A brifi fu Yakobus

4 San e meki taki unu e feti èn taki unu e strei nanga makandra? A no den tranga lostu fu unu di e feti na ini un sondu skin, e meki unu du dati? 2 Unu e angri fu sani, ma toku unu no abi noti. Unu e tan kiri sma èn unu e tan abi bigi-ai, ma toku unu no man kisi noti. Unu e tan strei èn unu e tan feti. Unu no abi noti, fu di unu no e aksi Gado. 3 Te unu e aksi, dan unu no e kisi noti, bika unu e aksi nanga takru prakseri, fu di unu wani plisi den tranga lostu fu unu.

4 Un sutaman, unu no sabi taki te wan sma de wan mati fu grontapu, dan a de wan feanti fu Gado? Fu dati ede, iniwan sma di wani de wan mati fu grontapu, e meki ensrefi kon tron wan feanti fu Gado. 5 Noso unu e denki taki na fu soso Gado Buku e taki: „Na fu di wi alamala e dyarusu son tron, meki wi abi a gwenti fu angri fu ala sortu sani”? 6 Ma a bun-ati di Gado e sori wi, moro bigi. Fu dati ede Gado Buku taki: „Gado e kakafutu gi den wan di abi heimemre, ma a e sori bun-ati gi den sma di abi sakafasi.”

7 Sobun, saka unsrefi na ondro Gado. Ma kakafutu gi Didibri èn a o lon gowe fu unu. 8 Kon krosibei na Gado èn a o kon krosibei na unu. Un sondari, krin un anu èn unu di e degedege, krin un ati. 9 Un musu firi brokosaka, un musu sari èn un musu krei. Na presi fu lafu, un musu sari èn na presi fu prisiri, un musu lasi-ati. 10 Saka unsrefi na fesi Yehovah èn a o hei unu.

11 Un brada, no taki ogri moro fu makandra. A sma di e taki ogri fu wan brada, noso di e krutu en brada, e taki ogri fu a wèt èn a e krutu a wèt. Efu yu e krutu a wèt, dan yu a no wan sma di e du san a wèt e taki, ma yu na wan krutuman. 12 Wán sma nomo de di e meki wèt èn di de krutuman, iya, a wan di man frulusu sma èn di man kiri sma. Ma yu, suma na yu fu krutu tra sma?

13 We dan, arki. Unu e taki: „Tide noso tamara wi o go na a foto dati, wi o tan wan yari drape, wi o du bisnis èn wi o meki moni.” 14 Ma unu no sabi fa a libi fu unu o de tamara, bika unu de leki dow di e kon de fu si fu wan syatu pisi ten nomo èn baka dati a no de fu si moro. 15 Na presi fu dati, un musu taki: „Efu Yehovah wani, dan wi o de na libi èn wi o du disi noso dati.” 16 Ma now unu lobi meki bigi, fu di unu e denki tumusi furu fu unsrefi. A meki di unu e meki bigi na so wan fasi, na wan ogri sani. 17 Fu dati ede, efu wan sma sabi fa fu du bun, ma toku a no e du dati, dan na wan sondu a du.