Lukas e fruteri

3 Na ini a di fu tinafeifi yari di Grankownu Tiberius ben e tiri, Pontius Pilatus ben de granman fu Yudea. Herodes ben de tiriman fu Galilea, èn en brada Filipus ben de tiriman fu a kontren Itureya nanga Trakonitis. Lisanias ben de tiriman fu Abileine, 2 èn Anas nanga Kayafas ben de granpriester. Na a ten dati Gado ben gi Yohanes, a manpikin fu Sakaria, wan boskopu na ini a sabana.

3 Baka dati, Yohanes waka a heri kontren fu Yordan-liba fu preiki taki sma musu teki dopu fu sori taki den abi berow. Na so den ben o man kisi pardon fu sondu 4 soleki fa a skrifi na ini a buku fu a profeiti Yesaya. A profeiti ben taki: „Arki! Wan sma e bari na ini a sabana: ’Un pipel, sreka a pasi fu Yehovah. Meki den pasi fu en kon reti. 5 Ibri lagipresi musu kon hei èn ibri bergi nanga hei presi musu kon plata. Den pasi di abi boktu musu tron pasi di reti èn den olo-olo presi musu tron grati pasi. 6 Dan ala sma o si a fasi fa Gado o tyari frulusu kon.’”

7 Fu dati ede a taigi den sma di ben kon na en fu teki dopu: „Un snekipikin, suma taigi unu taki unu kan lowe gi a bigi atibron fu Gado di e kon? 8 Dati meki un musu du sani di e sori taki unu abi berow. No bigin prakseri: ’Wi tata na Abraham.’ Bika mi e taigi unu taki Gado abi a makti fu meki pikin gi Abraham fu den ston disi. 9 Iya, na aksi de na a rutu fu den bon kaba. Fu dati ede, den o koti ibri bon di no e meki bun froktu èn den o iti en go na ini faya.”

10 Ne den sma aksi en: „San wi musu du dan?” 11 A piki den: „Meki a sma di abi tu krosi, gi wan fu den na a sma di no abi, èn meki a sma di abi nyanyan, du a srefi sani tu.” 12 Srefi den sma di e teki belasting-moni gi lanti kon na en tu fu teki dopu èn den taigi en: „Leriman, san wi musu du?” 13 A taigi den: „No aksi moro leki a belasting-moni di sma musu pai.” 14 Den srudati kon aksi en tu: „San wi musu du dan?” Ne a taigi den: „No trobi nowan sma èn no lei gi nowan sma. Un musu breiti te unu abi den sani di sma abi fanowdu fu tan na libi.”

15 A pipel ben fruwakti a Krestes èn den alamala ben prakseri fu Yohanes: „A kan taki en na Krestes?” 16 Dati meki Yohanes piki den alamala: „Mi e dopu unu nanga watra. Ma a sma di bigi moro mi o kon, èn mi no warti srefi fu lusu a banti fu en susu. En o dopu unu nanga santa yeye èn nanga faya. 17 En skopu fu wai aleisi* de na ini en anu fu krin a heri gron pe a e fon aleisi èn fu poti na aleisi na ini en maksin. Ma a o bron na aleisibuba nanga faya di nowan sma kan kiri.”

18 Yohanes ben taki furu tra sani fu gi den sma rai èn a ben e fruteri a pipel bun nyunsu. 19 Yohanes ben gi a tiriman Herodes piri-ai di abi fu du nanga Herodias, a wefi fu en brada èn nanga ala den ogri di Herodes ben du. 20 Fu dati ede Herodes ben du ete wan ogri sani. A poti Yohanes na ini strafu-oso.

21 We, di ala sma teki dopu, dan Yesus teki dopu tu. Di a ben e begi, hemel opo. 22 Ne santa yeye saka kon na en tapu leki wan doifi, dan wan sten komoto na hemel èn a taki: „Yu na mi Manpikin, a lobiwan. Na yu mi feni bun.”