Gi den Romesma
4 Fu di dati de so, dan san wi sa taki fu wi afo Abraham? 2 Fu eksempre, efu den sani di Abraham du ben o meki taki Gado si en leki wan reti-ati sma, dan Abraham ben o man meki bigi. Ma a no ben o man du dati na fesi Gado. 3 Bika san Gado Buku e taki? „Abraham ben poti bribi na ini Yehovah. Fu dati ede Gado si en leki wan reti-ati sma.” 4 We, wan sma di e wroko e kisi pai. A no bun-ati meki sma e pai en, ma na fu di a wroko fu en. 5 Efu wan sma no e frutrow na tapu den sani di a e du ma a e bribi na ini Gado, dan a bribi fu en o meki taki Gado si en leki wan reti-ati sma, fu di Gado na a sma di e taki sortu sondari a e si leki reti-ati sma. 6 David srefi ben taki dati a no den sani di wan sma du e meki taki a de koloku, ma na te Gado e si en leki wan reti-ati sma. A ben taki: 7 „Koloku fu den sma di kisi pardon fu den kruktudu fu den èn koloku fu den sma di Gado tapu den sondu fu den. 8 Koloku fu a sma di Yehovah no e prakseri den sondu fu en moro.”
9 We, a de so dan taki a koloku disi na soso gi den sma di besnèi, noso a de tu gi den sma di no besnèi? Bika wi e taki: „Fu di Abraham ben abi bribi, meki Gado si en leki wan reti-ati sma.” 10 Ma o ten Gado ben si en so? Na baka di Abraham ben besnèi, noso di a no ben besnèi ete? We, a no di a ben besnèi kaba Gado si en so, ma na di a no ben besnèi ete. 11 Gado taigi en taki a ben musu besnèi. Disi ben o de wan marki noso wan stampu di sori taki Abraham ben de wan reti-ati sma, fu di a ben abi bribi aladi a no ben besnèi ete. Dati meki a tron tata fu ala sma di e bribi aladi den no besnèi èn disi meki taki Gado si den leki reti-ati sma. 12 Na so Abraham tron tata fu pikin di besnèi. Dati na den sma di besnèi èn den sma di abi a srefi bribi di wi tata Abraham ben abi aladi a no ben besnèi.
13 Bika a no fu a Wèt ede meki Gado pramisi Abraham taki en nanga den pikin fu en ben o kisi wan grontapu leki gudu. Ma fu di a ben bribi meki Gado si en leki wan reti-ati sma èn dati meki a kisi san Gado pramisi. 14 Bika efu den sma di e gi yesi na a Wèt, na sma di o kisi a gudu, dan a no ben o de fanowdu moro fu abi bribi èn a pramisi no ben o teri moro. 15 Te yu luku en bun, dan a Wèt e meki taki Gado ati bron nanga sma. Ma efu wèt no de, dan sma no man pasa en tu.
16 Na a bribi fu Abraham meki taki Gado meki wan pramisi fu di Gado abi bun-ati. Dati meki a de seiker taki den pikin fu en o kisi san Gado pramisi. A no soso den wan di e hori a Wèt o kisi a pramisi disi, ma sosrefi den wan di abi a srefi sortu bribi leki Abraham, a tata fu wi alamala. 17 (Disi de soifri soleki fa Gado Buku taki: „Mi meki yu tron tata fu furu pipel.”) A sani disi pasa na fesi Gado, a sma di Abraham ben bribi na ini. En na a wan di e meki den dede sma kon na libi èn di e taki fu sani di no de, leki den na sani di de trutru. 18 Abraham ben bribi èn a ben abi a howpu taki a ben o tron a tata fu furu pipel, aladi a ben gersi leki dati no ben o man. Ma a ben bribi disi, fu di Gado ben taki: „Na someni bakapikin yu o kisi.” 19 A no ben lasi bribi, aladi a ben sabi taki en skin no ben abi krakti moro fu di a ben abi pikinmoro wán hondro yari kaba, èn a ben sabi taki Sara no ben man kisi pikin moro. 20 Ma fu di Gado ben pramisi en, meki a no ben lasi bribi. A bribi fu en meki a kisi krakti èn a ben gi Gado glori. 21 A ben de seiker taki Gado man du san a pramisi. 22 Fu dati ede ’Gado ben si en leki wan reti-ati sma’.
23 Den wortu ’Gado ben si en leki wan reti-ati sma’, no skrifi gi en wawan, 24 ma sosrefi gi wi di Gado e si tu leki reti-ati sma, fu di wi e bribi na ini a sma di gi Yesus, wi Masra, wan opobaka. 25 Yesus ben musu dede gi den sondu fu wi èn a kisi wan opobaka, so taki Gado kan si wi leki reti-ati sma.