Mateyus skrifi en
24 Di Yesus ben e gwe fu a tempel, den disipel fu en kon na en èn den bigin taki nanga en fa a tempel bigi. 2 A piki den: „Unu e si ala den sani disi? Bribi mi: Nowan ston o tan na tapu a trawan, ma den o broko den puru.”
3 Di a ben sdon na tapu Olèif-bergi, den disipel kon na en di nowan tra sma ben de drape. Den taki: „Taigi wi: O ten den sani disi o psa? San o sori taki yu kon* èn taki a kba fu a grontapu* disi de krosbei?”
4 Yesus piki den: „Luku bun taki nowan sma no kori unu, 5 bika furu sma o gebroiki mi nen èn den o taki: ’Mi na a Krestes’, èn den o kori furu sma. 6 Unu o yere taki feti e feti èn unu o yere nyunsu taki feti de. Ma no meki den sani disi skreki unu, bika den sani disi musu psa, ma a kba no doro ete.
7 Bika a wan pipel o go feti nanga a tra pipel èn a wan kownukondre o go feti nanga a tra kownukondre. Na difrenti presi angriten nanga gronseki o de. 8 Ala den sani disi na a bigin fu wan ten fu banawtu di de leki a hebi pen fu wan uma di de fu meki en pkin.
9 Na a ten dati sma o du ogri nanga unu èn den o kiri unu. Na ini ala kondre sma o teige unu fu di unu na mi bakaman. 10 Furu sma o lasi bribi na ini Gado tu. Den o konkru makandra èn den o teige makandra. 11 Furu falsi profeiti o opo kon èn den o kori furu sma. 12 Fu di moro nanga moro sma o du ogri, meki furu sma no o sori lobi moro. 13 Ma a sma di hordoro* te na a kba o kisi ferlusu. 14 A bun nyunsu disi fu a Kownukondre o preiki na heri grontapu, so taki sma fu ala kondre kan yere dati èn dan a kba o kon.
15 Fu dati ede, te unu e si a sani di no krin èn di e tyari pori kon,* a wan di a profeiti Danièl ben taki fu en, e tnapu na wan santa presi, (meki a sma di e leisi disi du muiti fu ferstan san a profeiti taki dya), 16 dan den sma di de na Yudea musu bigin lowe go na den bergi. 17 A man di de na tapu a dak fu en oso no musu saka kon na gron fu teki sani na ini en oso. 18 A man di de na ini en gron no musu drai go na oso baka fu teki en dyakti. 19 A ten dati o hebi srefsrefi gi den uma di de nanga bere èn gi den wan di abi pkin di de na bobi ete! 20 Tan begi taki unu no abi fu lowe na ini a kowru ten fu a yari noso na wan Sabat-dei, 21 bika wan bigi banawtu* o de. Noiti ete so wan ten ben de sensi a bigin fu grontapu teleki now èn noiti moro so wan ten o kon baka. 22 Fu taki en leti, efu Gado no syatu a ten dati, dan nowan sma o kisi ferlusu. Ma Gado o syatu a ten gi den sma di a kari.
23 Efu wan sma e taigi unu: ’Luku! Krestes de dyaso’, noso ’A de drape!’, dan unu no musu bribi en. 24 Bika falsi Krestes nanga falsi profeiti o opo kon. Den o du wondru nanga tra bigi sani fu kori srefi den sma di Gado kari. 25 Ma mi e warskow unu na fesi. 26 Fu dati ede, efu sma e taigi unu: ’Luku! A de na ini a sabana’, dan un no musu go. Efu den e taki: ’Luku! A de na wan kibripresi’, dan unu no musu bribi den. 27 Bika neleki fa bliksem e koti na owstusei èn a e skèin go te na west-sei, na so a o de te a Manpkin fu libisma kon.* 28 Pe wan dedeskin de, na drape den aka o kon makandra.
29 Leti baka a banawtu fu a ten dati, a son o kon dungru, a mun no o gi leti, den stari o fadon kmoto fu hemel èn den sani na hemel o seki. 30 Dan a marki di e sori taki a Manpkin fu libisma e kon o de fu si na hemel. Ala den lo na grontapu o sari èn den o si a Manpkin fu libisma e kon na tapu den wolku fu hemel nanga krakti èn nanga bigi glori. 31 Nanga a tranga b’bari fu trompet a o seni den engel fu en go fu tyari den sma kon na wán di Gado kari kmoto fu noordsei, zuidsei, owstusei nanga west-sei, iya, fu a wan sei fu hemel te na a tra sei.
32 Luku a figabon èn leri a sani disi fu en: Te unu e si taki wan nyun taki e bigin gro na a bon èn a e bigin sproiti, dan unu sabi taki a waran ten fu a yari e doro. 33 Na so a de tu taki te unu e si ala den sani disi, dan un musu sabi taki a Manpkin fu libisma de krosbei èn taki a e tnapu leti na a mofodoro. 34 Unu kan bribi mi taki den sma fu a ten disi o de na libi ete te ala den sani disi o psa. 35 Hemel nanga grontapu o psa gwe, ma den sani di mi taki o tan fu ala ten.
36 Nowan sma sabi a dei nanga a yuru dati. Iya, srefi den engel fu hemel nanga a Manpkin no sabi, ma soso en P’pa sabi. 37 Bika neleki fa sani ben de na ini a ten fu Noa, na so a o de te a Manpkin fu libisma kon.* 38 Na ini a ten dati fosi a Frudu, sma ben e nyan, den ben e dringi, man nanga uma ben e trow, teleki a dei doro di Noa go na ini na ark. 39 Ma den no ben poti prakseri na san ben e psa, teleki a Frudu kon èn a kiri den alamala. Na so a o de te a Manpkin fu libisma kon. 40 Na a ten dati tu man o wroko a gron. Gado o teki a wan tyari gwe, ma a o libi a trawan na baka. 41 Tu uma o wroko na a srefi anumiri. Gado o teki a wan tyari gwe, ma a o libi a trawan na baka. 42 Fu dati ede, tan na ai, bika unu no sabi sortu dei un Masra o kon.
43 Ma wán sani un musu sabi, taki efu a masra fu na oso ben sabi sortu yuru a fufurman ben o kon, dan a ben o tan na ai èn a no ben o meki sma broko kon na ini en oso. 44 Dati meki un musu de srekasreka tu, bika a Manpkin fu libisma o kon na wan yuru di unu no ben prakseri.
45 Suma na a koni srafu di yu kan fertrow èn di en masra poti fu luku den futuboi fu en, so taki a kan gi den n’nyan na a yoisti ten? 46 A srafu o de koloku te a masra fu en doro èn a e si taki a e du a wroko fu en! 47 Mi e taigi unu: A o poti a srafu fu luku ala den sani di a abi.
48 Ma efu a srafu ogri èn a e prakseri: ’Mi masra no o kon ete’, 49 èn a e bigin fon den tra srafu èn a e nyan èn dringi nanga sopiman, 50 dan a masra fu a srafu dati o kon na wan dei di a no e ferwakti èn na wan yuru di a no sabi. 51 A masra o gi en wan bun hebi strafu èn a o trowe en pe den hoigriman de. Drape a o krei èn a o kaw tifi.*