Yeremia
16 Baka dati Yehovah taigi mi: 2 „Yu no musu teki wan frow èn yu no musu kisi manpkin nanga umapkin na a presi disi. 3 Bika Yehovah taki wan sani fu den manpkin nanga den umapkin di gebore dya èn fu den m’ma nanga p’pa di abi pkin na ini a kondre disi. A taki: 4 ’Takru siki o kiri den, ma nowan sma o row gi den èn nowan sma o beri den. Den o tron leki mest na tapu a gron. Sma o kiri den nanga fet’owru, den o dede fu angri èn den dedeskin fu den o tron n’nyan gi den fowru na loktu èn gi den busmeti na grontapu.’
Yehovah taki: ’Mi no o meki sani waka bun gi a pipel disi moro.
Mi no o sori den bun-ati* nanga sar’ati.
6 Den alamala o dede. Iya, den pkinwan nanga den bigiwan o dede na ini a kondre disi.
Sma no o beri den.
Nowan sma o row gi den,
den no o kotkoti den skin gi den èn den no o krebi den ede gi den.*
7 Nowan sma o tyari n’nyan
fu trowstu den sma di e row gi den dedewan.
Nowan sma o tyari wan sani fu dringi
fu trowstu den sma di e row gi den p’pa nanga m’ma.
8 No go na ini wan oso pe fesa e hori
èn no sdon nanga den fu nyan èn dringi.’
9 Bika Yehovah di e tiri den legre, a Gado fu Israel, taki: ’Na ini a ten fu unu, mi o meki unu si taki nowan sma o prisiri na ini a presi disi. Unu no o yere fa sma e meki prisiri èn unu no o yere a sten fu wan trowmasra, noso a sten fu wan trowmisi.’
10 Te yu taigi a pipel disi ala den sani disi, den o aksi yu: ’Fu san ede Yehovah taki dati so wan bigi rampu o miti wi? Sortu ogri noso sondu wi du teige Yehovah wi Gado?’ 11 Dan yu musu taigi den: ’Yehovah taki: „A rampu disi o miti unu, fu di un afo gwe libi mi. Den go waka baka tra gado, den dini den èn den boigi gi den. Iya, den gwe libi mi èn den no hori densrefi na mi wet. 12 Ma unu du moro ogri leki un afo. Ibriwan fu unu e du san en ogri ati wani, na presi fu du san mi taki. 13 Dati meki mi o fringi unu puru na ini a kondre disi, dan unu o abi fu go na ini wan kondre di unu nanga den afo fu unu no ben sabi. Drape unu o abi fu dini tra gado dei nanga neti, bika mi no o du bun gi unu.”’
14 Yehovah taki: ’Ma wan ten o kon te sma no o taki moro: „Mi e sweri na a libilibi Gado Yehovah di tyari den Israelsma kmoto fu a kondre Egepte!” 15 Na presi fu dati den o taki: „Mi e sweri na a libilibi Gado Yehovah di tyari den Israelsma kmoto fu a kondre fu noordsei èn fu ala den kondre pe a ben yagi den go!” Mi o tyari den kon baka na a kondre fu den di mi ben pramisi den afo fu den.’
16 Yehovah taki: ’Luku, mi o seni furu fisiman
fu go fanga den leki fisi.
Dan mi o seni furu ontiman
fu go onti den na ibri bergi, na ibri pkin bergi
èn na ini ibri bergi-olo.
17 Bika mi e si ala den sani di den e du.*
Den no kibri gi mi.
Mi eigi ai si ala ogri di den e du.
18 A fosi sani di mi o du, na fu pai den gi ala den ogri nanga den sondu di den du.
Den pori mi kondre nanga den popki fu den fisti gado fu den.
Den furu mi kondre nanga den morsu sani fu den.’”
19 Yehovah, yu na mi krakti èn mi fortresi.*
Yu na a presi pe mi e lon go te mi de na nowtu.
Na yu den pipel fu den moro fara presi fu grontapu o kon.
Dan den o taki: „Den afo fu wi ben abi falsi gado di no warti noti.
Den no ben feni nowan wini fu den.”
20 Libisma e meki gado,
ma den gado dati na noti.
21 „Fu dati ede mi o meki den kon sabi mi.
Disi leisi mi o meki den si o tranga mi de èn omeni makti mi abi.
Den o sabi taki mi nen na Yehovah.”