Lukas skrifi en

24 Ma fruku m’manten na a fosi dei fu a wiki, den kon na a grebi* èn den tyari den switismeri sani di den ben sreka. 2 Ne den si taki a ston ben lolo puru kba fu a grebi.* 3 Di den go na insei, den no feni a skin fu Masra Yesus. 4 Den ben e ferwondru fu a tori ete, di tu man na ini brenki krosi kon tnapu na den sei. 5 Den frow bigin frede èn den saka den ede luku go na gron. Ne den man taigi den: „Fu san ede unu e suku a sma di de na libi na mindri den dedewan? 6 A no de dya. A kon na libi baka. Memre san a taigi unu di a ben de na Galilea ete. 7 A ben taki dati sma ben o tyari a Manpkin fu libisma gi sondusma èn den ben o spikri en na wan postu. Ma a ben o kon na libi baka na a di fu dri dei.” 8 Ne den memre den san Yesus ben taki 9 èn den gwe libi a grebi.* Dan den go ferteri den erfu apostel nanga ala den tra disipel ala den sani disi. 10 Den sma di ferteri den apostel a tori disi na Maria Magdalena, Yohana, Maria, a m’ma fu Yakobus nanga ala den tra frow di ben de nanga den. 11 Ma den ben feni taki den uma ben e taki lawlaw sani èn den no ben wani bribi den.

12 Ma Petrus opo lon go na a grebi èn di a beni luku go na ini a grebi,* a si soso den krosi pe den ben lolo Yesus na ini. Dati meki a gwe aladi a ben e suku fu ferstan san ben psa.

13 A srefi dei dati, tu disipel ben e waka go na Ema-us, wan dorpu di ben de sowan erfu kilometer fu Yerusalem. 14 Den ben e taki nanga makandra fu ala den sani di ben psa.

15 Den ben e taki ete di Yesus kon na den èn a bigin waka nanga den. 16 Ma den no ben man ferstan taki na en. 17 Ne a taigi den: „Fu sortu tori unu e taki so fayafaya nanga makandra?” Ne den tan tnapu nanga wan sari fesi. 18 A wan di nen Kleopas piki en: „Fa a du kon taki yu na a wan-enkri sma di no sabi san e psa na ini Yerusalem? A no drape yu ben de?”* 19 A taigi den: „San psa?” Den taigi en: „Yu no yere san psa nanga Yesus fu Nasaret? A ben de wan profeiti di ben e taki sani di ben abi furu krakti èn a du bigi wondru na fesi Gado nanga a heri pipel. 20 Den edeman fu den priester nanga den tiriman fu wi meki a kisi dedestrafu èn den spikri en na wan postu. 21 Ma wi ben howpu taki a man disi ben o de a sma di ben o ferlusu Israel. Na dri dei kba di den sani disi psa. 22 Wan tu uma di ben de nanga wi meki wi skreki, bika den taigi wi taki di den go na a grebi* fruku m’manten 23 den no feni en skin. Den si tu engel tu di taki dati Yesus de na libi. 24 Bakaten sonwan fu den di ben de nanga wi go na a grebi.* Ne den si taki a ben leigi leki fa den uma taki, ma den no si Yesus.”

25 Dati meki a taigi den: „Un no e ferstan èn un no wani bribi ala den sani di den profeiti taki! 26 Krestes ben musu nyan pina, so taki a ben kan kisi glori.” 27 Ne a bigin taki fu den buku fu Moses èn fu ala den buku fu den Profeiti fu tyari kon na krin gi den san Gado Buku e taki fu en.

28 Te fu kba, den kon krosbei fu a dorpu pe den ben musu go èn Yesus du leki a ben o waka go moro fara. 29 Ma den begi en fu tan nanga den. Den taki: „Tan nanga wi, bika a lati kba èn dyonsro a o dungru.” Dati meki a go na insei fu tan nanga den. 30 Di a go sdon fu nyan nanga den, a teki a brede, a taki Gado tangi gi a brede, dan a broko en èn a gi den. 31 Dan den ai kon opo èn den kon ferstan taki na en. Ne den no si en moro. 32 Den taigi makandra: „Di a ben e taki nanga wi na pasi èn di a meki wi ferstan krin* san skrifi na ini Gado Buku, dan dati ben naki wi ati trutru!” 33 Direk den opo èn den drai go baka na Yerusalem. Drape den feni den erfu apostel nanga den tra disipel di ben kon makandra. 34 Den apostel nanga den disipel taki: „Masra kon na libi baka trutru èn a kon na Simon!” 35 Ne den tu disipel ferteri san psa di den ben de na pasi. Den ferteri tu taki na di Yesus broko a brede, den ben kon sabi taki na en.

36 Den ben e taki ete fu den sani disi, di Yesus kon na den mindri. A taigi den: „Meki sani waka bun nanga unu.” 37 Ma fu di den ben denki taki na wan yeye den si, meki den skreki èn den ben e frede srefsrefi. 38 Dati meki a taigi den: „San unu e frede so? Fu san ede unu e tweifri? 39 Luku mi anu nanga mi futu, dan unu o si taki na mi de dya. Fasi mi skin, dan unu o si, bika wan yeye no abi libisma skin nanga bonyo leki fa unu si taki mi abi.” 40 Di a ben e taki disi, a sori den en anu nanga en futu. 41 Den no ben kba bribi ete, ma den ben e prisiri èn den ben e ferwondru. Ne a aksi den: „Unu abi wan sani fu nyan?” 42 Dan den gi en wan pisi losi fisi. 43 A teki en èn a nyan en leti na den fesi.

44 Dan a taigi den: „Disi na den sani di mi ben taigi unu di mi ben de nanga unu ete. Mi ben taigi unu taki ala san a Wet fu Moses, den buku fu den Profeiti nanga den Psalm skrifi fu mi, musu kon tru.” 45 Dan a yepi den fu ferstan ala san Gado Buku ben taki. 46 A taigi den: „Gado Buku taki dati Krestes ben o pina èn taki a ben o kon na libi baka na a di fu dri dei. 47 Sma ben o preiki na ini en nen gi ala pipel taki den musu abi berow fu kisi pardon fu sondu. Den o bigin preiki na ini Yerusalem, dan den o go na tra presi. 48 Un musu ferteri sma ala san unu si. 49 Mi e seni a sani di mi P’pa pramisi, kon gi unu. Ma un musu tan na ini a foto teleki unu kisi krakti fu hemel.”

50 Baka dati, a tyari den go te na Betania, dan a opo en anu go na loktu èn a blesi den. 51 Di a ben e blesi den, a bigin opo go na hemel. Na so a gwe libi den. 52 Den saka kindi boigi gi en,* dan den drai go baka na Yerusalem nanga bigi prisiri. 53 Ala dei den ben de na ini a tempel fu prèise Gado.