Yeremia
5 Waka na ini den strati fu Yerusalem.
Luku bun na yu lontu.
Luku na den pren*
efu yu man feni wan sma di e du san reti
èn di e meki muiti fu du san mi wani.
Efu yu feni so wan sma, dan mi o gi a foto pardon.
2 Srefi te den e taki: „Mi e sweri na a libilibi Gado Yehovah!”,
tòg na soso lei den e lei.
3 Yehovah, yu e suku den sma di e du san yu wani.
Yu naki a pipel, ma den no firi noti.*
Yu kiri furu fu den, ma tòg den no leri wan sani.
Den no wani arki yu srefsrefi*
èn den no wani drai kon baka na yu.
4 Mi prakseri: „A musu de so, taki den sma disi na pôtisma di no kisi leri.
Den du don sani, fu di den no sabi den pasi fu Yehovah
nanga den wet fu a Gado fu den.
5 Mi o go na den bigiman fu a kondre fu taki nanga den,
bika mi de seiker taki den sabi a pasi fu Yehovah
nanga den wet fu a Gado fu den.
Ma den alamala broko a tyatyari di Gado poti na den tapu
èn den koti den banti fu en puru.”
6 Dati meki wan lew kmoto na ini a busi èn a dyompo na den tapu.
Wan busdagu fu a sabana nyan den.
Wan penitigri e luru na den foto fu den.
A e priti ala sma di e kmoto na den foto.
Bika den du furu ogri.
Someni leisi den trangayesi Gado.
7 Fa mi kan gi yu pardon fu a sani disi?
Den manpkin fu yu gwe libi mi
èn den e tan sweri na sani di no de Gado srefi.
Mi gi den san den abi fanowdu,
ma tòg den e huru
èn wan lo fu den go na a oso fu wan huru-uma.
8 Leki krasi asi, ibriwan fu den abi a tranga lostu
fu go d’don nanga a frow fu wan tra man.
9 Dati meki Yehovah taki: „Mi no musu aksi den frantwortu fu den sani di den du?
Mi no musu puru atibron na tapu a pipel di e du den sani disi?”
10 „Go koti den droifibon di de na den gron fu Yerusalem,
ma no koti den alamala puru.
Puru den pransun fu en di panya na ala sei,
bika den no de fu Yehovah.
11 Bika den sma fu Israel nanga den sma fu Yuda
drai baka gi mi”, na so Yehovah taki.
Nowan rampu noso angriten o miti wi.
Nowan sma o kon na wi tapu nanga fet’owru.’
13 Den wortu fu den profeiti de leki winti.
A wortu fu Gado no de na ini den ati.
Meki den tron leki den wortu fu den!”
14 Fu dati ede Yehovah, a Gado di e tiri den legre, taki:
„Fu di den e taki a sani disi,
meki mi o taigi yu san yu musu taki.
Den sani di yu musu taki de leki wan faya
èn a pipel disi o de leki udu di a faya o bron.”
15 Yehovah taki: „Luku, un Israelsma!
Mi o meki wan pipel fu farawe kon feti nanga unu.
A pipel disi de someni langa kba, sensi owruten.
Unu no sabi a tongo fu den
èn unu no man ferstan san den e taki.
16 A peirikokro fu den de leki wan grebi di opo.
Den alamala na tranga fetman.
17 Den o nyan den sani di unu prani nanga den tra n’nyan di unu abi.
Den o kiri un manpkin nanga un umapkin.
Den o nyan den skapu nanga den kaw fu unu.
Den o pori den droifibon nanga den figabon fu unu.
Nanga den fetsani fu den, den o pori den tranga foto fu unu, aladi unu ben denki taki den bigi skotu ben o kibri unu.”
18 Yehovah taki: „Srefi na a ten dati, mi no o figi un alamala puru. 19 Te den aksi: ’Fu san ede Yehovah wi Gado du ala den sani disi nanga wi?’ Dan yu musu taigi den: ’Unu gwe libi mi èn unu go dini wan gado fu trakondre sma na ini un eigi kondre. Dati meki unu o tron futuboi fu trakondre sma na ini wan kondre di no de fu unu.’”
20 Taigi den sma fu Yakob
èn ferteri ala sma fu Yuda:
21 „Un don pipel di no abi ferstan,* un arki:
Unu abi ai, ma unu no man si.
Unu abi yesi, ma unu no man yere.
22 Yehovah taki: ’Unu no e lespeki mi
èn unu no e frede mi srefsrefi.
Mi na a sma di poti santi leki wan skotu gi a se.
Noiti a o man psa a skotu dati.
Awinsi o hei den skwala fu en de, tòg den no man abra.
Awinsi fa a se e rigeri, tòg a no o man psa.
23 Ma a pipel disi na wan tranga-ede pipel èn den lobi opo densrefi teige mi.
Den drai baka gi mi èn den e waka den eigi pasi.
24 Den no prakseri srefi:
„Kow sori lespeki gi Yehovah wi Gado,
a sma di e meki alen fadon na a yoisti ten.
A e gi wi alen na a bigin fu a yari èn moro lati na ini a yari.
Na en e meki taki wi man koti n’nyan na spesrutu ten.”
25 Na fu di unu e du ogri, meki den sani disi no e psa moro.
Na fu di unu e sondu, meki unu no e feni bun moro.
26 Bika ogrisma de na mindri mi pipel.
Den e sdon luru neleki sma di e sdon luru fowru fu fanga den.
Den seti wan val fu kiri sma.
Na libisma den e fanga.
27 Neleki wan koi di furu nanga fowru,
na so den oso fu den furu nanga sani di den kisi fu di den bedrigi sma.
Dati meki den kisi furu makti nanga gudu.
28 Den kon fatu èn den skin e brenki.
Den du ogri psa marki.
Na fesi krutu den no e opo taki gi den pkin di no abi p’pa,
so taki den kan feni bun.
Den no wani yepi den pôtiwan na fesi krutu.’”
29 Dati meki Yehovah taki: „Mi no musu aksi den frantwortu fu den sani di den e du?
Mi no musu puru atibron na tapu a pipel di e du den sani disi?
30 Wan bun ogri sani psa na ini a kondre:
31 Den profeiti e taki profeititori di no tru.
Den priester e gebroiki den makti fu basi sma.
Na dati mi pipel lobi.
Ma san unu o du te a kba kon?”