Yob
32 Ne den dri man no piki Yob noti moro, bika a ben feni nomonomo taki en na wan bun sma.* 2 Ma wan tra man ben de drape tu di ben nen Elihu. A ben de a manpkin fu a Bus-sma Barakel fu a famiri fu Ram. Elihu ati bron nanga Yob, fu di Yob ben wani sori den taki na en abi leti na presi fu Gado. 3 Elihu ati bron tu nanga den dri mati fu Yob, fu di den no ben sabi fa fu piki Yob èn den ben taki dati Gado ogri. 4 Elihu ben wakti fu taki nanga Yob, fu di ala den man drape ben owru moro en. 5 Di Elihu si taki den dri man no ben abi noti moro fu taki, en ati bron srefsrefi. 6 Ne Elihu, a manpkin fu a Bus-sma Barakel, taki:
„Mi yongu*
èn unu owru.
Dati meki mi no kon na un mindri.
Mi ben frede fu ferteri unu san mi sabi.
7 Mi prakseri: ’Meki den wan di owru moro mi taki.
Meki den wan di libi langa moro mi, gi koni rai.’
8 Ma na a santa yeye di Gado e gi sma
nanga a blo fu na Almaktiwan, e gi sma sabi.
10 Dati meki mi e taki: ’Arki mi,
dan mi o ferteri san mi sabi.
11 Mi wakti teleki unu kba taki.
Mi tan arki fa unu e denki.
Mi wakti a heri pisi ten di unu ben e prakseri san unu ben o piki.
12 Mi arki bun san unu taki,
ma nowan fu unu ben man sori Yob taki a fowtu.*
Nowan fu unu piki Yob wan bun sani.
13 Fu dati ede un no musu taki: ’Wi na koniman.’
Un no musu taki: ’A no libisma, ma na Gado e strafu en.’
14 Yob no taigi mi nowan sani.
Sobun, mi no o piki en leki fa unu piki en.
15 Den man disi bruya. Den no e piki moro.
Den no abi noti fu taki moro.
16 Mi wakti, ma den no e taki.
Den e tnapu nomo, ma den no e piki nowan sani.
17 Dati meki mi o piki unu now.
Mi srefi o taki san mi sabi.
18 Bika mi abi furu fu taki.
Na Gado yeye e meki taki mi musu taki.
19 Mi inbere span.
A de leki wan nyun winsaka di furu nanga win èn di wani priti opo.
20 Sobun, meki mi taki, so taki mi ati kon kowru!
Mi o opo mi mofo fu piki unu.