Yeremia

7 Yehovah taigi Yeremia: 2 „Go tnapu na a portu fu na oso fu Yehovah, dan yu taki den sani disi: ’Ala un sma fu Yuda di e psa den portu disi fu go boigi gi Yehovah, arki san Yehovah abi fu taki. 3 Yehovah di e tiri den legre, a Gado fu Israel, taki: „Meki den pasi fu unu kon reti èn du san bun, dan mi o meki unu tan libi na a presi disi. 4 No taki: ’Disi* na a tempel fu Yehovah, a tempel fu Yehovah, a tempel fu Yehovah!’, soso fu di unu e bribi den lei di trawan e taki. 5 Un musu meki den pasi fu unu kon reti èn un musu du san bun. Un musu krutu sani na wan reti fasi te wan man tyari wan trawan kon na fesi krutu. 6 Un no musu pina den trakondre sma di e tan na un mindri, den pkin di no abi p’pa nanga m’ma* èn den uma di den masra dede kba. Un no musu kiri sma di no du nowan ogri. Un no musu anbegi tra gado, bika den o tyari soso ogri gi unu. 7 Efu unu e du san mi taki, dan fu ala ten* mi o meki unu libi na ini a kondre disi di mi ben gi den afo fu unu.”’”

8 „Unu e bribi den lei di trawan e taki. Ma unu no o kisi nowan wini fu dati. 9 Unu e fufuru, unu e kiri, unu e waka gi un trowpatna, unu e lei te unu e meki sweri, unu e tyari ofrandi* gi Bâal èn unu e anbegi tra gado di unu no ben sabi. 10 Dan fa unu kan kon tnapu na mi fesi na ini na oso disi di e tyari mi nen? Fa unu kan taki: ’Wi o kisi ferlusu’, aladi unu e du den ogri disi? 11 Na oso disi e tyari mi nen, ma unu e si en leki wan presi pe fufurman e tan. Nanga mi eigi ai mi si san unu du”, na so Yehovah taki.

12 „’Ma go na mi oso na Silo pe sma ben e kari mi nen fosi, dan un luku san mi du nanga en, fu di mi pipel Israel ben e du ogri. 13 Mi tan taki nanga unu fu di unu ben e du ala den sani disi’, na so Yehovah taki. ’Ala yuru mi ben taki nanga unu,* ma unu no ben arki. Mi tan kari unu, ma unu no ben piki mi. 14 Unu ben denki taki noti no ben o psa nanga unu fu di na oso disi e tyari mi nen èn fu di mi ben gi unu nanga den afo fu unu a presi disi. Ma now mi o du a srefi sani nanga na oso disi èn nanga a presi disi leki san mi ben du nanga Silo. 15 Mi o trowe unu puru na mi fesi, neleki fa mi trowe ala un brada, den bakapkin fu Efrayim.’

16 Ma yu* no musu begi gi a pipel disi. Yu no musu bari suku yepi gi den, yu no musu begi gi den èn yu no musu aksi mi fu yepi den, bika mi no o arki yu. 17 Yu no e si san den e du na ini den foto fu Yuda èn na den strati fu Yerusalem? 18 Den manpkin e go suku udu, den p’pa e leti a faya èn den frow fu den e masi blon fu meki kuku di den o tyari leki ofrandi gi na Umakownu fu hemel.* Den e tyari dringi-ofrandi gi tra gado fu du wan hati sani nanga mi. 19 Yehovah taki: ’Na mi den denki fu du wan hati sani?* A no den srefi den e du? Na den e kisi syen.’ 20 Fu dati ede a Moro Hei Masra Yehovah taki: ’Luku! Mi o kanti mi bigi atibron na tapu a presi disi. A o kon na tapu den libisma nanga den meti èn na tapu den froktubon nanga den tra sani di e gro na den gron. A o de leki wan faya di o bron èn nowan sma o man kiri en.’

21 Yehovah di e tiri den legre, a Gado fu Israel, taki: ’Tyari den heri bron-ofrandi nanga den srakti-ofrandi fu unu kon makandra, dan unu srefi nyan den. 22 Di mi tyari den afo fu unu kmoto na ini a kondre Egepte, mi no ben taigi den noti fu bron-ofrandi nanga srakti-ofrandi èn mi no ben gi den nowan wet di abi fu du nanga den sani disi. 23 Ma mi ben taigi den: „Efu un arki mi, dan mi o tron un Gado èn unu o tron mi pipel. Efu unu e waka ala den pasi di mi e taigi unu fu waka, dan sani o go bun nanga unu.”’ 24 Ma den no arki èn den no du san mi taki. Na presi fu dati den du san den wani, den ben tranga-ede èn den ben abi wan takru ati. Dati meki den go na baka èn den no go na fesi. 25 Na disi unu du sensi di den afo fu unu kmoto na Egepte te na a dei fu tide. Ala ten mi seni mi futuboi, den profeiti, gi unu. Ibri dei baka mi ben seni den kon na unu.* 26 Ma nowan sma ben wani arki mi èn nowan sma ben du san mi taki. Den ben tranga-ede* èn den ben ogri moro den afo fu den!

27 Yu musu taigi den ala den sani disi, ma den no o arki yu. Yu musu kari den, ma den no o piki yu. 28 Yu musu taigi den: ’Disi na a pipel di no wani arki Yehovah, a Gado fu den. Den no wani teki leri. Nowan sma e du san Gado wani. Den no e taki srefi dati den wani du san Gado wani.’*

29 Koti un langa w’wiri* puru, dan un trowe en gwe. Singi wan sari singi* na tapu den bergi, bika Yehovah ati bron nanga a pipel disi. A drai baka gi den èn a gwe libi den. 30 ’Bika den sma fu Yuda du sani di mi no feni bun’, na so Yehovah taki. ’Den pori na oso di e tyari mi nen, fu di den poti den fisti gado fu den drape. 31 Na Tofet, di de na Hinom-lagipresi,* den bow hei presi pe den ben e anbegi falsi gado. Drape den bron den manpkin nanga den umapkin fu den na ini faya. Noiti mi ben taigi den fu du dati. So wan sani no ben kon na ini mi prakseri* srefi.’

32 Yehovah taki: ’Fu dati ede wan ten o kon te sma no o kari a presi disi Tofet moro noso Hinom-lagipresi.* Na presi fu dati den o kari en a lagipresi pe den e kiri sma. Den o beri so furu sma na Tofet taki presi no o de moro. 33 Den busmeti na grontapu nanga den fowru na loktu o nyan den dedeskin fu a pipel disi èn nowan sma o yagi den gwe. 34 Mi o sorgu taki nowan prisiri b’bari o de fu yere na ini den foto fu Yuda èn na den strati fu Yerusalem. Iya, nowan sma o yere a sten fu wan sma di e prisiri, a sten fu wan trowmasra, noso a sten fu wan trowmisi, bika a kondre o tron wan brokopresi.’”