Numeri

2 Yehovah taigi Moses nanga Aron: 2 „Den Israelsma musu seti den tenti na a presi di a lo fu den kisi, na ini wan fu den grupu fu dri lo. Ibriwan fu den musu poti en tenti na a presi pe a marki fu en lo de. Den musu seti den tenti fu den lontu a konmakandra-tenti èn a mofodoro fu den tenti musu drai go na a konmakandra-tenti.

3 Den sma di musu seti den tenti leki wan legre na owstusei pe a son e opo, na den dri lo fu a grupu fu Yuda. Na edeman fu den sma fu Yuda na Naheson, a manpikin fu Aminadab. 4 A legre fu en abi seibitenti na fo dusun nanga siksi hondro mansma. 5 Na a wan sei fu den, a lo fu Isaskar musu seti den tenti. Na edeman fu den sma fu Isaskar na Netaneyel, a manpikin fu Suwar. 6 A legre fu en abi feifitenti na fo dusun nanga fo hondro mansma. 7 A lo fu Seibulon musu de na a tra sei fu den. Na edeman fu den sma fu Seibulon na Eliab, a manpikin fu Heilon. 8 A legre fu en abi feifitenti na seibi dusun nanga fo hondro mansma.

9 Ala nanga ala, wán hondro aititenti na siksi dusun nanga fo hondro mansma na ini a grupu fu Yuda man wroko na ini a legre fu Israel. Na den musu bigin waka fosi.

10 Den sma di musu seti den tenti na zuidsei leki wan legre, na den dri lo fu a grupu fu Ruben. Na edeman fu den sma fu Ruben na Elisur, a manpikin fu Sedeyur. 11 A legre fu en abi fotenti na siksi dusun nanga feifi hondro mansma. 12 Na a wan sei fu den, a lo fu Simeon musu seti den tenti. Na edeman fu den sma fu Simeon na Selumiyel, a manpikin fu Surisadai. 13 A legre fu en abi feifitenti na neigi dusun nanga dri hondro mansma. 14 A lo fu Gad musu de na a tra sei fu den. Na edeman fu den sma fu Gad na Eliasaf, a manpikin fu Rehuwel. 15 A legre fu en abi fotenti na feifi dusun siksi hondro nanga feifitenti mansma.

16 Ala nanga ala, wán hondro feifitenti na wán dusun fo hondro nanga feifitenti mansma na ini a grupu fu Ruben man wroko na ini a legre fu Israel. Dati na a di fu tu grupu di musu bigin waka.

17 Te den o lusu a konmakandra-tenti fu gowe, dan den Leifisma musu waka na mindri den tra grupu.

Na a srefi fasi fa den musu seti den tenti fu den, na so den musu waka gowe. Ibriwan sma musu de na en presi na ini wan fu den grupu fu dri lo.

18 Den sma di musu seti den tenti na west-sei leki wan legre, na den dri lo fu a grupu fu Efrayim. Na edeman fu den sma fu Efrayim na Elisama, a manpikin fu Amihud. 19 A legre fu en abi fotenti dusun nanga feifi hondro mansma. 20 Na a wan sei fu den, a lo fu Manase musu seti den tenti. Na edeman fu den sma fu Manase na Gamaliyel, a manpikin fu Pedasur. 21 A legre fu en abi dritenti na tu dusun nanga tu hondro mansma. 22 A lo fu Benyamin musu de na a tra sei fu den. Na edeman fu den sma fu Benyamin na Abidan, a manpikin fu Gideoni. 23 A legre fu en abi dritenti na feifi dusun nanga fo hondro mansma.

24 Ala nanga ala, wán hondro aiti dusun nanga wán hondro mansma na ini a grupu fu Efrayim man wroko na ini a legre fu Israel. Dati na a di fu dri grupu di musu bigin waka.

25 Den sma di musu seti den tenti na noordsei leki wan legre, na den dri lo fu a grupu fu Dan. Na edeman fu den sma fu Dan na Ahiyeiser, a manpikin fu Amisadai. 26 A legre fu en abi siksitenti na tu dusun nanga seibi hondro mansma. 27 Na a wan sei fu den, a lo fu Aser musu seti den tenti. Na edeman fu den sma fu Aser na Pagiyel, a manpikin fu Okran. 28 A legre fu en abi fotenti na wán dusun nanga feifi hondro mansma. 29 A lo fu Naftali musu de na a tra sei fu den. Na edeman fu den sma fu Naftali na Ahira, a manpikin fu Enan. 30 A legre fu en abi feifitenti na dri dusun nanga fo hondro mansma.

31 Ala nanga ala, wán hondro feifitenti na seibi dusun nanga siksi hondro mansma de na ini a grupu fu Dan. Dati na a lasti grupu fu dri lo di musu bigin waka.”

32 Disi na ala den mansma na ini den lo fu Israel di den teri. Ala nanga ala, siksi hondro na dri dusun feifi hondro nanga feifitenti mansma ben man wroko na ini a legre fu Israel. 33 Ma den no ben teri den Leifisma makandra nanga den tra mansma fu Israel, bika na dati Yehovah ben taigi Moses. 34 Den Israelsma ben du soleki fa Yehovah ben taigi Moses. Na so den ben seti den tenti na ini den grupu fu dri lo, èn na so den ben e waka tu. Ibriwan fu den ben de na ini en eigi famiri na ini a lo fu en.