Yesaya

39 Na a ten dati Merodak-Baladan, a kownu fu Babilon di ben de a manpkin fu Baladan, seni wan tu brifi nanga wan kado gi Heskia fu di a ben yere taki Heskia ben siki èn taki a kon betre baka. 2 Heskia ben breiti di den boskopuman fu a kownu kon. Ne a sori den ala sani di ben de na ini na oso pe a ben e kibri den gudu fu en. A sori den a solfru, a gowtu, a balsem-oli nanga den tra diri oli, ala den fetsani èn ala den tra gudu di a ben abi. Iya, Heskia sori den ala den gudu di ben de na ini en oso* èn na ini en heri kownukondre.

3 Baka dati a profeiti Yesaya go na Kownu Heskia èn a aksi en: „San den man disi taki èn fu pe den kmoto?” Heskia piki en: „Den kmoto fu wan fara kondre. Den kmoto fu Babilon.” 4 Yesaya aksi en: „San den si na ini yu oso?”* Heskia piki en: „Den si ala sani di de na ini mi oso.* Nowan gudu no de di mi no sori den.”

5 Ne Yesaya taigi Heskia: „Yere san Yehovah di e tiri den legre taki: 6 ’Luku, wan ten o kon taki sma o teki ala den sani di de na ini yu oso* èn di den afo fu yu tyari kon na wán te na a dei fu tide. Dan den o tyari ala den sani disi go na Babilon. Noti no o tan abra’, na so Yehovah taki. 7 ’Den o teki wan tu fu yu eigi manpkin tyari gwe. Den o tron heihei man na ini na oso fu a kownu fu Babilon.’”

8 Ne Heskia taigi Yesaya: „A boskopu di Yehovah seni yu fu taigi mi, bun.” A taki tu: „Bika solanga mi de na libi* freide o de èn ala sani o waka bun.”