Yeremia
10 Un Israelsma, arki a boskopu fu Yehovah. 2 Disi na san Yehovah taki:
„Un no musu du den sani di den tra pipel e du.
No frede den sani di unu e si na hemel,
soso fu di den tra pipel e frede den.
3 Bika den sani di den tra pipel gwenti du na fu soso.
Den e koti wan bon na busi,
dan den e teki wan wrokosani* fu meki wan popki fu anbegi en.
4 Den e meki a popki kon moi nanga solfru èn nanga gowtu.
Nanga amra den e spikri en fasi, so taki a no fadon.
5 Den popki disi de leki den popki di sma e poti na den komkomro-gron fu skreki fowru.
Den no man taki èn den no man waka.
Na sma abi fu tyari den go poti na wan presi.
No frede den, bika den no man du nowan ogri nanga unu èn den no man du nowan bun gi unu.”
6 Nowan sma de leki yu.
Yu bigi srefsrefi. Yu di nen Yehovah, yu abi furu makti.
7 Suma no o lespeki yu di de Kownu fu den pipel?
Na yu sma musu frede,
bika nowan koniman èn nowan kownu fu den pipel de leki yu.
8 Nowan fu den abi ferstan. Den alamala don.
Na wan don sani* fu denki taki yu man leri wan sani fu wan popki di meki fu na udu fu wan bon.
9 Fu Tarsis den tyari solfru di den solfrusmeti naki kon plata
èn fu Ufas den tyari gowtu di den gowtusmeti e gebroiki fu tapu udu.
Den e meki krosi fu blaw t’tei nanga paars skapu-w’wiri fu weri gi den gado fu den.
Na sma di sabi du den wroko bun meki ala den gado disi.
10 Ma Yehovah na Gado trutru.
En na a libilibi Gado èn Kownu fu ala ten.
Grontapu o seki te en ati bron.
Nowan pipel o man tan tnapu te a o krutu den.
11* Disi na san un musu taigi den pipel:
„Den gado di no meki hemel nanga grontapu o kisi pori.
Nowan fu den o de moro na grontapu. A o figi den puru na ondro hemel.
12 En na a Mekiman di gebroiki en krakti fu meki grontapu.
En na a sma di gebroiki en koni fu seti grontapu steifi na en presi.
En na a sma di gebroiki en koni* fu bradi hemel leki wan krosi.
13 Te a opo en sten
a watra na hemel e rigeri.
A e meki wolku* opo fu den moro fara presi fu grontapu.
A e meki bliksem koti na hemel te alen e fadon*
èn a e meki winti wai kmoto na den maksin fu en.
14 Ala sma e du dondon sani èn den e du leki den no abi ferstan.
15 Den na soso sani. Sma e spotu den.
Te Gado o strafu den, noti fu den o tan abra.
16 A Gado fu Yakob no de leki den sani disi,
bika en na a Mekiman fu ala sani
èn Israel na a gudu fu en.
Yehovah di e tiri den legre na en nen.
18 bika Yehovah taki:
„Luku, now mi o trowe* den sma puru na ini a kondre.
Now mi o meki den pina.”
19 A kba gi mi, bika mi kisi mankeri!
A soro fu mi no man dresi.
Mi taki: „Na mi kisi mankeri èn na mi o tyari en.
20 Mi tenti broko èn den tenti-t’tei koti.
Den manpkin fu mi gwe libi mi èn den no de moro.
Nowan sma de moro fu bradi mi tenti noso fu seti den tentikrosi.
21 Den skapuman du leki den no abi ferstan.
Den no suku Yehovah.
Dati meki den du don sani
èn ala den skapu fu den panya na ala sei.”
22 Arki! Wan boskopu! A e kon!
Wan bigi b’bari e kon fu a kondre fu noordsei.
Den feanti e kon fu meki den foto fu Yuda tron wan brokopresi èn wan tanpresi gi sabanadagu.
23 Yehovah, mi sabi heri bun taki a no de na wan libisma fu taki sortu pasi a o teki.
A no de na wan libisma di e waka fu taki srefi pe a o poti en futu.
24 Yehovah, gi mi pir’ai na wan fasi di yu feni bun.
No du dati nanga atibron, noso noti fu mi o tan abra.
25 Puru atibron tapu den pipel di no e poti prakseri na yu
èn tapu den lo di no e gi yu nen grani,
bika den kiri den sma fu Yakob.
Bijna den kiri den alamala
èn den meki a kondre fu den tron wan brokopresi.