Wan Openbaring gi Yohanes

21 Dan mi si wan nyun hemel nanga wan nyun grontapu, bika a fosi hemel nanga a fosi grontapu ben psa gwe èn a se no de moro. 2 Mi si a santa foto tu, a Nyun Yerusalem. A ben saka kmopo fu Gado na ini hemel. A ben weri leki wan trowmisi di ben meki ensrefi moi gi a man di ben o tron en masra. 3 Ne mi yere wan tranga sten kmoto fu a kownusturu. A taki: „Luku, a tenti fu Gado de na libisma. Gado o tan nanga den èn den o de en pipel. Gado srefi o de nanga den. 4 A o figi ala watra puru na den ai èn dede no o de moro. Nowan sari, nowan krei èn nowan pen no o de moro. Den sani fu fosi no o psa moro.”

5 Ne a sma di ben e sdon na tapu a kownusturu taki: „Luku, mi e meki ala sani kon nyun.” A taki tu: „Skrifi den sani disi, bika den wortu disi tru èn sma kan bribi den.” 6 Dan a taigi mi: „Den sani disi psa kba! Mi na a Alfa nanga na Omega,* a bigin nanga a kba. Te watra e kiri wan sma, dan mi o gi en watra fu a peti* di abi watra di e gi libi. A no abi fu pai gi dati.* 7 Ibri sma di wini a strei o kisi den sani disi. Mi o de a Gado fu en èn a o de mi manpkin. 8 Ma den fredeman, den sma di no e bribi, den sma di no krin èn di e du morsu sani, den kiriman, den huruman,* den sma di e du afkodrei, den sma di e anbegi falsi gado nanga ala den leiman o dede na ini a se di e bron nanga faya èn nanga swarfu.* Disi na a di fu tu dede.”*

9 Ne wan fu den seibi engel di ben abi den seibi komki di ben furu nanga den seibi lasti rampu, kon taigi mi: „Kon, dan mi o sori yu a trowmisi, a frow fu a Pkin Skapu.” 10 Nanga a krakti fu a santa yeye, a tyari mi go na wan bigi bergi di ben hei srefsrefi èn a sori mi a santa foto Yerusalem di ben saka kmoto fu Gado na ini hemel. 11 A foto ben abi a glori fu Gado. A ben e brenki leki wan diriston di abi furu waarde, leki wan yaspis-ston* di krin leki grasi.* 12 A foto ben abi wan bigi skotu di ben hei srefsrefi èn a ben abi 12 portu. Twarfu engel ben de na den portu èn den nen fu den 12 lo fu den manpkin fu Israel ben skrifi na tapu den portu. 13 Yu ben abi dri portu na owstusei, dri portu na noordsei, dri portu na zuidsei èn dri portu na west-sei. 14 A skotu fu a foto ben abi 12 ston leki fundament. Den 12 nen fu den 12 apostel fu a Pkin Skapu ben skrifi na tapu den ston.

15 A sma di ben e taki nanga mi ben abi wan gowtu markitiki na ini en anu. Nanga dati a ben kan marki a foto, den portu nanga a skotu fu a foto. 16 A foto fokanti. A langa èn a bradi a srefi. Di a sma marki a foto nanga a tiki, a ben de sowan 2200 kilometer.* A langa, a bradi èn a hei a srefi. 17 A marki a skotu fu a foto tu. A ben de sowan 64 meter.* A marki en na a srefi fasi fa libisma e marki sani èn na so den engel e marki sani tu. 18 A skotu fu a foto ben meki fu yaspis-ston* èn a foto ben meki fu soifri gowtu di ben krin leki grasi. 19 Den fundament fu a skotu fu a foto ben moi. Den ben meki nanga ala sortu diriston: A fosi fundament ben meki fu yaspis-ston,* a di fu tu ben meki fu safir-ston,* a di fu dri ben meki fu kalsedon-ston,* a di fu fo ben meki fu smaragd-ston,* 20 a di fu feifi ben meki fu sardoniks-ston,* a di fu siksi ben meki fu sardiyus-ston,* a di fu seibi ben meki fu krisolit-ston,* a di fu aiti ben meki fu beril-ston,* a di fu neigi ben meki fu topas-ston,* a di fu tin ben meki fu krisopras-ston,* a di fu erfu ben meki fu hiasent-ston* èn a di fu twarfu ben meki fu ametis-ston.* 21 Boiti dati, den 12 portu ben de 12 parel.* Ibriwan fu den portu ben meki nanga wán parel. A bradi strati fu a foto ben meki fu soifri gowtu èn a ben de leki grasi pe yu kan luku psa na ini.

22 Mi no si wan tempel na ini a foto, bika Yehovah* Gado na Almaktiwan nanga a Pkin Skapu na a tempel fu a foto. 23 A son noso a mun no ben abi fu skèin leti na tapu a foto, bika a glori fu Gado ben de a leti di ben e skèin na en tapu èn a Pkin Skapu ben de a lampu fu a foto. 24 Den pipel o waka na ini a leti fu a foto èn den kownu fu grontapu o tyari a glori fu den go na ini a foto. 25 Den portu fu a foto o tan opo heri dei, fu di neti no o de drape. 26 Den o tyari a glori nanga a grani fu den pipel go na ini a foto. 27 Ma nowan sani di no krin èn nowan sma di e du morsu sani noso di e lei o go na ini a foto. Den wan-enkri sma di o go na ini a foto, na den wan di nen skrifi na ini a buku fu libi di de fu a Pkin Skapu.