Psalm
71 Yehovah, na yu mi lon kon kibri.
No meki mi kisi syen noiti.
2 Ferlusu mi èn kibri mi fu di yu na wan Gado di e du san reti.
Poti yesi arki* mi èn yepi mi.
Taigi sma fu kon yepi mi,
bika yu na mi stonbergi èn mi fortresi.*
4 Mi Gado, puru mi na a anu fu den ogrisma.
Puru mi na a anu fu den sma di no e du san reti èn di e pina mi.
5 Moro Hei Masra Yehovah, na yu e gi mi howpu.
Tapu yu mi e fertrow sensi di mi yongu.
6 Tapu yu mi fertrow sensi di mi gebore.
Yu na a sma di puru mi na ini mi m’ma bere.
Na yu mi e prèise ala ten.
7 Furu sma ferwondru di den si san psa nanga mi.
Ma yu na mi tranga fortresi.
8 Nanga mi mofo mi e prèise yu.
Heri dei mi e gi yu glori.
9 No trowe mi gwe te mi kon owru.
No gwe libi mi te mi e kon swaki.
10 Mi feanti e taki mi tori
èn den sma di e suku fu kiri mi, kon makandra fu taki san den o du nanga mi.
11 Den e taki: „Gado gwe libi en.
Hari go na en baka èn grabu en, fu di nowan sma de fu yepi en.”
12 Gado, no tan farawe fu mi.
Mi Gado, kon yepi mi es’esi.
13 Meki den sma di e gens mi
kisi syen èn meki den dede.
Meki den sma di wani taki ogri miti mi
kisi syen èn meki den fesi fadon.
14 Ma mi fu mi sei o tan wakti yu.
Mi o prèise yu moro leki fosi.
15 Mi mofo o taki fu den reti sani di yu du.
Heri dei mi o taki fa yu ferlusu mi,
aladi mi no man teri omeni leisi yu du dati.
16 Moro Hei Masra Yehovah,
mi o ferteri sma fu a bigi makti fu yu.
Mi o ferteri den fu a retidu fu yu, iya, a retidu fu yu w’wan.
17 Mi Gado, yu gi mi leri sensi di mi ben yongu
èn te now ete mi e ferteri sma fu den bigi sani di yu du.
18 Mi Gado, awinsi mi kon owru èn awinsi ala mi ede-w’wiri kon weti, no gwe libi mi.
Gi mi na okasi fu ferteri den sma di musu kon ete fu a krakti* fu yu.
Iya, gi mi na okasi fu ferteri ala den sma di musu kon ete fu a bigi makti fu yu.
20 Yu gi pasi taki furu nowtu nanga ogri miti mi.
Ma mi e begi yu fu gi mi krakti baka.
Puru mi na ini den moro dipi olo* fu grontapu.
21 Meki mi kisi moro grani.
Lontu mi èn trowstu mi.
22 Dan mi o prei poku fu prèise yu, mi Gado,
fu di ala ten yu e du san yu pramisi.
Santawan fu Israel,
mi o prei harpu èn mi o singi fu prèise yu.
23 Mi o bari fu prisiri te mi e singi prèisesingi gi yu,
fu di yu kibri mi libi.