Rut
1 Na ini a ten di den krutuman ben e koti krutu, angriten ben kon de na ini a kondre. Dati meki wan man froisi fu Betlehem na ini Yuda fu go tan na ini a kondre Moab. A gwe makandra nanga en frow nanga den tu manpkin fu en. 2 A man ben nen Elimeilek* èn en frow ben nen Naomi.* Den tu manpkin fu Elimeilek ben nen Maklon* nanga Kilion.* Den ben de Efratasma fu Betlehem na ini Yuda. Te fu kba den doro na ini a kondre Moab, dan den tan drape.
3 Baka wan pisi ten Elimeilek, a masra fu Naomi, dede. Na so Naomi wawan tan nanga den tu manpkin fu en. 4 Bakaten den manpkin disi trow nanga Moab uma. Wan fu den uma ben nen Orpa èn a trawan ben nen Rut. Den tan drape sowan tin yari. 5 Baka wan pisi ten den tu manpkin, Maklon nanga Kilion, dede tu. Na so Naomi lasi en masra nanga den tu pkin fu en. 6 Drape na ini Moab, Naomi kon yere taki Yehovah poti prakseri na en pipel èn taki a ben meki den feni n’nyan* baka. Dati meki Naomi nanga den frow fu den manpkin fu en gwe libi Moab.
7 Ne Naomi gwe libi a presi pe en nanga den frow disi ben e tan. Di den ben de na pasi fu go na Yuda, 8 Naomi taigi den tu uma: „Un drai go baka na un m’ma oso. Meki Yehovah sori lobi* gi unu, neleki fa unu ben sori lobi* gi mi nanga den masra fu unu di dede kba. 9 Meki Yehovah gi unu ala tu wan masra so taki unu kan abi wan bun libi.”* Ne a bosi den, dan den bari krei. 10 Den tan taigi Naomi: „Nôno, wi wani go nanga yu na a pipel fu yu.” 11 Ma Naomi taki: „Mi pkin, un drai gwe baka. Fu san ede unu wani kon nanga mi? Mi no man kisi manpkin moro di kan trow nanga unu. 12 Mi pkin, mi e begi unu. Un drai gwe baka, bika mi owru tumsi fu feni wan masra. Awinsi mi ben o feni wan masra tideneti ete èn awinsi mi ben o kisi manpkin, 13 unu ben o tan wakti teleki den kon bigi? Unu ben o man tan sondro masra teleki a ten dati? Nôno mi pkin, fu di Yehovah gwe libi mi meki den sani disi miti unu èn dati e hati mi.”
14 Ne den bari krei baka. Dan Orpa bosi Naomi èn a gwe, ma Rut tan nanga Naomi. 15 Dati meki Naomi taki: „Luku, Orpa drai go baka na en pipel nanga den gado fu en. Go nanga en.”
16 Ma Rut piki: „No aksi mi fu gwe libi yu èn fu drai go baka sondro yu. Pe yu e go, na drape mi o go. Pe yu e sribi te neti, na drape mi o sribi. Yu pipel o de mi pipel èn yu Gado o de mi Gado. 17 Pe yu o dede, na drape mi o dede èn na drape den o beri mi tu. Ma efu iniwan sani boiti dede prati mi nanga yu, dan meki Yehovah strafu mi èn meki a du moro leki dati srefi.”
18 Di Naomi si taki Rut ben de nomonomo fu go nanga en, dan a no taki noti moro. 19 Ne den ala tu waka go doro teleki den doro Betlehem. Fa den doro na ini Betlehem, ala sma na ini a foto ferwondru èn den uma ben e taki: „A no Naomi?” 20 Ma te den uma ben e taki dati, dan a ben e taigi den: „No kari mi Naomi.* Kari mi Mara,* bika na Almaktiwan tyari soso sari kon na ini mi libi. 21 Di mi gwe mi ben abi ala sani, ma Yehovah meki mi drai kon baka nanga leigi anu. Fu san ede unu e kari mi Naomi, efu na Yehovah srefi drai baka gi mi èn efu na Almaktiwan srefi meki taki problema miti mi?”
22 Na so Naomi gwe libi Moab èn a drai kon baka na a kondre fu en. Rut, a Moab uma di ben trow nanga a manpkin fu en, ben de nanga Naomi tu di a drai kon baka fu Moab. Den doro na Betlehem na a ten di sma bigin koti groto.*