Maleaki

4 Yehovah di e tiri den legre taki: „Luku! A dei e kon di faya leki wan onfu. Ala den heimemre sma nanga ala den sma di e du ogri o kon de leki drei grasi. A dei di e kon o bron den gwe, so taki nowan rutu noso taki fu den tan abra. 2 Ma gi unu di e sori lespeki gi* mi nen, a son fu retidu o skèin. A leti fu en* o dresi sma. Dan unu o dyompo fu prisiri leki fatu yongu kaw.”

3 „Unu o trapu na tapu den ogrisma, bika den o de leki stof na ondro un futu na a dei te mi o du den sani disi”, na so Yehovah di e tiri den legre taki.

4 „Memre den wet di mi gi mi futuboi Moses na Horeb fu gi heri Israel. Memre den besroiti fu mi nanga ala den sani di mi taigi unu fu du.

5 Mi o seni a profeiti Elia gi unu, fosi a bigi dei fu Yehovah doro, te sma o frede srefsrefi. 6 A o meki na ati fu den p’pa kon de leki di fu den boi èn a o meki na ati fu den boi kon de leki di fu den p’pa. Efu den no kenki, dan mi o kon fu naki grontapu èn fu pori en.”