de tu skin moro, ma wán skin. Fu dati ede, san Gado tyari kon na wán nowan sma musu prati.” 7 Dan den aksi Yesus: „Ma fu san ede Moses taki dati wan frow musu kisi wan papira di e sori taki en masra seni en gwe èn taki a broko trow nanga en?” 8 Yesus taigi den: „Moses gi unu pasi fu broko trow nanga un frow fu di unu no abi firi, ma disi no ben de so na a bigin. 9 Mi e taigi unu taki efu wan man broko trow nanga en frow, aladi en frow no huru* èn a man trow nanga wan tra frow, dan a man disi waka gi en frow.”

10 Den disipel taigi en: „Efu dati de so, dan a moro bun fu no trow.” 11 A taigi den: „A no ala sma man du a sani dati. Wan sma man du dati, soso te Gado e gi en na okasi. 12 Son sma no trow, fu di den gebore nanga wan mankeri na den syenpresi. Trawan no trow, fu di sma gi den mankeri na den syenpresi. Ma yu abi tra sma di no trow, fu di den wani du moro gi a Kownukondre fu hemel. Efu wan sma kan tan sondro fu trow, dan meki a du dati.”

13 Baka dati, sma tyari yongu pkin kon na en fu a poti en anu na den tapu èn fu begi gi den. Ma den disipel bari den sma. 14 Ma Yesus taki: „Libi den pkin. No tapu den fu kon na mi, bika den sma di de leki den pkin disi o kisi a Kownukondre fu hemel.” 15 Dan a poti en anu na den tapu èn baka dati a gwe fu drape.

16 Ne wan man kon na en èn a aksi en: „Leriman, sortu bun sani mi musu du fu kisi têgo libi?” 17 A taigi a man: „Fu san ede yu e aksi mi san bun? Wán sma nomo bun. Ma efu yu wani kisi libi, dan du ala ten san den wet e taki.” 18 A man aksi en: „Sortwan fu den wet?” Yesus taigi en: „Yu no musu kiri sma, yu no musu waka gi yu trowpatna, yu no musu fufuru, yu no musu lei gi sma, 19 lespeki yu p’pa nanga yu m’ma èn yu musu lobi tra sma leki fa yu lobi yusrefi.” 20 A yonguman taigi en: „Mi e du ala den sani disi kba. San mi musu du ete?” 21 Yesus taigi en: „Efu yu wani de sondro fowtu, dan go seri den sani di yu abi. Prati a moni gi den pôtisma, dan yu o kisi wan gudu na hemel. Baka dati, tron wan bakaman fu mi.” 22 Di a yonguman yere a sani disi, a gwe nanga bigi sari, bika a ben abi furu gudu. 23 Ne Yesus taigi den disipel fu en: „Unu kan bribi mi: A o muilek gi wan guduman fu go na ini a Kownukondre fu hemel. 24 Mi e taigi unu tu: A moro makelek gi wan kameili fu psa na ini wan n’nai-olo, leki gi wan guduman fu go na ini a Kownukondre fu Gado.”

25 Di den disipel yere disi, den ferwondru srefsrefi. Den taki: „Dan suma o man kisi ferlusu?” 26 Yesus luku den langalanga na ini den ai èn a taigi den: „Gi libisma a sani disi no man, ma gi Gado ala sani man.”

27 Dan Petrus taki: „Wi gwe libi ala sani èn wi kon waka na yu baka. San wi o kisi dan?” 28 Yesus taigi den: „Unu kan bribi a sani disi: Gado o meki ala sani kon nyun te en Manpkin sdon na tapu en kownusturu nanga bigi glori. Dan unu di e waka na mi baka o sdon tu na tapu 12 kownusturu fu krutu den 12 lo fu Israel. 29 Ibri sma di gwe libi en oso, noso en brada, noso en sisa, noso en p’pa, noso en m’ma, noso en pkin, noso en gron fu mi nen ede, o kisi 100 tron so furu leki dati. A sma dati o kisi têgo libi tu leki gudu.

30 Ma furu sma di de den foswan o de den lastiwan èn den lastiwan o de den foswan.