Gi den Galasiasma
3 Un Galasiasma, unu no e gebroiki un frustan! Suma kori unu so? Bika unu ben yere finifini kaba fa sma spikri Yesus Krestes na wan postu. 2 Disi wawan mi wani sabi fu unu: San meki unu kisi a yeye? Na fu di unu du san a Wèt e taki, noso na fu di unu bribi san unu yere? 3 Na frustan unu no abi so? Na a bigin unu ben meki a santa yeye tiri unu, ma fa a gersi leki unu e meki grontapu sani tiri unu now na a kaba? 4 Na fu soso unu ben pina so furu? Mi no denki taki a ben de fu soso. 5 Sobun, fu san ede a sma di meki unu kisi santa yeye èn di du bigi wondru na un mindri, du den sani dati? Na fu di unu e du san a Wèt e taki, noso na fu di unu e bribi san unu yere? 6 Na so a ben de tu nanga Abraham. „Fu di Abraham ben poti bribi na ini Yehovah, meki a si Abraham leki wan reti-ati sma.”
7 Un musu fu sabi taki den sma di abi bribi, na manpikin fu Abraham. 8 Gado Buku ben taki na fesi kaba taki Gado ben o si trakondre sma leki reti-ati sma tu te den abi bribi. Dati meki a fruteri Abraham a bun nyunsu disi na fesi. A taki: „Na yu o meki taki ala den pipel man kisi blesi.” 9 Fu dati ede den sma di abi bribi e kisi blesi tu, neleki Abraham di ben abi bribi.*
10 Fluku de na tapu ala den sma di e frutrow tapu a Wèt, bika Gado Buku taki: „Fluku musu kon tapu a sma di no e du ala sani di skrifi na ini a bukulolo fu a Wèt èn di no e gi yesi na den.” 11 Boiti dati, a de krin taki a no a Wèt e meki taki Gado e si wan sma leki reti-ati sma, bika Gado Buku taki: „A reti-ati sma o tan libi fu di a abi bribi.” 12 A Wèt no e sori taki wan sma musu abi bribi. Na presi fu dati a e taki: „A sma di e du san den wèt e taki, sa tan na libi.” 13 Krestes bai wi, so taki a fluku fu a Wèt komoto na wi tapu. Dan ensrefi tron wan fluku na presi fu wi, bika Gado Buku taki: „Fluku de na tapu a sma di anga na wan postu.” 14 Disi ben pasa fu meki den pipel kisi a blesi fu Abraham nanga yepi fu Yesus Krestes. Na so wi kan kisi a yeye di Gado pramisi wi te wi abi bribi.
15 Brada, meki mi gi unu wan aladei eksempre: Te wan frubontu meki kaba, awinsi na wan frubontu fu libisma, dan nowan sma kan taki dati a no e teri, èn nowan sma man poti moro sani na a frubontu dati. 16 We, Gado ben pramisi Abraham nanga en bakapikin wan tu sani. Gado Buku no taki: „Gi den bakapikin”, leki a ben taki fu furu bakapikin, ma a ben taki fu wán sma nomo: „Gi yu bakapikin”, èn dati na Krestes. 17 Boiti dati, mi e taki disi: A Wèt ben kon fo hondro nanga dritenti yari baka a frubontu di Gado ben meki fosi. Ma disi no wani taki dati a frubontu dati no e teri moro. Sobun, Gado o du ete san a pramisi. 18 Bika efu a Wèt meki taki wi o kisi a gudu di Gado e gi, dan wi no o kisi a gudu moro fu di wan pramisi meki. Toku na fu wan pramisi ede meki Gado gi Abraham a gudu disi nanga en heri ati.
19 We, fu san ede a Wèt ben musu de dan? Gado ben poti a Wèt fu tyari sondu kon na krin, teleki a bakapikin doro di ben o kisi san Gado pramisi. Gado ben seni engel fu gi wan mindriman a Wèt, so taki a ben kan gi dati na a pipel. 20 We, so wan mindriman no de fanowdu te wán sma nomo meki wan pramisi na ini wan frubontu. Na Gado wawan ben meki wan pramisi na ini a frubontu disi. 21 Ma disi wani taki dati a Wèt no e kruderi nanga den pramisi fu Gado? Kwetikweti! Bika efu wi ben kisi wan wèt di man gi libi, dan na wan wèt ben o meki wi tron reti-ati sma. 22 Ma Gado Buku meki ala sma de strafuman fu sondu, so taki den sma di e bribi na ini Yesus Krestes, kan kisi san Gado pramisi fu di den abi bribi.
23 Ma fosi a tru bribi doro, a Wèt ben poti wi na strafu èn a ben e hori ai na wi tapu, aladi wi ben e wakti fu a bribi kon na krin. 24 Na so a Wèt tyari wi go na Krestes aladi a ben e hori ai na wi tapu.* A sani disi meki taki Gado e si wi leki reti-ati sma fu di wi abi bribi. 25 Ma now di a tru bribi doro, wi no abi a Wèt fanowdu moro fu hori ai na wi tapu.
26 Fu taki en leti, un alamala na manpikin fu Gado fu di unu e bribi na ini Krestes Yesus. 27 Bika un alamala di dopu èn di de wán nanga Krestes, ben teki den fasi fu Krestes. 28 A no abi trobi efu yu na wan Dyu noso wan Grikisma, wan srafu noso wan fri man, wan mansma noso wan umasma, un alamala de wán nanga makandra èn nanga Krestes Yesus. 29 Boiti dati, efu unu na fu Krestes, unu na trutru bakapikin fu Abraham èn sma di sa kisi a gudu di Gado pramisi.