Yeremia
9 Mi winsi taki mi ede ben furu nanga watra,
dan mi ai ben o lon watra ala ten!
Mi ben o krei dei nanga neti,
fu di den kiri den sma fu mi pipel.
2 Mi winsi taki mi ben sabi wan presi na ini a sabana pe sma kan yuru kamra!
Dan mi ben o gwe libi mi pipel èn mi ben o go farawe fu den,
bika den alamala drai baka gi mi.
Den na wan grupu bedrigiman.
3 Den seti den tongo fu taki soso lei neleki fa sma e seti den bo fu sutu trawan.
Den sma na ini a kondre e bedrigi makandra èn nowan sma de eerlijk.
„Den e du a wan ogri baka a trawan
èn den no e poti prakseri na mi srefsrefi”, na so Yehovah taki.
4 „Un alamala, luku bun nanga tra sma
èn no fertrow un brada srefi.
Bika ala un brada na bedrigiman
èn ibri sma e taki ogr’ati lei fu tra sma.
5 Ibri sma e bedrigi trawan
èn nowan sma e taki sani di tru.
Den leri den tongo fu taki soso lei.
Den du ogri teleki den kon weri.
6 Unu e libi na mindri bedrigiman.
Den e lei èn den no wani sabi mi”, na so Yehovah taki.
7 Fu dati ede Yehovah di e tiri den legre taki:
„Mi o smèlter den fu krin den èn mi o ondrosuku den finfini.
Fa mi o man yepi mi pipel efu mi no e du dati?
8 A tongo fu den de leki wan peiri di e kiri sma. Soso lei den e taki.
Nanga den mofo den e winsi bun gi trawan,
ma na ini den ati den wani du den ogri.”
9 Dati meki Yehovah taki: „Mi no musu aksi den frantwortu fu den sani di den du?
Mi no musu puru atibron na tapu a pipel di e du den sani disi?”
10 Mi o bari krei te mi si san psa nanga den bergi
èn mi o singi wan sari singi* te mi si san psa nanga den weigron di de na ini a sabana.
Sma bron den èn nowan sma e waka na ini den.
Nowan b’bari fu meti di den e kweki de fu yere.
Ala den fowru na loktu nanga den tra meti lowe. Den alamala gwe.
11 Mi o meki Yerusalem tron wan ipi ston èn wan presi pe sabanadagu e tan.
Mi o meki den foto fu Yuda tron brokopresi pe nowan sma e tan.
12 Suma koni nofo fu man ferstan disi?
Nanga suma Yehovah taki, so taki a kan tyari a boskopu dati gi trawan?
Fu san ede a kondre kon pori?
Fu san ede a kon drei leki wan sabana
pe nowan sma e waka?”
13 Dan Yehovah taki: „Den sani disi psa fu di den no du san a wet* fu mi taki, den no arki mi èn den no hori densrefi na a wet fu mi. 14 Ma den tan du nomo san den eigi ati wani. Den anbegi den Bâal-popki soleki fa den bigisma fu den leri den. 15 Fu dati ede Yehovah di e tiri den legre, a Gado fu Israel, taki: ’Mi o meki a pipel disi nyan fu wan bita bon èn mi o meki den dringi watra di abi vergif. 16 Mi o panya den na mindri pipel di den nanga den bigisma fu den no sabi. Mi o seni wan fet’owru na den baka teleki mi kiri den alamala.’
17 Yehovah di e tiri den legre taki:
’Un musu tyari unsrefi na wan koni fasi.
Kari den uma kon di e singi sari singi.*
Iya, kari den uma di sabi singi den sari singi, meki den kon.
18 Meki den kon es’esi fu singi sari singi gi wi èn fu bari krei.
Dan wi ai o lon watra,
iya, watra o kmoto na den ai fu wi.
19 Na ini Sion sma e bari krei.
Den e taki: „Luku fa den pori ala sani fu wi!
Wi kisi bigi syen!
Bika den puru wi na ini a kondre èn den broko den oso fu wi.”
20 Un uma, arki san Yehovah e taki.
Poti yesi arki en.
Un musu leri un umapkin fa fu singi a sari singi* disi.
Meki ibri uma leri wan trawan a sari singi disi.
21 Bika dede psa a fensre kon na ini wi oso.
A kon na ini den tranga toren fu wi.
A kon fu kiri den pkin na strati
nanga den yongu man na den pren.’*
22 Taigi den: ’Disi na san Yehovah taki:
„Den dedeskin fu den sma o d’don na gron leki mest.
Den o de leki aleisi di sma koti na den gron,
ma nowan sma de fu tyari den kon na wán.”’”
23 Yehovah taki:
„Den koniman no musu meki bigi fu di den koni.
Den sma di abi makti no musu meki bigi fu di den abi makti.
Den guduman no musu meki bigi fu di den abi furu gudu.”
24 „Ma efu wan sma wani meki bigi, dan meki a du dati
fu di a abi koni nanga sabi fu mi.
A sabi taki mi, Yehovah, na a sma di e sori sma bun-ati,* a sma di e krutu sani na wan reti fasi èn a sma di e du san reti na grontapu.
Na den sani disi mi lobi”, na so Yehovah taki.
25 Yehovah taki: „Wan ten o kon te mi o krutu ala den sma di besnèi, ma di e libi leki den no besnèi. 26 Mi o krutu Egepte, Yuda, Edom, den Amonsma, Moab nanga ala sma di koti den w’wiri na den sei-ede èn di e tan na ini a sabana. Bika nowan fu den pipel disi besnèi èn nowan fu den sma fu Israel krin den ati.”*