A fosi brifi gi den Tesalonikasma

3 Sobun, di wi no ben man wakti moro fu yere wan sani fu unu, wi besroiti fu tan dyaso na Ateine 2 èn fu seni Timoteyus kon na unu. En na wi brada èn wan dinari fu Gado* di e preiki a bun nyunsu fu Krestes. A kon fu gi unu dek’ati èn fu trowstu unu fu meki un bribi kon tranga, 3 so taki den tesi disi di e miti unu no o meki nowan fu unu degedege, bika unu srefi sabi taki wi no man wai pasi gi den sani disi. 4 Di wi ben de nanga unu, wi ben taigi unu na fesi kba taki wi ben o nyan pina èn na dati psa tu, soleki fa unu sabi. 5 Dati meki di mi no ben man wakti moro, mi seni Timoteyus kon na unu fu sabi fa a de nanga a bribi fu unu. Bika mi ben frede taki kande Didibri feni wan fasi fu tesi unu, san ben kan meki taki a tranga wroko fu wi de fu soso.

6 Ma now Timoteyus doro na wi, baka di a kmoto na unu. A ferteri wi a bun nyunsu taki a bribi nanga a lobi fu unu tranga ete. A ferteri wi tu taki teleki now unu e prisiri te unu e prakseri wi èn taki unu e angri fu si wi, neleki fa wi e angri fu si unu. 7 Na fu dati ede, brada nanga sisa, di wi yere fa a e go nanga unu èn di wi yere fu a bribi di unu e sori, dan dati trowstu wi na ini ala wi nowtu nanga wi banawtu. 8 Wi e firi bun baka,* fu di unu e tnapu kánkan leki bakaman fu Masra. 9 Wi e taki Gado bigi tangi taki wi abi unu èn taki unu e gi wi furu prisiri. 10 Dei nanga neti wi e begi Gado fayafaya fu kan miti unu,* so taki wi kan yepi unu nanga san unu abi fanowdu fu kan abi wan tranga bribi.

11 Wi e begi Gado wi P’pa nanga wi Masra Yesus fu opo a pasi gi wi fu kon na unu. 12 Boiti dati, wi e howpu taki Masra yepi unu fu meki un lobi gro, iya, fu meki unu sori moro lobi gi makandra èn gi ala tra sma, neleki fa wi e sori lobi gi unu. 13 Na a fasi disi a o meki unu* kisi krakti. A o meki unu de santa èn sondro fowtu na fesi Gado wi P’pa, te wi Masra Yesus kon nanga ala den santawan fu en.