Yesaya
60 „Uma, opo èn skèin yu leti, bika yu leti kon.
A glori fu Yehovah e skèin na yu tapu.
2 Bika dungru o tapu grontapu
èn bigi dungru o tapu den pipel.
Ma Yehovah o skèin en leti na yu tapu
èn sma o si a glori fu en na yu.
3 Den pipel o go na a leti fu yu
èn den kownu o go na a brenki leti di yu e skèin.
4 Opo yu ede èn luku lontu na ala sei!
Den alamala kon makandra. Den e kon na yu.
Den manpkin fu yu e kon fu farawe.
Sma e tyari den umapkin fu yu na den seibere.
5 Na a ten dati yu o si èn yu o brenki.
Yu ati o dyompo fu prisiri èn yu o breiti srefsrefi
fu di den gudu fu a se o kon na yu.
Den gudu fu den pipel o kon na yu.
6 Wan bigi grupu kameili o furu a heri kondre fu yu,
yongu kameili fu Midian nanga Efa.
Ala den sma fu Skeiba o kon tu.
Den o tyari gowtu nanga switismeri kon
èn den o prèise Yehovah na ala sei.
7 Ala den skapu fu Keidar o kon na yu.
Sma o tyari den manskapu fu Nebayot kon na yu tu.*
Den o de na tapu mi altari leki ofrandi di mi feni bun
èn mi o meki mi moi oso kon moro moi.
8 Suma na den sma di e wai kon leki wolku
èn di e frei kon leki doifi na den doifi-oso?
9 Na mi den èilanti o wakti.
Den sipi fu Tarsis o de den foswan di o kon.*
Den o tyari den manpkin fu yu kon fu farawe.
Den o tyari a solfru nanga a gowtu fu den kon tu.
Den manpkin fu yu o gi a nen fu yu Gado Yehovah, a Santawan fu Israel, glori
fu di a o meki yu kon moi.*
10 Trakondre sma o bow den skotu fu yu
èn den kownu fu den o yepi yu.
Bika di mi ati bron nanga yu mi naki yu,
ma na bun-ati fu mi meki mi e sari yu now.
11 Den portu fu yu o tan opo ala ten.
Den no o tapu na deiten noso na neti.
Den pipel o tyari den gudu fu den kon na yu
èn den kownu fu den o de den foswan fu du disi.
12 Iniwan pipel noso kownukondre di no wani yepi yu, o kisi pori.
Iya, den pipel o dede.
13 Ala den moi sani fu Libanon o kon na yu.
Den yaneifer-bon, den es-bon nanga den sipres-bon o kon na yu
fu meki mi santa presi kon moi.
Mi o moi a presi pe mi e poti mi futu.
14 Den manpkin fu den sma di ben e pina yu, o kon boigi gi yu.
Ala sma di no ben abi lespeki gi yu o saka kindi boigi na yu futu.
Den o kari yu Sion,
a foto fu Yehovah, a Santawan fu Israel.
15 Sma ben gwe libi yu, den no ben wani si yu na ai èn nowan sma ben psa na ini yu.
Ma now mi o meki sma prodo nanga yu.
Iya, fu ala ten sma o bari fu prisiri fu yu ede.
16 Den pipel nanga kownu o gi yu ala san yu abi fanowdu
neleki fa wan m’ma e gi en pkin bobimerki.*
Yu o sabi taki mi Yehovah, na yu Ferlusuman
èn taki a Tranga Gado fu Yakob, na a sma di bai yu baka.
17 Na presi fu kopro mi o tyari gowtu kon
èn na presi fu isri mi o tyari solfru kon.
Na presi fu udu mi o tyari kopro kon
èn na presi fu ston mi o tyari isri kon.
Mi o poti freide leki yu edeman
èn retidu leki yu basi.
18 Sma no o yere moro taki trawan e du ogri na ini yu kondre,
noso taki den e pori a kondre.
Den skotu fu yu, yu o kari Ferlusu. Den portu fu yu, yu o kari Prèise.
19 A no a son o gi yu leti na deiten
èn a no a mun o gi yu leti na neti.
Na Yehovah o tron wan leti gi yu di o skèin fu ala ten
èn a Gado fu yu o meki yu kon moi.
20 Noiti a son fu yu o saka
èn noiti a mun fu yu o dungru.
Bika Yehovah o tron wan leti gi yu di o skèin fu ala ten
èn a ten di yu ben row o kon na wan kba.
21 Ala den sma fu yu o de ret’ati sma.
Fu ala ten a kondre o de fu den.
Den na a pransun di mi prani èn den sani di mi meki.
Na so mi o kisi glori.
22 A pkin grupu o tron wan grupu fu dusun
èn a pipel di no ben prenspari o tron wan makti pipel.
Mi, Yehovah, o meki disi psa es’esi te a ten doro.”