Lukas skrifi en

11 Wan leisi Yesus ben de na wan presi e begi. Di a kba begi, wan fu den disipel fu en taigi en: „Masra, leri wi fa wi musu begi, leki fa Yohanes leri den disipel fu en fu begi.”

2 Dan a taigi den: „Te unu e begi, un musu taki: ’Papa, meki yu nen kon santa.* Meki yu Kownukondre kon. 3 Gi wi a brede di wi abi fanowdu gi a dei disi. 4 Gi wi pardon fu den sondu fu wi, bika wi srefi e gi ala sma pardon di sondu* teige wi. Yepi wi fu no sondu te tesi miti wi.’”

5 A taigi den tu: „Kow taki dati wan fu unu abi wan mati èn yu go na en na mindrineti, dan yu taigi en: ’Mi mati, gi mi dri brede. 6 Zonet wan mati fu mi kon na mi. A kmoto na wan fara presi èn mi no abi noti fu gi en.’ 7 Dan a sma di de na insei piki yu: ’Fu san ede yu kon dyaso na mindrineti. A doro sroto kba èn mi nanga den yongu pkin fu mi de na bedi. Mi no man opo fu gi yu wan sani.’ 8 Mi e taigi unu: Srefi efu a sma no wani opo fu gi yu wan sani fu di yu na en mati, tòg a o gi yu san yu abi fanowdu fu di yu e tan aksi en. 9 Dati meki mi e taigi unu: Tan aksi, dan unu o kisi. Tan suku, dan unu o feni. Tan naki tapu a doro, dan a doro o opo gi unu. 10 Bika a sma di e aksi, o kisi. A sma di e suku, o feni. A sma di e naki tapu a doro, a doro o opo gi en. 11 Sortu p’pa o gi en boi wan sneki efu a boi aksi en wan fisi? 12 Èn efu a aksi en wan eksi, dan a no o gi en wan schorpioen* tòg? 13 Fu dati ede, efu unu leki sondusma,* man gi un pkin bun sani, dan unu kan de seiker taki a P’pa di de na hemel o gi santa yeye na den sma di e aksi en!”

14 Wan tra leisi, Yesus yagi wan ogri yeye puru na wan man tapu di ben meki a kon babaw. Baka di na ogri yeye kmoto na a man tapu, a ben man taki. Ala den sma ben ferwondru. 15 Ma wan tu fu den taki: „Na Beyelsebub,* a basi fu den ogri yeye, e meki taki a man disi man puru ogri yeye na sma tapu.” 16 Ma fu di tra sma ben wani tesi Yesus, meki den aksi en fu du wan wondru di e sori taki na Gado seni en kon. 17 Fu di a ben sabi san den ben e prakseri, meki a taigi den: „Ibri kownukondre di prati o fadon èn wánfasi no de ini wan osofamiri di prati. 18 Na so a de tu nanga Satan: Efu Satan e feti nanga ensrefi, dan fa a kownukondre fu en o man tan? Tòg unu e taki dati na Beyelsebub e yepi mi fu puru ogri yeye na sma tapu. 19 Efu na Beyelsebub e yepi mi fu puru ogri yeye na sma tapu, dan suma e yepi den bakaman fu unu fu puru ogri yeye na sma tapu? Dati meki den bakaman fu unu o krutu unu. 20 Ma efu na Gado* e yepi mi fu puru ogri yeye na sma tapu, dan a Kownukondre fu Gado kon sondro taki unu sabi. 21 Te wan tranga man di abi furu fetsani e hori wakti na en oso, dan nowan sma man fufuru den sani fu en. 22 Ma te wan sma di tranga moro en kon feti nanga en èn a wini en, dan a sma dati o teki ala den fetsani fu en di a ben gebroiki fu kibri den gudu fu en. Dan a o prati den sani di a fufuru fu a tranga man. 23 A sma di no de na mi sei, de teige mi. A sma di no e wroko makandra nanga mi fu tyari sma kon na wán, e tyari prati kon.

24 Te wan ogri yeye kmoto na wan sma tapu, dan a e waka lontu na ini den sabana fu suku wan presi fu rostu. Te a no feni wan presi, dan a e taki: ’Mi o drai go baka na a oso pe mi ben e tan.’ 25 Te a doro drape, dan a e si taki na oso sibi krin èn a kon moi. 26 Dan na ogri yeye e gwe èn a e tyari ete seibi yeye kon di ogri moro en. Te den go na insei, den e tan libi drape. Now a fasi fa a sma kon de, ogri moro leki fa a ben de fosi.”

27 Di Yesus ben e taki den sani disi, wan frow opo en sten na mindri den sma èn a taki: „Na uma di tyari yu na ini en bere èn di gi yu bobi, na wan koloku uma!” 28 Ma Yesus taki: „No, na den sma di e yere a wortu fu Gado èn di e du san a wortu e taki, de koloku!”

29 Di moro nanga moro sma ben e kon makandra, a bigin taki: „Den sma fu a ten disi ogri. Den wani si wan marki, ma a wan-enkri marki di mi o sori den na a wan fu Yona. 30 Bika neleki fa Yona ben tron wan marki gi den sma fu Ninefei, na so a Manpkin fu libisma o tron wan marki gi den sma fu a ten disi. 31 Na umakownu fu zuidsei o opo baka na tapu a Krutudei, makandra nanga den sma fu a ten disi èn a o krutu den. A kmoto te na den moro fara presi fu grontapu fu yere a koni fu Salomo. Ma wan sma de dya di bigi moro Salomo. 32 Den sma fu Ninefei o opo baka na a Krutudei makandra nanga den sma fu a ten disi èn den o krutu den sma fu a ten disi. Bika di den yere san Yona ben preiki, den ben abi berow. Ma wan sma di bigi moro Yona de dya. 33 Te wan sma leti wan lampu, a no e poti en na wan kibripresi noso na ondro wan baskita.* Ma a e poti en na tapu wan hei presi, so taki den sma di e kon na insei kan si a leti. 34 A lampu fu a skin na yu ai. Efu yu ai e luku wán sani nomo,* dan yu heri skin o brenki. Ma efu yu ai e luku omeni tra sani,* dan yu heri skin dungru. 35 Dati meki yu musu de na ai. Luku bun taki a leti di de na ini yu, no kon dungru. 36 Sobun, efu yu heri skin e brenki èn nowan pisi fu en dungru, dan a heri skin o brenki leki te wan lampu e skèin leti gi yu.”

37 Baka di a taki den sani disi, wan Fariseiman aksi en fu kon nyan nanga en. Dati meki Yesus go na en oso èn a go sdon na tafra. 38 Ma a Fariseiman ferwondru di a si taki Yesus no wasi en anu* fosi a go nyan a brekten n’nyan. 39 Ne Masra taigi en: „Un Fariseiman, unu de leki kan nanga preti di krin fu dorosei. Ma na soso gridi nanga ogri de na ini un ati. 40 Un donman! A no a sma di meki dorosei, meki insei tu? 41 Dati meki te unu e du bun gi pôtisma, a musu kmopo fu un ati, dan ala tra sani fu unu o de krin. 42 Bigi ogri o miti unu, un Fariseiman, bika unu e gi Gado a di fu tin pisi fu a menti-w’wiri, fu a wijnruit-w’wiri èn fu ala sortu gruntu, ma unu no lobi sma leki fa Gado lobi den èn un no e krutu sani na wan reti fasi leki en! Un musu gi Gado a di fu tin pisi, ma un musu sorgu taki unu du den tra sani tu. 43 Bigi ogri o miti unu, un Fariseiman, bika unu lobi sdon na fes’sei* na ini den snoga èn unu lobi te sma e gi unu odi na w’woyo! 44 Bigi ogri o miti unu, bika unu de leki grebi* di no de krin fu si.* Sma e waka na den tapu sondro fu sabi taki den e waka tapu grebi!”

45 Dan wan fu den sma di ben sabi a Wet bun piki en: „Leriman, te yu e taki den sani disi, dan yu e kosi wi tu.” 46 Ne a taki: „Bigi ogri o miti unu di sabi a Wet bun, bika unu e poti lai na sma tapu di hebi fu tyari, ma unu srefi no e fasi a lai nanga wán finga srefi!

47 Bigi ogri o miti unu, bika unu e meki den grebi* fu den profeiti, ma na den afo fu unu kiri den! 48 Unu sabi den sani di den afo fu unu du èn unu feni en bun san den du. Den kiri den profeiti, ma unu e meki den grebi fu den. 49 Dati meki Gado di koni, taki: ’Mi o seni profeiti nanga apostel go na den. Sma o kiri sonwan fu den èn den o du ogri nanga den. 50 Gado o aksi den sma fu a ten disi frantwortu fu a brudu fu ala den profeiti di den kiri sensi a ten di grontapu seti, 51 vanaf Abel te go miti Sakaria di den kiri na mindri na altari nanga a tempel.’ Iya, mi e taigi unu: Gado o aksi den sma fu a ten disi frantwortu fu dati.

52 Bigi ogri o miti unu! Unu sabi a Wet heri bun, ma unu puru a sroto di e opo a doro fu kon sabi Gado. Unu srefi no e go na insei èn unu e pruberi fu tapu a pasi gi den sma di wani go na insei!”

53 Di a kmopo fu drape, den leriman fu a Wet nanga den Fariseiman bigin muilek en èn den ben aksi-aksi en wan lo sani 54 fu di den ben wani meki a taki wan sani di no bun.