Mateyus e fruteri

14 Na a srefi ten dati, Herodes, a tiriman fu a kontren, yere san sma ben e fruteri fu Yesus. 2 Fu dati ede a taigi den futuboi fu en: „Disi na Yohanes a Dopuman. A kisi wan opobaka èn na fu dati ede meki a man du den bigi wondru.” 3 Herodes ben seni sma go kisi Yohanes. Den ben tai en èn den ben poti en na strafu-oso, fu di Herodias, a wefi fu en brada Filipus, ben wani dati. 4 Bika someni leisi kaba Yohanes ben taigi en: „A no fiti taki yu teki en leki wefi.” 5 Herodes ben wani kiri Yohanes, ma a ben frede den sma, fu di den ben si Yohanes leki wan profeiti. 6 Ma di Herodes hori en friyari-oso, dan na umapikin fu Herodias kon dansi na a fesa. Disi ben plisi Herodes so te, 7 taki a sweri srefi fu gi na umapikin ala san a ben o aksi. 8 Na umapikin taki: „Gi mi na ede fu Yohanes a Dopuman na tapu wan plata preti.” A ben taki disi fu di en mama ben taigi en fu du dati. 9 A kownu ben sari, ma fu di a ben sweri wan sweri èn fu di sma ben sidon drape nanga en na tafra, meki a gi a komando fu gi na umapikin na ede fu Yohanes. 10 A ben seni wan sma go koti Yohanes ede puru na ini a strafu-oso. 11 Dan den tyari na ede fu Yohanes kon na tapu wan plata preti, den gi en na a yongu uma èn a tyari en go gi en mama. 12 Bakaten den disipel fu Yohanes kon puru a dedeskin fu Yohanes èn den beri en, dan den go fruteri Yesus san pasa. 13 Di Yesus yere disi, a gowe fu drape nanga wan boto èn a go na wan presi fu kan de en wawan. Ma di den sma yere disi, den komopo na den foto èn den waka go na en baka.

14 Di a komoto na ini a boto, a si wan heri ipi sma. A ben sari den èn a ben meki den siki sma fu den kon betre. 15 Ma di a kon dungru, den disipel fu en kon na en èn den taki: „Sma no e libi dyaso èn a lati kaba. Seni den sma gowe, so taki den kan go na den pikin foto fu bai sani fu nyan.” 16 Ma Yesus taigi den: „Den no abi fu gowe. Gi den wan sani fu nyan.” 17 Den taigi en: „Wi abi soso feifi brede nanga tu fisi.” 18 A taki: „Tyari den kon gi mi.” 19 Baka dati a taigi den sma fu go sidon na tapu a grasi èn a teki den feifi brede nanga den tu fisi. A luku go na hemel èn a taki Gado tangi. Baka di a broko den brede, a prati den gi den disipel, dan den disipel gi den sma. 20 Na so ala den sma nyan den bere furu. Baka dati den piki den pisi brede di tan abra èn den furu twarfu baskita nanga dati. 21 Toku sowan feifi dusun man ben feni wan sani fu nyan, aladi den no teri den uma nanga den yongu pikin ete. 22 Dan wantewante a taigi den disipel fu en fu go na ini a boto, so taki den ben kan bigin go na abrasei, dan a seni den sma gowe.

23 Baka di a seni den sma gowe, en wawan kren na tapu a bergi fu go begi. A ben lati kaba èn en wawan ben de drape. 24 Disiten a boto ben de moi fara kaba fu syoro. Den skwala ben naki a boto bun tranga èn a ben hebi gi den disipel fu tyari a boto, bika winti ben wai bun tranga kon na den tapu. 25 Ma na musudei, Yesus waka na tapu a se fu go miti den disipel. 26 Di den si taki a e waka na tapu a se, den bruya èn den bari: „San na a sani dati?” Den bari fu di den ben frede trutru. 27 Ma wantewante Yesus taigi den: „Abi deki-ati, na mi. No frede.” 28 Ne Petrus piki en: „Masra, efu na yu, dan taigi mi fu waka kon na yu na tapu a watra.” 29 Yesus taki: „Kon!” Ne Petrus komopo na ini a boto èn a waka na tapu a watra fu go na Yesus. 30 Ma di Petrus si fa a bigi winti e wai, dan a kon frede èn di a bigin sungu, a bari: „Masra, yepi mi!” 31 Wantewante Yesus langa en anu grabu en hori èn a taki: „Yu no e bribi nofo. Fu san ede yu bigin tweifri?” 32 Baka di den kren go na ini a boto, a bigi winti saka. 33 Dan den wan di ben de na ini a boto boigi gi Yesus èn den taki: „Yu na trutru a Manpikin fu Gado.” 34 Baka dati den abra a se èn den doro a syoro fu Geneisaret.

35 Di den sma drape si taki na Yesus, den fruteri trawan na ini a heri kontren èn den tyari ala den siki sma kon na en. 36 Den begi en tu efu den ben kan fasi a franya fu en dyakti nomo. Ala sma di ben fasi a franya, ben kon betre trutru.