A fosi brifi gi den Korentesma

9 Mi no mag du san mi wani? Mi a no wan apostel? Mi no si wi Masra Yesus? Unu na a bewijs fu a wroko di mi du gi Masra, a no so? 2 Awinsi mi no de wan apostel gi tra sma, tòg mi de wan apostel gi unu, bika unu de leki wan stampu di e sori taki mi na wan apostel fu Masra.

3 Disi na san mi wani taigi den sma di e krutu mi: 4 Wi no abi a reti* fu nyan èn fu dringi? 5 Wi no abi a reti fu meki wi frow di de na bribi* go nanga wi? A no dati den tra apostel, den brada fu Masra nanga Seifas* e du? 6 Noso a de so taki na mi nanga Barnabas w’wan no abi a reti fu libi a wroko di wi e du fu sorgu wisrefi? 7 Sortu srudati e pai en eigi kostu? Suma e prani droifibon na ini en gron, dan a no e nyan den froktu fu den? Noso suma e kweki meti, dan a no e dringi pkinso fu a merki fu den meti?

8 Den sani di mi e taki no e kon fu libisma nomo, ma a Wet e taki den sani disi tu tòg? 9 Bika na ini a Wet fu Moses skrifi: „Yu no musu tai a mofo fu wan mankaw te a e masi aleisi.” Na broko Gado e broko en ede so nanga mankaw? 10 Noso na fu wi ede a e taki dati? Iya, na fu a bun fu wi meki a sani dati ben skrifi, bika a sma di e drai a doti èn a sma di e masi aleisi musu du dati nanga a howpu taki den o kisi aleisi.

11 Efu wi sai a wortu fu Gado na ini un ati, dan a fowtu taki unu e gi wi san wi abi fanowdu? 12 Efu tra sma abi a reti fu aksi unu den sani dati, dan wi no abi moro reti* fu du dati? Tòg wi no gebroiki a reti disi, ma wi e hordoro awinsi san e psa, fu di wi no wani du nowan sani fu tapu sma fu yere a bun nyunsu fu Krestes. 13 Unu no sabi taki den man di e du santa wroko e nyan den sani fu a tempel èn taki den wan di e wroko na a altari e nyan fu den sani fu na altari? 14 Na so Masra ben taki tu, dati den sma di e preiki a bun nyunsu musu libi fu den sani di den e kisi, fu di den e preiki a bun nyunsu.

15 Ma mi no gebroiki nowan fu den seti disi. Mi no skrifi den sani disi fu meki unu go du sani gi mi. A moro betre mi dede. Nowan sma o tapu mi fu meki bigi! 16 We, efu mi e preiki a bun nyunsu, dan dati a no wan reide gi mi fu meki bigi. Na wan sani di mi musu fu du. Iya, a no o waka bun gi mi efu mi no preiki a bun nyunsu! 17 Efu mi e du dati fu di misrefi wani, dan mi o kisi pai. Ma srefi efu mi e du en aladi mi no wani, tòg a frantwortu de na mi tapu fu du a wroko. 18 San na a pai di mi o kisi dan? A pai di mi o kisi, na taki mi e preiki a bun nyunsu sondro fu aksi wan sani baka. Na so mi leki wan preikiman fu a bun nyunsu no o gebroiki a reti di mi abi na wan fasi di no fiti.

19 Aladi mi no abi nowan plekti na nowan sma, tòg mi meki misrefi tron a srafu fu ala sma, so taki mi kan yepi so furu sma leki a kan fu tron bakaman fu Krestes. 20 Dati meki gi den Dyu, mi kon de leki wan Dyu, so taki mi kan yepi den Dyu. Gi den sma di e hori a Wet, mi kon de leki wan sma di e hori a Wet, aladi misrefi no abi fu hori a Wet. Na so mi kan yepi den sma di e hori a Wet. 21 Gi den sma di no abi Wet, mi kon de leki wan sma di no abi Wet, aladi mi no e libi sondro a Wet fu Gado èn mi e gi yesi na a Wet fu Krestes. Na so mi kan yepi den sma di no abi Wet. 22 Gi den swakiwan, mi kon de leki wan sma di swaki, so taki mi kan yepi den swakiwan. Mi tron ala sani gi ala sortu sma, iya, mi du ala san de fanowdu fu ferlusu sma, awinsi na wan tu nomo. 23 Mi e du ala sani fu a bun nyunsu ede, so taki mi kan prati en nanga trawan.

24 Unu no sabi taki ala den sma di e lon wan streilon e lon, ma na wán nomo e wini? Lon na so wan fasi taki unu kan wini. 25 Boiti dati, ibri sma di e lon wan streilon* e dwengi ensrefi na ini ala sani. Den e du dati fu kisi wan kroon di e pori, ma wi e du en fu kisi wan kroon di no e pori. 26 Dati meki mi no e lon bruyabruya. Mi e naki kofu na so wan fasi taki mi no e naki winti. 27 Ma mi e naki mi skin nanga kofu* èn mi e basi en neleki a de wan srafu, so taki a no o de so taki Gado no feni mi bun moro, baka te mi preiki gi tra sma.