Yosua

13 Yosua ben owru èn a ben kon grani kaba. Ne Yehovah taigi en: „Luku, yu owru èn yu grani kaba. Wan bigi pisi fu a kondre de ete di un musu teki abra. 2 Disi na den kontren di tan abra: ala den presi pe den Filisteasma nanga den Geisursma e libi, 3 (Dati na a kontren di e bigin na a kriki fu Nijl-liba na owstusei fu Egepte èn di e doro te na Ekron na noordsei. Fositen, sma ben e si a kontren disi leki wan pisi fu a kondre fu den Kanansma.) èn a kontren fu den feifi Filistea kownu di ben e wroko makandra. Dati na a kontren fu den Gasasma, den Asdodsma, den Askelonsma, den Gatsma, nanga den Ekronsma. Den Afietsma e libi na ini a kontren dati tu. 4 Na zuidsei yu abi a heri kondre fu den Kanansma ete, nanga Meyara fu den Sidonsma, nanga a heri kontren te na Afek di de pe a kontren fu den Amorietsma e bigin. 5 Yu abi sosrefi a kondre fu den Geibalsma, nanga a heri kontren fu Libanon na a sei pe son e opo. A kontren disi e waka fu Bâal-Gad di de na a futu fu Hermon-bergi, te na a kontren fu Hamat. 6 Boiti dati, yu abi ala den Sidonsma di e libi na a bergikontren na mindri Libanon nanga Misrefot-Mayim. Misrefi o puru a kondre na den anu fu gi dati na den Israelsma. Ma yu musu prati a kondre gi den Israelsma, soleki fa mi ben taigi yu fu du. 7 Sobun, prati a kondre disi gi neigi fu den lo èn gi na afu lo fu Manase, so taki den kan go tan drape.”

8 A tra pisi fu a lo fu Manase, makandra nanga a lo fu Ruben èn a lo fu Gad, teki a pisi fu a kondre di Moses, a futuboi fu Yehovah, ben gi den na owstusei fu Yordan-liba. 9 Sobun, den kisi a pisi fu a kondre di e bigin na a foto Arower. A foto disi ben de na a syoro fu Arnon-liba di e pasa na ini wan lagipresi. A kontren fu den ben doro te na a foto di de na mindrisei fu a lagipresi dati. Den kisi a heri plata pisi fu a bergi na Medeba, te na Dibon. 10 Moses gi den lo disi ala den foto fu Sihon, di ben e tiri na ini Hesbon leki kownu fu den Amorietsma. A gi den sosrefi a heri kontren te na a kondre fu den Amonsma. 11 A gi den Gilead, nanga a heri kontren fu den Geisursma nanga den Makatsma. A gi den a heri Hermon-bergi sosrefi, nanga heri Basan te na Salka. 12 A gi den a heri kontren tu di Kownu Ok fu Basan ben e tiri. Ok ben de a lastiwan fu den Rafasma èn den foto pe a ben e tiri ben de Astarot nanga Edrei. Nanga den sma disi Moses ben go feti èn a puru a kondre na den anu. 13 Ma den Israelsma no puru a kondre fu den Geisursma nanga den Makatsma na den anu. Te na a dei fu tide den sma fu Geisur nanga Makat e libi na mindri den Israelsma.

14 A wan-enkri lo di no ben kisi noti, ben de a lo fu den Leifisma. Soleki fa Yehovah, a Gado fu Israel, ben pramisi den, dan den ben o kisi wan pisi fu den ofrandi di sma ben o tyari go bron gi Gado.

15 Moses gi ibriwan fu den famiri na ini a lo fu den manpikin fu Ruben wan pisi fu a kondre. 16 Den kisi a kontren fu Arower di de na a syoro fu Arnon-liba di e pasa na ini wan lagipresi. Den kisi a foto tu di de na mindrisei fu a lagipresi dati, nanga a heri plata pisi fu a bergi na Medeba. 17 Den kisi Hesbon tu nanga ala den dorpu di de lontu a foto dati èn di de na tapu a plata pisi fu a bergi. Sobun, den kisi Dibon, Bamot-Bâal, Bet-Bâal-Meon, 18 Yahas, Kedemot, Mefat, 19 Kiriatayim, Sibma, nanga Seret-Hasahar di de na tapu a bergi na a lagipresi. 20 Den kisi Bet-Peor, nanga a kontren di de na a futu fu Pisga-bergi. Den kisi Bet-Yesimot tu. 21 Sobun, den kisi ala den foto di de na tapu a plata pisi fu a bergi, nanga a heri kownukondre fu Kownu Sihon di ben e tiri den Amorietsma. A ben e tiri na ini a foto Hesbon. Moses ben go feti nanga a kownu disi èn nanga den edeman fu a kondre Midian. A go feti nanga Efi, Reikem, Sur, Hur, nanga Reba. Den man disi ben de den granman fu Kownu Sihon èn den ben e libi na ini a kondre tu. 22 Bileam, a manpikin fu a lukuman Beor, ben de wan fu den sma di den Israelsma kiri nanga feti-owru, neleki fa den kiri den tra sma tu. 23 A kontren fu a lo fu Ruben ben doro te na Yordan-liba. Den famiri na ini a lo fu Ruben kisi a heri kontren disi, nanga ala den foto nanga den dorpu krosibei fu den foto disi.

24 Boiti dati, Moses gi a lo fu Gad, sobun den famiri fu den Gadsma, wan pisi fu a kondre. 25 Den ben kisi Yaeser, ala den foto fu Gilead, nanga afu fu a kondre fu den Amonsma, te na Arower di de na owstusei fu Raba. 26 Boiti dati, den kisi a heri kontren na mindri den foto Hesbon, Ramat-Mispe nanga Betonim. Den kisi a kontren fu Mahanayim te na Debir sosrefi. 27 Na a lagipresi den kisi Bet-Haram, Bet-Nimra, Sukot, Safon, nanga a tra pisi fu a kownukondre fu Kownu Sihon fu Hesbon. A kontren fu den ben de na a heri owstusei fu Yordan-liba te na a se fu Kineret. 28 Disi na a pisi fu a kondre di den famiri fu den Gadsma ben kisi, makandra nanga ala den foto nanga den dorpu krosibei fu den foto disi.

29 Dan Moses gi na afu lo fu Manase wan pisi fu a kondre. Sobun, a pisi disi ben de fu den famiri na ini na afu lo fu Manase. 30 A kontren fu den ben bigin na Mahanayim èn a ben doro te na Basan. Den kisi heri Basan tu, sosrefi a heri kontren di Kownu Ok fu Basan ben e tiri, nanga ala den dorpu fu Yahir na ini Basan. Ala nanga ala na afu lo fu Manase kisi siksitenti dorpu. 31 Na so den bakapikin fu Makir, a manpikin fu Manase, kisi afu fu a kontren fu Gilead. Sobun, afu fu den famiri fu den bakapikin fu Makir kisi a pisi disi. Den kisi sosrefi Astarot nanga Edrei, den foto di ben de na ini a kontren pe Kownu Ok fu Basan ben e tiri.

32 Na so Moses prati a kontren gi den lo disi di den ben de na ini Moab-lagipresi, na owstusei fu Yordan-liba, na abrasei fu Yerikow.

33 Ma Moses no gi a lo fu den Leifisma nowan pisi fu a kondre. Den kisi a grani fu dini Gado na wan spesrutu fasi, soleki fa Yehovah, a Gado fu den Israelsma, ben pramisi den.