A di fu tu brifi gi den Korentesma
6 Leki sma di e wroko makandra nanga en, wi e begi unu fu tan hori na prakseri fu san ede Gado sori unu bun-ati. 2 Bika a e taki: „Na wan ten di mi feni bun mi o yere yu èn na wan dei fu frulusu mi o yepi yu.” Luku, disi na a spesrutu ten di mi feni bun. Luku, disi na a dei fu frulusu.
3 Na nowan fasi wi e du sani di e meki trawan fadon, so taki sma no sa taki takru fu a diniwroko fu wi. 4 Ma na ala fasi wi e sori taki wi na dinari fu Gado te wi e horidoro aladi furu tesi e miti wi, te wi e kisi banawtu, te wi de na nowtu, te wi e kisi problema, 5 te wi e kisi fonfon, te wi de na strafu-oso, te dyugudyugu de, te wi musu wroko tranga, te wi no man sribi na neti èn te wi no abi nyanyan. 6 Wi e sori taki wi na dinari fu Gado te wi e libi wan krin libi, te wi abi sabi, te wi e horidoro nanga pasensi, te wi abi switifasi, te wi abi santa yeye, te wi lobi sma sondro fu hoigri, 7 te wi e taki sani di tru èn te wi kisi a krakti fu Gado. Wi e sori disi tu te wi e hori den fetisani fu du san reti na ini wi reti-anu èn na ini wi kruktu-anu, 8 te wi e kisi grani nanga syen èn te sma e taki takru sani nanga bun sani fu wi. Sma e si wi leki bedrigiman aladi ala ten wi e taki san tru. 9 Den e si wi leki sma di den no sabi aladi Gado sabi wi heri bun. Den feni taki wi musu dede, ma toku wi de na libi ete. Wi kisi fonfon, ma toku wi no dede. 10 A gersi leki wi de nanga sari, ma toku wi e prisiri ala ten. A gersi leki wi na pôti sma, ma toku wi e meki furu sma kon gudu. A gersi leki wi na sma di no abi noti, ma toku wi abi ala sani.
11 Un Korentesma, wi taki krin nanga unu èn wi opo wi ati gi unu. 12 Wi e sori unu taki wi lobi unu, ma unu no e sori taki unu lobi wi. 13 Fu dati ede mi e taki nanga unu neleki unu na mi pikin. Unu srefi musu opo un ati moro gi wi.
14 No kon de wán nanga sma di no de na bribi.* Bika san retidu abi fu du nanga kruktudu? Noso san leti abi fu du nanga dungru? 15 Sosrefi, san Krestes abi fu du nanga Belial? Noso san wan sma di de na bribi abi fu du nanga wan sma di no de na bribi? 16 San a tempel fu Gado abi fu du nanga falsi gado? Bika wi na wan tempel fu wan libilibi Gado, soleki fa Gado ben taki: „Mi o tan na den mindri èn mi o waka na den mindri. Mi o de a Gado fu den èn den o de a pipel fu mi.” 17 „’Fu dati ede, komoto na den mindri èn prati nanga den’, na so Yehovah taki. ’No fasi den sani moro di no krin’”, „’èn mi o teki unu.’” 18 „’Mi o de un papa èn unu o de mi manpikin nanga mi umapikin’, na so Yehovah na Almaktiwan taki.”