Mateyus skrifi en

14 Na a ten dati, Herodes, a tiriman fu a kontren, yere san sma ben e ferteri fu Yesus. 2 Fu dati ede a taigi den futuboi fu en: „A musu de Yohanes a Dopuman. A kon na libi baka èn na dati meki a man du den bigi wondru disi.” 3 Herodes* ben seni sma go kisi Yohanes. Den ben tai en èn den ben poti en na straf’oso, fu di Herodias, a frow fu en brada Filipus, ben wani dati. 4 Bika someni leisi kba Yohanes ben taigi en: „A no bun taki yu teki en leki yu frow.” 5 Herodes ben wani kiri Yohanes, ma a ben frede den sma, fu di den ben e si Yohanes leki wan profeiti. 6 Ma di Herodes hori en feryar’oso, dan na umapkin fu Herodias kon dansi na a fesa. Herodes ben lobi a sani disi so te, 7 taki a sweri srefi fu gi na umapkin ala san a ben o aksi. 8 Na umapkin taki: „Gi mi na ede fu Yohanes a Dopuman na tapu wan plata preti.” A ben taki disi fu di en m’ma ben taigi en fu du dati. 9 A kownu ben e sari. Ma fu di a ben sweri na fesi den sma di ben sdon drape nanga en na tafra, meki a taigi sma fu gi na umapkin na ede fu Yohanes. 10 A seni wan sma go koti Yohanes ede puru na ini a straf’oso. 11 Den tyari na ede fu Yohanes kon na tapu wan plata preti, den gi en na a yongu uma èn a tyari en go gi en m’ma. 12 Bakaten den disipel fu Yohanes kon teki en dedeskin tyari go beri. Dan den go ferteri Yesus san psa. 13 Di Yesus yere disi, a gwe fu drape nanga wan boto, dan a go na wan presi fu kan de en w’wan. Ma di den sma yere disi, den kmoto na den foto èn den waka go na en baka.

14 Di a kmoto na ini a boto, a si bun furu sma drape. A ben sari den èn a ben meki den sikisma fu den kon betre. 15 Ma di a kon dungru, den disipel fu en kon na en èn den taki: „A presi fara èn a lati kba. Seni den sma gwe, so taki den kan go na den pkin foto fu bai sani fu nyan.” 16 Ma Yesus taigi den: „Den no abi fu gwe. Na unu musu gi den wan sani fu nyan.” 17 Den taigi en: „Wi abi feifi brede nanga tu fisi nomo.” 18 A taki: „Tyari den kon gi mi.” 19 Baka dati a taigi den sma fu go sdon na tapu a grasi èn a teki den feifi brede nanga den tu fisi. A luku go na hemel èn a taki Gado tangi. Baka di a broko den brede, a prati den gi den disipel, dan den disipel gi den sma. 20 Na so ala den sma nyan den bere furu. Baka dati den furu 12 baskita nanga den pisi brede di ben tan abra. 21 Sowan 5000 man ben nyan. Den no ben teri den uma nanga den yongu pkin. 22 Direk baka dati a taigi den disipel fu en fu teki a boto go na abrasei. Dan en ben o tan na baka fu seni den sma gwe.

23 Baka di a seni den sma gwe, a kren go na tapu a bergi pe en w’wan ben kan de fu begi. A ben lati kba èn en w’wan ben de drape. 24 A ten dati a boto ben de moi fara kba fu syoro. A ben hebi gi den disipel fu tyari a boto, bika tranga winti ben tyari bigi skwala kon na den tapu. 25 Ma na musdei,* Yesus waka na tapu a watra go na den disipel. 26 Di den si taki a e waka na tapu a se, den bruya èn den bari: „San na a sani dati?” Den bari fu di den ben frede. 27 Ma direk Yesus taigi den: „Na mi, no frede.” 28 Ne Petrus piki en: „Masra, efu na yu, dan taigi mi fu waka na tapu a watra kon na yu.” 29 Yesus taki: „Kon!” Ne Petrus kmoto na ini a boto èn a waka na tapu a watra fu go na Yesus. 30 Ma di Petrus bigin luku fa a bigi winti e wai, a kon frede. Ne a bigin sungu, dan a bari: „Masra, yepi mi!” 31 Ne Yesus langa en anu grabu en hori èn a taki: „Fu san ede yu bigin tweifri? Yu bribi no tranga nofo.” 32 Baka di den kren go na ini a boto, a bigi winti saka. 33 Dan den wan di ben de na ini a boto boigi gi Yesus èn den taki: „Yu na trutru a Manpkin fu Gado.” 34 Baka dati den abra a se èn den doro a syoro fu Geneisaret.

35 Di den sma drape si taki na Yesus, den panya a boskopu na ini a heri kontren èn den tyari ala den sikisma kon na en. 36 Den begi en efu den ben kan fasi den franya fu en dyakti nomo. Ala sma di ben fasi den franya fu en ben kon betre.