A di fu tu brifi gi den Korentesma
8 Brada nanga sisa, now wi wani fu unu sabi taki Gado sori den gemeente fu Masedonia bun-ati. 2 Den ben e pina fu di hebi tesi ben e miti den. Ma aladi den ben pôti srefsrefi, tòg den ben de nanga bun furu prisiri. Den sori taki den gudu fu di den ben lobi fu gi sani. 3 Bika den ben gi san den ben man gi. Ja, mi kan taki dati den gi moro leki san den ben man gi. 4 Densrefi tan begi wi efu den ben kan kisi a grani fu gi sani èn fu yepi den santawan. 5 Den du moro srefi leki san wi ben ferwakti. Den dini Masra nanga den heri ati èn den yepi wi soleki fa Gado wani. 6 Dati meki wi gi Titus a dek’ati fu klari a wroko di a bigin du na un mindri. Sobun, meki a tyari ala den sani kon na wán di unu gi nanga un heri ati. 7 Sani e waka bun nanga unu trutru. Un bribi tranga, unu sabi heri bun fa fu preiki a wortu fu Gado, unu sabi furu, unu de fayafaya èn unu e sori a srefi lobi di wi abi gi unu. Dati meki wi howpu taki unu de klarklari tu fu gi sani nanga un heri ati.
8 Te mi e taki den sani disi, dan a no wan wet mi e poti gi unu, ma mi wani fu unu sabi taki den trawan de fayafaya fu yepi èn mi wani si efu unu abi trutru lobi. 9 Bika unu sabi fa wi Masra Yesus Krestes sori unu bun-ati. Aladi a ben gudu, tòg a kon pôti so taki unu kan kon gudu.
10 Mi o taigi unu fa mi e denki fu a tori. A o bun gi unu te unu klari a wroko disi. Wan yari psa unu bigin nanga a wroko fu piki moni èn unu sori taki unu wani du en trutru. 11 We dan, un musu klari a wroko nanga a srefi faya di unu ben abi na a bigin. Un musu gi san unu man gi, dan san unu o gi o sori taki unu wani yepi trawan trutru. 12 Te wan sma de klarklari fu gi, dan dati bun spesrutu te a gi san a man gi. A no musu suku fu gi san a no man gi. 13 Bika mi no wani taki trawan abi en bun, dan unu e pina. 14 Now di unu abi moro leki san un abi fanowdu, un kan puru den na ini den nowtu. Dan bakaten, te den abi moro leki san den abi fanowdu, den kan puru unu na nowtu. Na so unu kan tapu den nowtu fu makandra. 15 A de soleki fa Gado Buku taki: „A sma di ben abi furu, no ben abi tumsi furu èn a sma di ben mankeri sani, no ben mankeri furu.”
16 Wi e taki Gado tangi taki Titus e broko en ede nanga unu neleki fa wi e du dati. 17 Dati meki a du san wi gi en dek’ati fu du. Ma a no kon na unu soso fu di na wi seni en. Ensrefi ben e angri fu kon na unu. 18 Nanga en wi e seni a brada di ala den gemeente e prèise fu a fasi fa a e preiki a bun nyunsu. 19 Boiti dati, den gemeente ben besroiti fu meki a go makandra nanga wi, so taki a kan tyari den sani di unu gi nanga un heri ati èn prati den. Na so Masra o kisi glori èn na so wi kan sori taki wi de klarklari fu yepi trawan. 20 Na a fasi disi wi no e gi sma okasi fu krutu wi te wi e prati den sani di unu gi nanga un heri ati. 21 Bika te wi „e seti sani, wi e du dati nanga wan krin ati na fesi Yehovah* èn na fesi libisma”.
22 Boiti dati, wi e seni wan tra brada nanga den. Wi sabi en leki wan sma di de fayafaya na ini ala san a e du. Ma now a o abi moro faya, fu di a e fertrow unu trutru. 23 Ma efu wan sma no e fertrow Titus, dan unu kan taigi en taki a e wroko nanga mi fu yepi unu. Efu wan sma no e fertrow den brada fu wi, dan unu kan taigi en taki den na apostel fu den gemeente èn den e gi Krestes glori. 24 Fu dati ede, sori den taki unu lobi den èn taki a no fu soso wi prèise unu na ini den gemeente.