Genesis

1 Na a bigin Gado meki hemel nanga grontapu.

2 Grontapu ben leigi. Nowan sani ben de na en tapu. Dungru ben tapu den bigi watra fu grontapu èn a krakti* fu Gado ben e buweigi abra den watra.

3 Dan Gado taki: „Meki leti kon de.” Ne leti kon de. 4 Baka dati Gado si taki a leti bun. Ne Gado taki o ten a leti musu skèin èn o ten a musu dungru. 5 Ne Gado kari a leti Dei, ma a dungru a kari Neti. Na so neti pasa èn mamanten pasa. Disi ben de a fosi dei.

6 Dan Gado taki: „Meki loktu kon de na mindri den watra èn meki a prati den watra fu makandra.” 7 Ne Gado meki loktu èn a meki watra kon de na ondrosei èn na tapusei fu a loktu. Na so a pasa. 8 Ne Gado kari a loktu Hemel. Na so neti pasa èn mamanten pasa. Disi ben de a di fu tu dei.

9 Dan Gado taki: „Meki den watra na ondro hemel kon makandra na wán presi èn meki drei gron kon de fu si.” We, na so a pasa tu. 10 Gado kari a drei gron disi Grontapu, ma den watra di a ben tyari kon na wán, a kari Se. Ne Gado si taki den bun. 11 Baka dati Gado taki: „Meki grasi nanga ala sortu sani di e gi siri, gro na grontapu. Meki ala sortu froktubon gro tu na grontapu èn meki ibriwan fu den gi froktu di abi siri na ini.” We, na so a pasa tu. 12 Grasi bigin gro na grontapu èn ala sortu sani di e gi siri bigin gro tu, sosrefi bon di e gi froktu. Ala den froktu ben abi den eigi siri na ini. Ne Gado si taki den bun. 13 Na so neti pasa èn mamanten pasa. Disi ben de a di fu dri dei.

14 Baka dati Gado taki: „Meki sani di e gi leti kon de na loktu fu sori san na dei èn san na neti. Den leti disi o de leki marki na loktu. Den o sori san na den difrenti ten fu a yari, san na dei èn san na yari. 15 Den o kon de sani na loktu di e skèin leti kon na grontapu.” We, na so a pasa tu. 16 Dan Gado meki den tu bigi leti. A moro bigiwan ben o skèin na deiten èn a moro pikinwan ben o skèin na neti.* A meki den stari sosrefi. 17 Sobun, Gado poti den na loktu fu skèin leti kon na grontapu. 18 Den ben o skèin leti na deiten èn na neti. Gado du disi fu sori o ten leti musu skèin èn o ten a musu dungru. Ne Gado si taki den bun. 19 Na so neti pasa èn mamanten pasa. Disi ben de a di fu fo dei.

20 Dan Gado taki: „A watra musu kon lai nanga ala sortu meti,* èn na ala sei fu grontapu, meti di e frei, musu frei na loktu.” 21 Baka dati Gado meki den bigi meti di e libi na ini se. A meki ala sortu meti tu di ben kon lai na ini a watra. Boiti dati, a meki ala sortu meti di e frei. Ne Gado si taki den bun. 22 Dan Gado blesi den èn a taki: „Meki pikin èn kon furu, teleki unu kon lai na ini a watra fu se. Den meti di e frei, musu kon lai na grontapu.” 23 Na so neti pasa èn mamanten pasa. Disi ben de a di fu feifi dei.

24 Ne Gado taki: „Meki grontapu kon lai nanga ala sortu meti. Meki a kon lai nanga ala sortu osometi, meti di e kroipi na gron, nanga busimeti.” We, na so a pasa tu. 25 Dan Gado bigin meki ala sortu busimeti, ala sortu osometi, nanga ala sortu meti di e kroipi na gron. Ne Gado si taki den bun.

26 Baka dati Gado taki: „Meki wi meki libisma fu gersi wi èn fu de leki wi. Meki den basi den fisi na ini se, den meti di e frei na loktu, nanga den osometi. Meki den basi ala sani na grontapu nanga ibri meti di e kroipi na gron.” 27 Dan Gado meki libisma leki fa ensrefi de. Soleki fa Gado de, na so a meki libisma. A meki wan man nanga wan uma. 28 Ne Gado blesi den. Dan a taigi den: „Meki pikin èn kon furu, teleki unu kon lai na grontapu èn basi ala sani na grontapu. Basi den fisi na ini se, den meti di e frei na loktu, nanga ibri meti di e kroipi na gron.”

29 Dan Gado taki: „Luku, mi gi unu ala sani di e gro na heri grontapu èn di abi siri na ini. Mi gi unu sosrefi ala den bon di e gi froktu di abi siri na ini. Meki den sani disi de leki nyanyan gi unu. 30 Mi e gi ala den busimeti, ala den meti di e frei na loktu, nanga ala tra meti, iya, den libisani di e waka lontu na grontapu, grun wiwiri fu nyan.” We, na so a pasa tu.

31 Ne Gado si taki ala den sani di a meki, ben de heri bun. Na so neti pasa èn mamanten pasa. Disi ben de a di fu siksi dei.