A di fu tu brifi gi den Korentesma
2 Mi bosroiti fu no meki unu sari te mi kon baka na unu. 2 Efu mi meki un alamala sari, dan suma o meki mi prisiri? A no den srefi sma di mi meki firi sari? 3 Dati meki mi ben skrifi den sani disi. Dan den sma di musu meki mi prisiri, no o meki mi firi sari te mi kon. Mi de seiker taki den sani di e meki mi prisiri e meki un alamala prisiri tu. 4 A ben hebi gi mi fu skrifi unu. Mi du en nanga bigi sari na ini mi ati èn nanga furu watra-ai. Ma mi no du disi fu meki unu firi sari, ma fu meki unu kon sabi taki mi lobi unu trutru.
5 Gi mi pardon fu di mi e taki en so, ma efu wan sma tyari sari kon, dan a no mi a meki firi sari, ma a meki un alamala sari. 6 A piri-ai di furu fu unu gi a sma dati, nofo gi en. 7 Ma now un musu gi en pardon nanga un heri ati èn un musu trowstu en, so taki a sma dati no sari so te, taki a lasi-ati. 8 Fu dati ede mi e begi unu fu sori en taki unu lobi en. 9 Dati meki mi skrifi unu fu kon sabi efu unu e gi yesi na ini ala sani. 10 Efu unu gi wan sma pardon fu iniwan ogri di a du, dan mi e gi en pardon tu. Fu taki en leti, efu mi gi wan sma pardon, dan mi du dati fu yepi unu èn mi du dati na fesi Krestes. 11 Na so fasi Satan no kan wini wi, bika wi sabi san a abi na prakseri.
12 Di mi doro na Trowas mi fruteri sma a bun nyunsu fu Krestes èn mi kisi okasi fu du wroko gi Masra. 13 Mi no ben firi korostu, fu di mi no ben feni mi brada Titus. Ne mi taigi den brada adyosi èn mi teki pasi go na Masedonia.
14 Ma tangi fu Gado! Ala ten a e waka na wi fesi èn a e tyari wi leki winiman na ini wan prodowaka makandra nanga Krestes. A e meki wi panya a sabi fu en leki wan switi smeri na ala presi! 15 Bika gi Gado, wi nanga a boskopu fu Krestes na wan switi smeri. Den sma di o kisi frulusu èn den sma di o dede e smeri en tu. 16 Gi den sma di o dede, a de wan smeri di e tyari dede kon, ma gi den sma di o kisi frulusu, a de wan smeri di e tyari libi kon. Ma suma fiti fu du a wroko disi? 17 Na wi fiti fu du a wroko disi, bika wi no e meki moni nanga a wortu fu Gado soleki fa furu sma e du. Ma wi e taki nanga wan krin ati leki bakaman fu Krestes èn leki sma di Gado seni, aladi Gado e luku wi.