Danièl

7 Na ini a fosi yari di Kownu Belsasar fu Babilon ben e tiri, Danièl ben kisi fisyun na ini wan dren di a ben e d’don na tapu en bedi. Ne a skrifi ala sani di a si na ini a dren. 2 Danièl taki:

„Na ini den fisyun di mi kisi na neti, mi si fo winti e wai kmoto fu hemel. Den ben e wai so tranga taki a watra fu a bigi se bigin seki. 3 Ne fo bigi meti opo kmoto na ini a se. Ibriwan fu den ben de tra fasi leki a trawan.

4 A fosi meti ben gersi wan lew èn a ben abi frei leki di fu wan aka. Mi tan luku teleki den hari den frei fu en puru. Ne den opo a lew meki a tnapu na tapu tu futu leki wan libisma. Dan a kisi na ati fu wan libisma.

5 Ne mi si wan tra meti, a di fu tu. A ben gersi wan beer. Ne a opo wan fu den futu fu en. Dri bonyo* ben de na ini en mofo.* Disi na san den taigi a beer fu du: ’Opo. Nyan furu meti.’

6 Baka dati mi tan luku. Ne mi si wan tra meti. A ben gersi wan penitigri, ma na tapu en baka a ben abi fo frei leki den frei fu wan fowru. A meti ben abi fo ede èn a ben kisi makti fu tiri.

7 Baka dati mi tan luku san e psa na ini a fisyun di mi kisi na neti. Ne mi si a di fu fo meti. A meti ben e meki sma frede èn a ben e meki den beifi. A ben tranga srefsrefi. A ben abi bigi isri tifi. A ben e swari èn masi ala sani di ben de na en pasi. San ben tan abra, a ben e trapu nanga den futu fu en. A meti disi ben de tra fasi leki ala den tra meti di mi ben si kba. A ben abi tin tutu. 8 Di mi ben e luku den tutu, mi si taki wan tra tutu, wan pkinwan, opo kon na den mindri. Den hari dri fu den fosi tutu puru fu meki presi gi a pkin tutu. Ne mi si taki a tutu disi ben abi ai leki di fu libisma èn wan mofo di ben e meki bigi.*

9 Mi tan luku, dan mi si taki den e poti kownusturu. Ne a Graniwan di de sensi owruten go sdon. En krosi ben weti leki snew èn en ede-w’wiri ben weti leki a moro weti skapu-w’wiri. A kownusturu nanga den wiel fu en ben de fu faya. 10 Wan liba fu faya ben e lon kmoto na en fesi. Dusun tron dusun engel ben e dini en èn tin dusun tron tin dusun ben e tnapu leti na en fesi. Dan a Grankrutu bigin. Ne den opo den buku.

11 Mi tan luku fu di mi ben yere fa a tutu ben e meki bigi.* Mi tan luku teleki den kiri a meti. Den trowe en skin na ini wan bigi faya. Na so a kisi pori. 12 Den tra meti no ben kisi primisi fu tiri moro, ma den ben kisi na okasi fu libi wan ten nanga wan pisi ten.

13 Na ini den fisyun di mi kisi na neti mi si wan sma e kon na tapu den wolku. A ben gersi wan manpkin fu libisma. Ne a kisi primisi fu go na a Graniwan di de sensi owruten. Den tyari en go te na en fesi. 14 A kisi makti fu tiri. A kisi glori èn a kisi wan kownukondre tu, so taki ala den sma fu den difrenti kondre èn ala den sma di e taki difrenti tongo ben kan dini en. A tirimakti fu en o tan fu têgo. Noiti a o kon na wan kba. A kownukondre fu en na wan kownukondre di no o kisi pori.

15 Di mi, Danièl, si den sani disi mi bruya. Den fisyun di mi kisi ben meki mi frede. 16 Mi waka go krosbei fu wan fu den sma di ben e tnapu drape fu di mi ben wani aksi en san den sani disi wani taki. Ne a ferteri mi san den wani taki. A taigi mi:

17 ’Den fo bigi meti di yu si, na fo kownu fu grontapu di o opo kon. 18 Ma na den santawan di de fu a Moro Hei Gado, o kisi a kownukondre. A kownukondre fu den o de fu ala ten, iya, fu têgo.’

19 Mi ben wani sabi moro tu fu a di fu fo meti di ben de tra fasi leki den tra meti. Iya, a meti disi ben e meki sma frede trutru. En tifi ben de fu isri èn den nangra fu en ben de fu kopro. A ben e swari èn masi ala sani di ben de na en pasi èn san ben tan abra, a ben e trapu nanga den futu fu en. 20 Mi ben wani kon sabi moro fu den tin tutu di ben de na tapu en ede èn fu a tra tutu di ben opo kon. Dri tutu ben fadon kmopo fu meki presi gi a tutu disi. A tutu ben abi ai nanga wan mofo di ben e meki bigi.* A ben bigi moro den tra tutu.

21 Ne mi si taki a tutu dati bigin feti nanga den santawan. A ben de fu wini den. 22 Ma di a Graniwan di de sensi owruten doro, a koti krutu èn a gi den santawan fu a Moro Hei Gado leti. A ten ben doro gi den santawan fu kisi a kownukondre.

23 A taki: ’A di fu fo meti na a di fu fo kownukondre di o kon na grontapu. A o de tra fasi leki ala den tra kownukondre èn a o swari heri grontapu. A o trapu grontapu nanga en futu èn a o masi en. 24 Den tin tutu wani taki dati tin kownu o kmoto na ini a kownukondre dati. Ma baka den kownu disi, ete wan kownu o opo kon. A o de tra fasi leki den foswan èn a o poti den dri kownu na en ondro. 25 A o gi a Moro Heiwan bigitaki. Ala yuru a o du ogri nanga den santawan fu a Moro Hei Gado. A o pruberi fu kenki ten nanga wet. A o kisi primisi fu du nanga den santawan san a wani, wán pisi ten, tu pisi ten, nanga wan afu pisi ten.* 26 Ma a Grankrutu ben hori krutu èn den puru a makti fu a kownu èn den kiri en, iya, den puru en na pasi fu ala ten.

27 Ne den teki a kownukondre, a makti nanga a glori fu ala den kownukondre na grontapu, dan den gi en na a pipel di de den santawan fu a Moro Hei Gado. A kownukondre fu den santawan o tan fu têgo. Ala den tiriman o saka densrefi na den ondro èn den o du san den taki.’

28 Disi na a heri tori. Mi, Danièl, tan prakseri den sani disi. Mi ben kon frede so te, taki mi heri fesi kenki kleur. Ma mi hori a tori gi misrefi.”*