Tori fu den apostel

17 Baka di den waka psa na ini Amfipolis nanga Apolonia, den doro na ini Tesalonika pe wan snoga fu den Dyu ben de. 2 Soleki fa Paulus ben gwenti, dan a go na ini a snoga. Dri Sabat-dei a taki-go-taki-kon nanga den sma drape fu Gado Buku. 3 A ferklari Gado Buku gi den èn a sori den krin taki Krestes ben musu pina èn taki a ben musu kisi wan opobaka. A taki: „Yesus na a Krestes. Na fu en mi e ferteri unu.” 4 Di den sma yere disi, dan wan tu fu den tron bribiman èn den bigin waka nanga Paulus nanga Silas. Wan bigi grupu Grikisma di ben anbegi Gado èn furu prenspari uma bigin waka nanga den tu.

5 Ma fu di son Dyu kon dyarusu, meki den tyari wan tu ogriman di ben gwenti fu anga-anga na w’woyo kon makandra, dan den taigi den fu meki dyugudyugu na ini a foto. Den broko go na ini na oso fu Yason fu suku Paulus nanga Silas, so taki den ben kan tyari den go na dorosei pe den ip’ipi sma ben de. 6 Di den no feni den, den srepi Yason nanga wan tu tra brada tyari go gi den tiriman fu a foto èn den bari: „Den man di e bruya sma* na heri grontapu kon dyaso tu, 7 èn Yason meki den tan na en oso. Ala den man disi e psa den wet fu Grankownu, fu di den e taki dati wan tra kownu de di nen Yesus.” 8 Di den ip’ipi sma nanga den tiriman fu a foto yere den sani disi, den skreki. 9 Ne den meki Yason nanga den trawan pai wan butu, dan den meki den gwe.

10 A srefi neti dati, den brada seni Paulus nanga Silas go na Bereya. Di den doro drape, den go na ini a snoga fu den Dyu. 11 Den sma fu Bereya no ben de leki den sma fu Tesalonika. Den ben de klarklari fu teki leri, bika den ben teki a wortu nanga den heri ati èn den ben e ondrosuku Gado Buku finfini ibri dei fu si efu den sani di den yere tru. 12 Fu dati ede furu fu den tron bribiman. Furu prenspari Griki uma nanga man tron bribiman tu. 13 Ma di den Dyu fu Tesalonika kon sabi taki Paulus ferteri den sma na Bereya a wortu fu Gado tu, dan den go drape fu meki dyugudyugu èn fu bruya den sma. 14 Wantewante den brada seni Paulus go na sesyoro, ma Silas nanga Timoteyus tan na baka. 15 Den sma di ben go nanga Paulus tyari en go te na Ateine. Baka di Paulus taigi den fu gi Silas nanga Timoteyus a boskopu fu kon na en wantewante, den gwe.

16 Di Paulus ben e wakti den na ini Ateine, a si taki a foto ben lai popki di sma ben e anbegi leki gado. A no ben lobi a sani dati srefsrefi. 17 Fu dati ede a bigin taki nanga den Dyu na ini a snoga èn nanga den tra sma di ben e anbegi Gado. Ibri dei a ben e taki tu nanga den sma di a ben e miti na w’woyo. 18 Ma wan tu fu den Epikurus koniman* nanga den Stoisi koniman* bigin hartaki nanga en èn sonwan fu den ben taki: „Sortu lawlaw sani a man disi wani ferteri wi?” Trawan taki: „A gersi leki a e taki fu tra gado di wi no sabi.” Den ben taki dati, fu di Paulus ben e ferteri sma a bun nyunsu fu Yesus èn fu na opobaka. 19 Fu dati ede den tyari en go na a Areopagus* èn den taigi en: „Yu kan ferteri wi san na den nyun sani disi di yu e leri sma? 20 Noiti wi yere fu den sani disi. Wi wani sabi san den wani taki.” 21 A ben de so, taki den sma fu Ateine nanga den trakondre sma di ben tan drape,* ben abi a gwenti fu ferteri èn arki nyun tori te den no ben abi noti fu du. 22 Paulus ben go tnapu na mindrisei fu na Areopagus, dan a taki:

„Sma fu Ateine, mi e si taki unu abi lespeki gi den gado moro leki tra sma.* 23 Di mi ben e waka psa, mi teki mi ten luku den sani di unu e anbegi èn mi si wan altari srefi pe skrifi: ’Altari fu wan gado di wi no sabi.’ We, na fu a Gado disi di unu e anbegi sondro taki unu sabi en, mi e ferteri unu. 24 A Gado di meki grontapu nanga ala sani na en tapu, na en na Masra fu hemel nanga grontapu. A no e tan na ini tempel di libisma meki. 25 A no abi libisma fanowdu fu sorgu en tu, bika na en e gi ala sma libi, na en e meki den bro èn na en e gi den ala sani. 26 Fu wán sma nomo a meki ala tra sma fu libi na heri grontapu. Na en e besroiti san na a yoisti ten te sani musu psa èn na en e besroiti pe sma o tan. 27 Gado wani taki sma musu suku en. Efu den e du muiti fu suku en, den o feni en trutru, bika a no de fara fu nowan fu wi. 28 Na en meki taki wi de na libi, taki wi e beweigi èn taki wi de. A de leki fa sonwan fu un eigi puwema-skrifiman taki: ’Bika wi na pkin fu en tu.’

29 Fu di wi na pkin fu Gado, meki wi no musu denki taki Gado de leki wan sani di meki fu gowtu, solfru, noso ston. A no de leki wan popki tu di libisma meki nanga den eigi koni. 30 Fosi, Gado no ben poti prakseri na den sani disi di sma ben du sondro fu sabi. Ma now a e taigi ala libisma na ala sei taki den musu abi berow. 31 Bika a poti wan dei fu krutu ala sma na grontapu na wan reti fasi èn a gi wan man a wroko fu du dati. Ala sma kan de seiker taki a sani disi o psa, fu di a gi a man disi wan opobaka.”

32 We, di den yere taki sma o kisi wan opobaka, dan wan tu fu den bigin meki spotu. Ma trawan taki: „Wan tra leisi yu musu ferteri wi moro fu a tori disi.” 33 Ne Paulus gwe libi den. 34 Ma sonwan fu den sma bigin waka nanga en èn den tron bribiman. Yu ben abi Dionisiyus, wan krutuman fu a krut’oso fu na Areopagus, wan uma di nen Damaris nanga tra sma.