Maleaki

2 „Un priester, disi na wan wet gi unu. 2 Efu unu no arki èn efu unu no e si en leki wan seryusu sani fu lespeki mi nen,” na so Yehovah di e tiri den legre taki, „dan mi o meki fluku kon na un tapu èn mi o meki den blesi fu unu tron fluku. Iya, mi meki den blesi fu unu tron fluku fu di unu no e si en leki wan seryusu sani fu du san mi taki.”

3 „Na fu unu ede mi no o meki den siri di unu sai gro.* A pupe fu den meti di unu e gi leki ofrandi na den fesa fu unu, mi o trowe na ini un fesi. Den o tyari unu go trowe na a presi pe den e trowe pupe. 4 Na so unu o sabi taki mi gi unu a wet disi fu di mi no wani broko a ferbontu* di mi meki nanga Leifi”, na so Yehovah di e tiri den legre taki.

5 „Mi ben meki a ferbontu nanga en, so taki a ben o tan na libi èn so taki a no ben o abi nowan brok’ede. Dati meki a ben abi bigi lespeki gi mi. Fu di a ben abi lespeki gi mi nen, meki a no ben wani du nowan sani di mi no lobi. 6 Noiti a ben e lei èn noiti a ben e taki sani di no fiti. A ben e tyari ensrefi na wan fasi di mi feni bun èn a ben e libi bun nanga trawan. A ben meki furu sma tapu nanga den ogri di den ben e du. 7 Bika na a priester musu gi sma leri. Na en a pipel musu go fu yere san na den wet, bika en na a boskopuman fu Yehovah di e tiri den legre.

8 Ma unu kmoto na a pasi di mi sori unu. Na fu unu ede meki furu sma no e du san a wet e taki. Un pori a ferbontu di mi ben meki nanga Leifi”, na so Yehovah di e tiri den legre taki. 9 „Dati meki mi o sorgu taki ala sma wiswasi unu. Den o si unu leki lagi sma fu di unu no libi soleki fa mi wani. Na presi fu dati unu e du san unu wani nanga a wet.”

10 „A no wán p’pa wi alamala abi? A no wán Gado meki wi? We dan fu san ede wi e bedrigi makandra? Fu san ede wi e wiswasi a ferbontu fu den afo fu wi? 11 Yuda tyari ensrefi na wan bedrigi fasi èn sma du wan bigi ogri na ini Israel nanga Yerusalem. Bika Yuda wiswasi Yehovah di lobi santa sani.* Yuda go trow nanga na umapkin fu wan gado fu den trakondre sma. 12 Yehovah o kiri iniwan sma di e tan na ini den tenti fu Yakob èn di e du den sani disi, awinsi suma a de èn awinsi a tyari wan sani leki ofrandi gi Yehovah di e tiri den legre.”

13 „Wan tra sani* di unu e du, e meki taki den uma e geme èn den e krei langalanga watra-ai na a altari fu Yehovah. Dati meki a no wani teki nowan ofrandi fu unu èn a no e prisiri nanga nowan tra sani di unu wani gi en. 14 Un taki: ’Fu san ede?’ Fu di Yehovah srefi si fa unu bedrigi un frow. Sensi di unu yongu, un trow nanga en, en na un patna èn unu meki wan ferbontu nanga en. 15 Ma wan tu sma no du a sani disi fu di a yeye fu Gado* ben de na den tapu ete. San den ben e hori na prakseri? A pipel fu Gado.* Fu dati ede, luku bun fa unu e denki èn no bedrigi a frow di unu ben teki sensi di unu yongu. 16 Bika mi no lobi* brokotrow srefsrefi”, na so Yehovah, a Gado fu Israel, taki. „Mi no lobi a sma di e du ogri”,* na so Yehovah di e tiri den legre taki. „Un musu luku bun sortu denki unu abi èn unu no musu bedrigi trawan.

17 Yehovah kon weri fu den sani di unu e taki. Unu aksi: ’Fu san ede a kon weri fu wi?’ Na fu di unu e taki: ’Yehovah e si ala sma di e du ogri leki bun sma. A lobi den sortu sma dati.’ Unu e taki tu: ’Pe a Gado fu retidu de?’”