Yeremia
43 Na so Yeremia taigi ala den sma san Yehovah, a Gado fu den, ben taki. Di a kba taki ala san Yehovah, a Gado fu den, ben seni en fu taki, 2 dan Asaria, a manpkin fu Hosaya, Yohanan, a manpkin fu Kareya, nanga ala den tra man di abi heimemre taigi Yeremia: „Na lei yu e lei. Yehovah wi Gado no seni yu fu taki dati wi no musu go tan na Egepte. 3 Na Baruk, a manpkin fu Neria, meki yu taki den sani disi, fu di a wani taki den Kaldeyasma kisi wi, so taki den kan kiri wi noso dwengi wi fu go na Babilon.”
4 Dati meki Yohanan, a manpkin fu Kareya, ala den legre-edeman nanga ala den tra sma no ben wani arki di Yehovah taigi den fu tan na Yuda. 5 Den sma fu Yuda di ben de na libi ete ben kmoto na ala den presi pe den ben e tan fu kon libi baka na Yuda. Ma Yohanan, a manpkin fu Kareya, nanga ala den legre-edeman tyari den sma disi go na Egepte. 6 Na ini a grupu disi yu ben abi man, uma, pkin nanga den umapkin fu a kownu. Yu ben abi den sma tu di Nebusaradan, na edeman fu den waktiman, ben libi gi Gedalia di ben de a manpkin fu Ahikam èn a granpkin fu Safan. Profeiti Yeremia nanga Baruk, a manpkin fu Neria, ben de na ini a grupu disi tu. 7 Na so den kon doro na Egepte, fu di den no arki Yehovah. Te fu kba den doro te na Takpankes.
8 Drape na Takpankes Yehovah taigi Yeremia: 9 „Teki wan tu bigi ston, kibri den na a ston balkon di de na a doro fu na oso fu a kownu fu Egepte na Takpankes, dan yu tapu den nanga smenti. Den Dyu man musu si te yu e du disi. 10 Dan yu musu taigi den: ’Yehovah di e tiri den legre, a Gado fu Israel, taki: „Mi o seni mi futuboi Kownu Nebukadnesar* fu Babilon kon. Mi o poti en kownusturu leti dyaso na tapu den ston di mi kibri èn a o bradi en tenti na den tapu. 11 A o kon feti nanga Egepte. Takru siki nanga fet’owru o kiri son sma. Trawan den o tyari gwe nanga tranga. 12 Mi o sutu faya gi den oso* fu den gado fu Egepte. A kownu o bron den èn a o tyari den gwe. Gi en, Egepte o de leki a duku di wan skapuman e domru ensrefi na ini. A o teki a kondre abra, dan a o gwe sondro taki wan ogri miti en.* 13 A o broko den pilari fu Bet-Seimes* na Egepte èn a o bron den oso* fu den gado fu Egepte nanga faya.”’”