Lukas skrifi en
4 Di santa yeye kon na tapu Yesus, a gwe libi Yordan-liba. Ne a santa yeye tyari en go na ini a sabana. 2 A tan drape 40 dei langa. Ne Didibri kon tesi en. Yesus no ben nyan noti na a ten dati. Dati meki angri ben e kiri en baka di den dei dati psa. 3 Ne Didibri taigi Yesus: „Efu yu na wan manpkin fu Gado, dan taigi a ston disi fu tron brede.” 4 Ma Yesus piki en: „Gado Buku taki: ’Sma no musu libi fu brede w’wan.’”
5 Baka dati Didibri tyari en go na wan hei presi èn na ini wan syatu pisi ten a sori Yesus ala den kownukondre fu heri grontapu. 6 Dan Didibri taigi en: „Mi o gi yu a makti nanga a glori fu ala den kownukondre disi, bika den na fu mi èn mi kan gi den na suma mi wani. 7 Efu yu anbegi mi wán leisi nomo, dan ala den sani disi o de fu yu.” 8 Yesus taigi en: „Gado Buku taki: ’Na Yehovah* yu Gado, yu musu anbegi èn na en w’wan yu musu dini.’”
9 Didibri tyari en go na Yerusalem tu èn a poti en na tapu a skotu* fu a tempel. Dan a taigi en: „Efu yu na wan manpkin fu Gado, dan dyompo go na gron, 10 bika Gado Buku taki: ’A o taigi den engel fu en fu kibri yu èn fu no meki nowan sani psa nanga yu. 11 Den o tyari yu na tapu den anu, so taki yu no naki yu futu na wan ston.’” 12 Ne Yesus piki en: „Gado Buku taki: ’Yu no musu tesi Yehovah* yu Gado.’” 13 Di Didibri kba tesi en, a gwe libi en fu kon baka na wan moro bun ten.
14 Ne a santa yeye meki* Yesus drai go baka na Galilea. Na ini a heri kontren den sma ben e taki bun fu en. 15 A ben e gi sma leri tu na ini den snoga* fu den èn ala sma ben e prèise en.
16 Di a doro na Nasaret pe en p’pa nanga m’ma kweki en, a go na ini a snoga soleki fa a gwenti du na a Sabat-dei. Ne a opo tnapu fu leisi. 17 Den gi en a bukulolo fu a profeiti Yesaya, dan a opo a bukulolo èn a feni a pisi pe skrifi: 18 „A yeye fu Yehovah* de na mi tapu fu di a salfu mi fu ferteri den pôtisma bun nyunsu. A seni mi go fu taigi den sma di den tyari gwe leki srafu taki den o kon fri, fu taigi den breniwan taki den o si baka èn fu taigi den sma di e pina taki den o gwe leki friman. 19 A seni mi tu fu ferteri sma fu a ten te Yehovah* o sori sma bun-ati.” 20 Ne Yesus lolo a bukulolo tapu, dan a gi en baka na a dinari èn a go sdon. Ne ala sma na ini a snoga luku en fu si san a ben o du. 21 Dan a taigi den: „Tide den wortu di mi leisi dyaso kon tru.”
22 Ne ala sma bigin taki bun fu en èn den ben e ferwondru fu den moi sani di a taki. Den ben e taki: „A no wan manpkin fu Yosef?” 23 Ne a taigi den: „Mi sabi taki unu o koti na odo disi gi mi: ’Datra, dresi yusrefi.’ Dan unu o taki: ’Wi yere san yu du na Kaperna-um. Du den sani dati dyaso tu na ini yu eigi kontren.’” 24 Ma a taki: „Mi e taigi unu, noiti sma e bribi wan profeiti na ini en eigi kontren. 25 Na ini a ten fu Elia alen no ben fadon dri yari nanga siksi mun èn wan bigi angriten ben de na ini a heri kondre. Yu ben abi furu uma na ini Israel di den masra ben dede kba. 26 Tòg Gado no seni Elia go na wan fu den uma disi, ma a seni en go na a foto Sarfat na ini a kondre Sidon na wan uma di en masra ben dede kba. 27 Na ini a ten fu a profeiti Elisa furu gwasiman ben de tu na ini Israel, ma nowan fu den ben kon betre.* Na a Siriaman Naman w’wan ben kon betre.” 28 Ne ala den sma di yere den sani disi na ini a snoga, ati bron srefsrefi. 29 Den opo èn den yagi en kmopo na ini a foto. Dan den tyari en go na a lanki fu a bergi pe a foto fu den ben bow, fu di den ben wani trowe en go na gron. 30 Ma a ben man kmopo na den mindri, dan a gwe.
31 Dan a saka go na Kaperna-um, wan foto na ini Galilea. A gi den sma drape leri na a Sabat-dei. 32 Den ben ferwondru fu a fasi fa a ben e gi leri, bika a ben e taki leki wan sma di kisi makti fu Gado. 33 Wan leisi wan man ben de na ini a snoga di ben abi wan ogri yeye na en tapu èn a ben e bari nanga wan tranga sten: 34 „Libi wi! Fu san ede yu kon muilek wi, Yesus fu Nasaret. Na kon yu kon dya fu kiri wi? Mi sabi heri bun suma na yu. Yu na a Santawan fu Gado.” 35 Ma Yesus pir’ai gi na ogri yeye èn a taki: „Tapu yu mofo èn kmoto na a man tapu.” Fu dati ede na ogri yeye trowe a man go na gron na mindri den sma èn a kmoto na a man tapu sondro fu gi en mankeri. 36 Ne ala den sma ferwondru èn den taigi makandra: „San na den sani disi di a e taki? A abi a makti nanga a krakti fu taigi den ogri yeye fu kmoto na sma tapu.” 37 Na so den sma panya a tori disi na ini a heri kontren.
38 Baka di a gwe fu a snoga, a go na a oso fu Simon. Wan hebi korsu ben naki a m’ma fu a frow fu Simon èn den aksi Yesus fu yepi na uma. 39 Dati meki a boigi abra na uma èn a taigi a korsu fu gwe libi en. Ne a korsu saka èn na uma opo direk go sreka n’nyan gi den.
40 Di a son saka, sma tyari den sikisma fu den di ben abi difrenti sortu siki, kon na en. A poti en anu na tapu ibriwan fu den èn a meki den kon betre. 41 A ben e puru ogri yeye na tapu furu sma tu. Den ogri yeye ben bari: „Yu na a Manpkin fu Gado.” Ma a pir’ai gi den èn a no gi den primisi fu taki, fu di den ben sabi taki en na a Krestes.
42 Di dei opo, a go na dorosei na wan rustig presi. Dan den sma go suku en. Di den si en, den pruberi fu hori en fu a no gwe fu den. 43 Ma a taigi den: „Mi musu go ferteri a bun nyunsu fu Gado Kownukondre na tra foto tu, bika na fu disi Gado ben seni mi kon.” 44 Na so a tan preiki na ini den snoga fu Yudea.