Yosua

23 Yehovah ben meki sani waka na so wan fasi, taki den feanti fu Israel no ben kon feti nanga den moro. Na so, furu yari pasa. Yosua ben kon owru èn a ben grani kaba. 2 Ne Yosua kari a pipel fu Israel kon. A kari den owru man kon, sobun den edeman, den krutuman, nanga den fesiman èn a taigi den: „Luku, mi kon owru, iya, mi kon grani kaba. 3 Unu si san Yehovah un Gado du nanga den pipel fu a kondre disi fu yepi unu. Na Yehovah un Gado srefi ben e feti gi unu. 4 Mi yagi ala den sma di ben e libi na ini a kontren di de na mindri Yordan-liba nanga a Bigi Se, di de na a sei pe son e dongo èn mi meki sma iti lòt fu prati a kontren dati gi den lo fu unu. Tra pipel e libi na ini a kondre ete, ma a heri kondre na fu unu. 5 Na Yehovah un Gado yagi den sma di ben e libi na ini a kondre disi èn na en puru a kondre na den anu, so taki a ben kan kon de fu unu. Baka dati unu go libi na ini a kondre fu den, soleki fa Yehovah un Gado ben pramisi unu.

6 Abi deki-ati èn tan du ala den sani di de na ini a buku pe a wèt skrifi di Gado ben gi Moses. Noiti un musu pasa a wèt disi, ma un musu du ala san a wèt taki. 7 Noiti un musu moksi nanga den pipel fu a kondre disi. Un no musu kari a nen fu den gado fu den, noso sweri na den. Un no musu dini den, noso boigi gi den tu. 8 Ma un musu tai hori na Yehovah un Gado, soleki fa unu du te na a dei fu tide. 9 Yehovah o yagi bigi, tranga pipel komoto na ini a kondre. (Te na a dei fu tide, nowan sma ben man wini unu.) 10 Dan wán fu unu nomo o tranga nofo fu feti nanga wán dusun sma, fu di Yehovah un Gado e feti gi unu, soleki fa a ben pramisi unu. 11 Ala ten un musu sorgu taki unu tan lobi Yehovah un Gado.

12 Ma un no musu drai baka gi en èn un no musu tron bun mati nanga den pipel disi di e libi na ini a kondre ete. Un no musu trow nanga den èn un no musu moksi nanga den, noso meki den kon libi na un mindri, 13 bika efu unu du dati, dan un musu sabi taki Yehovah un Gado no o yepi unu moro fu puru a kondre na a anu fu den pipel disi. Den o tron gi unu leki wan trapu, leki wan krafana, leki wan wipi fu naki unu na un seibere èn leki maka na ini un ai. Na disi o pasa nanga unu, teleki unu dede gowe libi a bun kondre di Yehovah un Gado gi unu.

14 We, te fu kaba mi o dede neleki fa ala tra sma na grontapu e dede. Unu sabi heri bun taki Yehovah un Gado du ala den bun sani di a ben pramisi unu. Ala den sani disi kon tru, soleki fa unu srefi si. Iya, a du ala den sani di a pramisi. 15 Neleki fa Yehovah un Gado du ala den bun sani di a ben pramisi unu, na so Yehovah o meki ala den bigi ogri di a ben pramisi unu, kon na unu tapu. Yehovah un Gado o du dati, teleki a meki un alamala dede gowe libi a bun kondre di a ben gi unu. 16 Yehovah un Gado o du den sani disi nanga unu te unu no hori a frubontu di a meki nanga unu, te unu e go dini tra gado èn te unu e boigi gi den. Yehovah o ati bron srefisrefi nanga unu èn fosi unu denki, unu o dede gowe libi a bun kondre di a gi unu.”