A fosi Kroniki

20 Na a bigin fu a nyun yari, na a ten di den kownu ben gwenti go na feti, Yoab tyari den srudati fu a legre fu Israel go feti nanga den Amonsma. Den pori a kondre fu den Amonsma èn den lontu a foto Raba. Ne Yoab hari go feti nanga den sma fu Raba èn a wini den, ma David tan na Yerusalem. 2 Bakaten, David puru a kownu-ati na a ede fu a popki di den meki fu a gado Malkam. A kownu-ati ben de fu gowtu, a ben abi diriston èn a ben kon si taki a ben e wegi dritenti na fo kilo nanga tu hondro gran. Ne den poti en na tapu David ede. Boiti dati, David teki furu gudu fu a foto tyari gowe. 3 A tyari den sma fu a foto gowe èn a poti den fu koti ston, fu wroko nanga srapu isri wrokosani èn nanga aksi. Na so David du na ala den foto pe den Amonsma ben e libi. Te fu kaba David nanga ala en srudati drai go baka na Yerusalem.

4 Baka dati den Israelsma nanga den Filisteasma bigin feti na Geiser. Ne Sibekai, wan Husasma, kiri Sipai, wan Rafasma. Na so fasi den wini den Filisteasma.

5 Di den Israelsma nanga den Filisteasma bigin feti baka, dan Elhanan, a manpikin fu Yahir, kiri Lakmi, a brada fu Goliat, wan man fu Gat. A tiki fu Lakmi en lansri ben bigi* srefisrefi.

6 Di den go feti na Gat ete wan leisi, wan bun bigi man ben de na ini a feti. Na ala tu anu èn na ala tu futu a ben abi siksi finga. Ala nanga ala, a ben abi tutenti na fo finga. A man disi ben de wan Rafasma tu. 7 A ben e tanteri Israel doronomo. Te fu kaba Yonatan, a manpikin fu David brada Simeya, kiri en.

8 Ala den bigi man disi ben de Rafasma fu Gat. Ma David nanga den futuboi fu en kiri den.