Tori fu den apostel

13 Na ini a gemeente na Antiokia yu ben abi profeiti nanga leriman. Den man disi ben de: Saulus, Barnabas, Simeon di sma ben sabi tu leki Niger, Lusiyus fu Sireine, nanga Manayen di ben kisi leri makandra nanga a tiriman Herodes. 2 Den ben e faste* èn den ben e du a wroko di Yehovah* ben gi den. Ne a santa yeye taigi den: „Mi teki Barnabas nanga Saulus fu du wan wroko gi mi, sobun meki den du a wroko dati.” 3 Baka dati, den brada faste* èn den begi. Dan den poti den anu na tapu Barnabas nanga Saulus èn den seni den gwe.

4 Na so a santa yeye seni den man disi fu du a wroko di den kisi. Den go na Selesia èn di den doro drape, den teki wan sipi go na Siprus. 5 Di den doro na Salamis, dan den bigin preiki a wortu fu Gado na ini den snoga fu den Dyu. Yohanes* ben de nanga den tu fu yepi den.

6 Den preiki na tapu a heri èilanti teleki den doro Pafos. Drape den miti wan man di ben de wan bonuman èn wan falsi profeiti. A man disi ben de wan Dyu èn a ben nen Bar-Yesus. 7 A ben wroko gi Granman* Sergiyus Paulus di ben de wan koni man. Sergiyus Paulus ben kari Barnabas nanga Saulus kon na en, fu di a ben e angri fu yere a wortu fu Gado. 8 Ma a bonuman disi di den e kari Elimas tu (Elimas wani taki bonuman), bigin gens den fu di a no ben wani meki a granman bribi na ini Masra. 9 Ne santa yeye kon na tapu Saulus di sma sabi tu leki Paulus. A luku a bonuman langalanga na ini en fesi, 10 dan a taigi en: „Yu bedrigiman yu, ala sortu ogri yu e du. Yu na wan manpkin fu Didibri èn wan feanti fu ala san bun. O ten yu o kba drai den reti pasi fu Yehovah?* 11 Yehovah* o strafu yu èn yu o kon breni. Yu no o si a leti fu a son fu wan pisi ten.” Wantronso en ai kon dungru èn ala sani kon blaka. Fu dati ede a ben e firfiri e suku sma fu hori en na en anu, so taki den ben kan sori en a pasi. 12 Di a granman si san psa, a bigin bribi na ini Masra. A ben ferwondru fu den sani di a ben leri fu Yehovah.*

13 Baka dati Paulus nanga den man di ben de nanga en teki wan sipi fu kmopo na Pafos èn den doro na Perga na ini Pamfilia. Ma Yohanes gwe libi den èn a drai go baka na Yerusalem. 14 Den trawan gwe libi Perga èn den doro na Antiokia na ini Pisidia. Ne den go na ini a snoga na tapu Sabat-dei èn den go sdon na wan presi. 15 Baka di den leisi a Wet nanga den buku fu den Profeiti gi den sma di ben de drape, dan den fesiman fu a snoga seni wan sma fu go taigi den: „Brada, efu wan sani de di unu wani taigi a pipel fu gi den dek’ati, dan unu kan taki.” 16 Fu dati ede Paulus opo, a meki wan sani nanga en anu fu meki den sma arki en èn a taki:

„Un Israelsma nanga den tra sma di abi lespeki gi Gado, un arki mi. 17 A Gado fu a pipel fu Israel teki den afo fu wi èn a meki den tron wan bigi pipel di den ben e libi na ini wan tra kondre, Egepte. Nanga bigi krakti* a tyari den kmoto na ini a kondre dati. 18 Sowan 40 yari a ferdrage den na ini a sabana. 19 Baka di a kiri seibi difrenti pipel na ini a kondre Kanan, dan a gi den afo fu wi a kondre dati. 20 Ala den sani dati psa na ini wan pisi ten fu 450 yari.

Baka dati Gado poti krutuman fu tiri a pipel teleki a ten fu a profeiti Samuel. 21 Ma bakaten den ben wani wan kownu. Gado gi den Saul, a manpkin fu Kes, wan man fu a lo fu Benyamin. A ben de kownu 40 yari langa. 22 Di Gado puru en, dan a poti David leki kownu gi den èn a ben taki fu en: ’Mi feni David, a manpkin fu Isai. A de wan man di mi lobi èn a o du ala san mi wani.’ 23 Soleki fa Gado ben pramisi, a meki Yesus, wan bakapkin fu David, tron wan ferlusuman gi Israel. 24 Fosi a man disi kon, Yohanes ben ferteri ala sma fu Israel taki den ben musu dopu fu sori taki den ben abi berow. 25 Ma di Yohanes ben o kba a wroko di a ben kisi fu du, a taki: ’Unu denki taki mi na a Krestes? A no mi. Ma a o kon baka mi èn mi no warti fu puru en susu na en futu.’

26 Brada, unu di de bakapkin fu Abraham, nanga den tra sma na un mindri di e lespeki Gado, wi kon yere fa Gado o ferlusu wi. 27 Den sma fu Yerusalem nanga den fesiman fu den no ben si en leki a Krestes. Ma di den krutu en, den meki den sani di sma e leisi ibri Sabat-dei na ini den buku fu den Profeiti, kon tru. 28 Den no ben feni noti na en tapu fu meki a kisi dedestrafu. Ma tòg den taigi Pilatus fu kiri en. 29 Di den du ala den sani kba di ben skrifi fu en, dan den puru en fu a postu* èn den poti en na ini wan grebi. 30 Ma Gado gi en wan opobaka. 31 Furu dei langa a ben e sori ensrefi na den disipel fu en di ben waka nanga en fu Galilea go na Yerusalem. Now den disipel disi e ferteri a pipel fu Yesus.

32 Fu dati ede wi e ferteri unu a bun nyunsu fu a sani di Gado ben pramisi den afo fu wi. 33 Na wi leki pkin fu den si fa Gado du ala san a pramisi. A gi Yesus wan opobaka, soleki fa a skrifi na ini a di fu tu psalm: ’Yu na mi manpkin. Tide mi tron yu papa.’ 34 Gado gi en wan opobaka èn a gi en wan skin di no man pori. Fu a tori disi a ben taki: ’Mi o sori unu a srefi lobi* di mi pramisi David. Ala ten mi e du san mi pramisi.’ 35 Dati meki wan tra psalm e taki tu: ’Yu no o meki a skin fu a sma di e tai hori na yu, kon pori.’ 36 Di David ben de na libi a ben du san Gado wani.* Bakaten a dede,* den beri en pe den afo fu en ben beri èn en skin pori gwe. 37 Ma a skin fu a sma di Gado gi wan opobaka no pori gwe.

38 Fu dati ede brada, un musu sabi taki a sma disi kan meki taki unu kisi pardon fu sondu. 39 Fu di Yesus dede, meki Gado e si ala sma di e bribi na ini Yesus, leki ret’ati sma. A wet di Gado gi Moses no ben man du dati. 40 Fu dati ede, luku bun taki den sani di skrifi na ini den buku fu den Profeiti no psa nanga unu. Drape skrifi: 41 ’Un spotuman, luku san mi e du na ini a ten fu unu. Mi e du wan sani di unu no o bribi noiti, awinsi wan sma ferteri unu dati finfini. Unu o ferwondru èn unu o dede.’”

42 Di Paulus nanga Barnabas go na dorosei, dan den sma begi den fu ferteri den moro fu den tori disi tapu a tra Sabat-dei. 43 Sobun, baka a konmakandra di ben hori na ini a snoga, furu fu den Dyu nanga den sma di ben drai den libi fu tron anbegiman fu Gado bigin waka baka Paulus nanga Barnabas. Ne den taki nanga den sma èn den gi den dek’ati fu tan du muiti fu meki Gado lobi den.*

44 A tra Sabat-dei, bijna ala sma na ini a foto kon makandra fu arki a wortu fu Yehovah.* 45 Di sonwan fu den Dyu si a bigi grupu sma, den kon dyarusu. Ne den bigin ferteri sma taki Paulus e lei èn na so den ben sori taki den no abi lespeki gi Gado. 46 Sondro fu frede, Paulus nanga Barnabas taigi den: „Na unu ben musu yere a wortu fu Gado fosi. Ma fu di unu no wani bribi èn fu di unu e sori taki unu no fiti fu kisi têgo libi, meki wi e go na den tra pipel. 47 Yehovah* taigi wi krinkrin: ’Mi poti yu leki wan leti gi den pipel, so taki yu kan ferteri sma te na den moro farawe presi fu grontapu fa mi o tyari ferlusu kon.’”

48 Di den tra pipel yere disi, den bigin prisiri èn den gi a wortu fu Yehovah* glori. Ne ala den sma di ben abi a yoisti denki fu man kisi têgo libi, tron bribiman. 49 Boiti dati, den preiki a wortu fu Yehovah* na ala sei fu a kondre. 50 Ma den Dyu go na den heihei uma di ben e anbegi Gado èn na den bigiman fu a foto, dan den ferteri den ala sortu ogri fu Paulus nanga Barnabas. Den ben wani du ogri nanga Paulus nanga Barnabas èn den yagi den kmoto fu drape. 51 Ne Paulus nanga Barnabas naki a doti puru fu den futu,* dan den go na Ikoniyum. 52 Ma den disipel ben e go doro nanga prisiri èn a santa yeye ben de na den tapu.