Yesaya
46 Bel boigi èn Neibo beni go na gron.*
Sma lai den popki fu den na tapu meti.
Den de leki hebi lai gi den meti di kon weri fu tyari den.
2 Den boigi èn den beni go na gron makandra.
Den no man kibri den lai*
èn sma o tyari den gwe leki srafu tu.
3 „Arki mi, un sma fu Yakob nanga ala den Israelsma di tan abra.
Sensi un tron wan pipel mi yepi unu èn mi sorgu unu leki wan m’ma.
4 Awinsi unu kon owru, mi e tan a srefi ala ten.
Awinsi unu ede-w’wiri kon weti, mi o tan horbaka gi unu.
Iya, mi o tyari unu, mi o horbaka gi unu èn mi o ferlusu unu soleki fa mi ben du kba.
5 Nanga suma unu wani teki mi gersi? Unu denki taki wan sma de a srefi leki mi?
Unu man poti wan sma na mi sei di gersi mi?
6 Yu abi sma di e puru wan lo gowtu na ini den monisaka
èn den e wegi wan lo solfru.
Den e tyari en gi wan smeti fu a meki wan gado gi den.
Dan den e saka kindi fu anbegi a gado disi.*
7 Den e tyari en na tapu den skowru leki wan lai,
dan den e go poti en na en presi èn na drape a e tan tnapu.
A no e kmoto na en presi.
Awinsi den bari kari en, a no e piki.
Awinsi den de na nowtu, a no man ferlusu den.
8 Hori disi na prakseri èn teki dek’ati.
Meki a sani disi naki un ati, un sondari.
Mi na Gado èn nowan sma de leki mi.
10 Mi na a sma di e ferteri sensi a bigin san o psa te fu kba.
Na mi e ferteri langa ten na fesi san o psa na ini a ten di e kon.
Mi na a sma di e taki: ’Sani musu psa soleki fa mi besroiti.*
Mi o du ala san mi wani.’
11 Mi na a sma di e kari wan aka kon fu a presi pe son e opo.*
Iya, mi o kari wan man fu wan fara kondre kon fu du san mi besroiti.*
Na mi taki a sani disi èn na mi o meki a psa trutru.
Mi teki mi besroiti kba èn na dati mi o du tu.
Mi o tyari ferlusu kon na ini Sion èn mi o gi Israel a glori fu mi.”