Gi den Galasiasma

6 Brada, srefi efu wan sma meki wan fowtu sondro fu a sabi, dan unu leki lepi Kresten musu pruberi na wan safri-ati fasi fu tyari so wan sma kon na tapu a reti pasi baka. Ma luku bun taki unu srefi no kisi tesi. 2 Tan tyari den hebi fu makandra, èn na so fasi unu e du san a wèt fu Krestes e taki. 3 Efu wan sma e denki furu fu ensrefi, aladi a no de noti, dan a e kori ensrefi. 4 Meki ibri sma ondrosuku san na den sani di ensrefi e du. Dan dati sa meki taki a e prisiri nanga san ensrefi e du èn a no musu teki ensrefi gersi nanga tra sma. 5 Bika ibri sma sa tyari en eigi lai.

6 Boiti dati, ibri sma di e kisi leri fu a wortu fu Gado, musu prati bun sani nanga a sma di e gi en leri.

7 No kori unsrefi: Gado no e meki sma spotu en. Bika san wan sma e sai, na dati a sa koti tu. 8 A sma di e sai nanga sondu na prakseri, sa koti dede fu di a e du san a sondu skin wani. Ma a sma di e sai nanga a yeye na prakseri, sa koti têgo libi fu di a e du san a yeye wani. 9 Fu dati ede, wi no musu tapu fu du san bun, bika na a reti ten wi sa koti den froktu efu wi no kon weri. 10 Fu dati ede, solanga wi abi na okasi, meki wi du bun gi ala sma, ma spesrutu gi den wan di abi a srefi bribi leki wi.

11 Nanga mi eigi anu mi skrifi a brifi disi gi unu. Luku o bigi mi skrifi.

12 Ala den sma di wani plisi libisma, e pruberi fu dwengi unu fu go besnèi. Ma den e du dati, soso fu no meki sma frufolgu den fu a pinapostu fu Krestes Yesus ede. 13 Bika srefi den sma di besnèi no e du san a Wèt e taki, ma den wani taki unu musu besnèi, so taki den kan meki bigi fu unu ede. 14 Noiti mi wani meki bigi, boiti te a abi fu du nanga a pinapostu fu wi Masra Yesus Krestes. Soleki fa mi e si en, grontapu spikri na wan postu nanga yepi fu en, èn grontapu e si mi leki wan sma di spikri na wan postu. 15 A no prenspari efu wan sma besnèi, noso efu a no besnèi, ma san prenspari na wan nyun sma di Gado meki. 16 Meki ala den sma di e waka na a fasi disi soleki fa a fiti, sobun, na Israel fu Gado, abi a freide fu Gado èn meki a sori den sari-ati.

17 Now nowan sma musu gi mi problema moro, bika mi abi bronmarki na mi skin di e sori taki mi na wan srafu fu Yesus.

18 Brada, meki wi Masra Yesus Krestes sori unu bun-ati, fu di unu abi a yoisti fasi fu denki. Amen.