Sakaria

4 Baka dati na engel di ben e taki nanga mi, kon baka, dan a wiki mi neleki fa wan sma e wiki wan trawan di e sribi. 2 Na engel aksi mi: „San yu e si?”

Mi piki en: „Mi e si wan kandratiki di meki fu gowtu. Wan komki de na tapsei fu en. A kandratiki abi seibi lampu. Iya, seibi lampu de. Den lampu di de na tapu a kandratiki abi seibi peipi. 3 Tu olèifbon de na sei a kandratiki, wán na a ret’anusei fu a komki èn wán na a kruktu-anusei fu a komki.”

4 Ne mi aksi na engel di ben e taki nanga mi: „Masra, san den sani disi wani taki?” 5 Na engel di ben e taki nanga mi, aksi mi: „Yu no sabi san den sani disi wani taki?”

Mi piki: „No, mi masra.”

6 Dan a taigi mi: „Disi na san Yehovah taigi Serubabel: ’„A no wan legre noso wan libisma* o du den sani disi, ma na mi yeye o meki ala den sani disi psa”, na so Yehovah di e tiri den legre taki. 7 Awinsi wan bigi bergi de na fesi Serubabel, tòg a o kon de leki wan plata kontren. Te a o tyari a moro hei ukuston kon, dan sma o bari: „Luku fa a moi! Luku fa a moi!”’”

8 Dan Yehovah taigi mi: 9 „Na den anu fu Serubabel poti a fundament fu a tempel disi èn na en anu o kba bow en. Dan unu o sabi taki na Yehovah di e tiri den legre seni mi kon na unu. 10 Suma ben wiswasi unu di unu bigin du pkinpkin wroko fu bow a tempel? Sma o prisiri te den si taki Serubabel abi a loto* na ini en anu fu marki sani. Srefi den seibi ai o si dati. Den seibi ai disi na den ai fu Yehovah. Den e si ala sani na heri grontapu.”

11 Dan mi aksi: „San na den tu olèifbon di de na a ret’anusei nanga a kruktu-anusei fu a kandratiki?” 12 Mi aksi tu: „San na den taki* fu den tu olèifbon di abi tu gowtu peipi di e meki gowtu oli lon go na a komki?”

13 Dan a aksi mi: „Yu no sabi san den sani disi wani taki?”

Mi piki en: „No, mi masra.”

14 Ne a taki: „Disi na den tu salfuwan di e tnapu na sei a Masra fu heri grontapu.”