Yohanes e fruteri
5 Baka dati den Dyu ben abi wan fesa èn Yesus go na Yerusalem. 2 Na ini Yerusalem na skapu-portu, wan watra-olo de nanga feifi gadri na en lontu. Na ini Hebrewtongo den e kari a presi disi Betsata. 3 Wan lo siki sma, breni sma, lan sma, nanga malengri sma ben e didon drape. 4 —— 5 Wan man ben de drape tu di ben siki dritenti nanga aiti yari kaba. 6 Fu di Yesus si a man e didon drape èn a ben sabi taki a ben siki langa kaba, meki a taigi a man: „Yu wani kon betre?” 7 A siki man piki en: „Masra, mi no abi nowan sma fu tyari mi go na ini a watra te a e seki èn te mi wani go, wan tra sma e saka go fosi mi na ini a watra.” 8 Yesus taigi en: „Opo teki yu bedi èn waka.” 9 Wantewante a man kon betre, a teki en bedi, èn a bigin waka.
A dei dati ben de wan Sabat-dei. 10 Fu dati ede den Dyu taigi a man di ben kon betre: „Disi na wan Sabat-dei, èn a no fiti taki yu e tyari a bedi.” 11 Ma a man piki den: „Na a sma di meki mi kon betre taigi mi: ’Teki yu bedi èn waka.’” 12 Den aksi en: „Suma na a sma di taigi yu: ’Teki yu bedi èn waka’?” 13 Ma a man di ben kon betre, no ben sabi suma na a sma, bika Yesus ben gowe kaba fu di wan lo sma ben de drape.
14 Baka dati, Yesus kon miti a man na ini a tempel èn a taigi en: „Luku, yu kon betre. No du sondu moro, so taki wan moro bigi ogri no pasa nanga yu.” 15 A man gowe èn a go taigi den Dyu taki na Yesus meki a kon betre. 16 Na fu dati ede den Dyu bigin frufolgu Yesus, fu di a ben du den sani disi na Sabat-dei. 17 Ma a piki den: „Mi Tata tan wroko teleki now èn mi srefi e tan wroko tu.” 18 Na fu a sani disi ede meki den Dyu du moro muiti fu kiri en. Den ben feni taki a no e hori Sabat-dei èn taki a meki ensrefi kon tron neleki Gado, fu di a ben taki dati Gado na en Tata.
19 Fu dati ede Yesus piki den: „Fu tru, mi e taigi unu: A Manpikin no man du noti fu ensrefi, ma a e du soso san a si a Tata e du. Bika ala sani di a e du, na dati a Manpikin e du tu na a srefi fasi. 20 Bika a Tata lobi a Manpikin, èn a Tata e sori a Manpikin ala sani di en srefi e du. A o sori en moro bigi wroko srefi leki den wan disi, so taki unu o fruwondru. 21 Bika neleki fa a Tata e gi sma wan opobaka èn a e meki den kon na libi baka, na so a Manpikin e gi libi baka na suma a wani. 22 Bika a Tata no e krutu nowan sma. Ma a meki a Manpikin du ala a wroko fu krutu sma, 23 so taki ala sma kan gi a Manpikin grani neleki fa den e gi a Tata grani. A sma di no e gi a Manpikin grani, no e gi grani tu na a Tata di seni a Manpikin kon. 24 Fu tru mi e taigi unu: Efu wan sma yere san mi taki èn a e bribi a sma di seni mi kon, dan a o kisi têgo libi èn a Manpikin no o krutu en. A no o de leki wan dede sma, ma leki wan sma di kon na libi.
25 Fu tru mi e taigi unu: A yuru o kon èn a de nownow kaba taki den dede sma o yere a sten fu a Manpikin fu Gado èn den wan di poti prakseri, o kon na libi. 26 A Tata abi a makti fu gi libi èn a gi a Manpikin a makti tu fu gi libi. 27 A gi a Manpikin a makti fu krutu sma, bika en na a Manpikin fu libisma. 28 No fruwondru fu disi, bika a yuru o kon te ala den sma di de na ini den grebi* o yere en sten 29 èn den o komopo drape. Den sma di du bun sani, o opo baka fu kisi libi èn den sma di du takru sani, o opo baka fu kisi krutu. 30 Mi no man du noti fu misrefi. Mi e krutu sma leki fa Gado taigi mi èn mi e krutu sma na wan reti fasi, bika mi no e du san misrefi wani, ma mi e du a wani fu a sma di seni mi kon.
31 Efu na mi wawan e taki fu misrefi, dan a sani di mi taki, no tru. 32 Wan tra sma e taki fu mi, èn mi sabi taki a sani di a e taki fu mi, tru. 33 Unu seni sma go na Yohanes èn a fruteri suma mi de trutru. 34 Mi no abi libisma fanowdu fu taki fu mi, ma mi e taki den sani disi, so taki unu kan feni frulusu. 35 A man dati ben de wan lampu di leti èn di e skèin krin, èn wan syatu pisi ten unu ben breiti nanga a leti di a ben e skèin. 36 Ma mi e taki fu sani di bigi moro leki den sani di Yohanes taki, bika na den wroko di mi Tata gi mi fu du, sobun, den wroko di mi e du, e sori taki a Tata seni mi kon. 37 Boiti dati, srefi a Tata di seni mi kon e taki fu mi. Noiti unu yere en sten èn noiti unu si en. 38 A wortu fu en no e tan na ini unu, bika unu no e bribi a sma di a seni kon.
39 Unu e ondrosuku Gado Buku, bika unu e denki taki na dati o gi unu têgo libi. Gado Buku srefi e taki fu mi, 40 ma toku unu no wani kon na mi fu kisi libi. 41 Mi no wani a glori fu libisma. 42 Ma unu no de so. Mi sabi heri bun taki unu no lobi Gado. 43 Mi kon na ini a nen fu mi Tata, ma unu no bribi mi. Efu wan tra sma ben o kon na ini en eigi nen, dan unu ben o bribi a sma dati. 44 Unu e gi sma glori èn unu wani taki den musu gi unu glori tu, ma unu no wani a glori di e kon fu a wan-enkri Gado. Sobun, fa unu kan bribi mi dan? 45 No denki taki mi o tyari unu go krutu na a Tata. Ma den sani di Moses skrifi èn di unu e howpu na tapu, na dati o krutu unu. 46 We, efu unu ben bribi Moses trutru, dan unu ben o bribi mi, bika na en skrifi fu mi. 47 Ma efu unu no e bribi den sani di a skrifi, dan fa unu o bribi den sani di mi e taki?”