Yeremia
15 Yehovah taigi mi: „Awinsi Moses nanga Samuel ben o tnapu na mi fesi, tòg mi no ben o du bun gi a pipel disi. Yagi den puru na mi fesi. Meki den gwe. 2 Efu den taigi yu: ’San o psa nanga wi?’, dan yu musu taigi den: ’Disi na san Yehovah taki:
„Den wan di musu kisi wan takru siki, o kisi wan takru siki!
Den wan di musu dede nanga fet’owru, o dede nanga fet’owru!
Den wan di musu dede fu angri, o dede fu angri!
Den wan di feanti musu tyari gwe, feanti o tyari gwe nanga tranga!”’
3 ’Mi o meki fo rampu* miti den’, na so Yehovah taki. ’Fet’owru o kiri den èn dagu o tyari den gwe. Den fowru na loktu nanga den busmeti na grontapu o kiri den èn den o nyan den. 4 Ala den kownukondre fu grontapu o skreki te den si san mi du nanga den, fu di Kownu Manase, a manpkin fu Heskia di e tiri Yuda, du wan lo ogri na ini Yerusalem.
5 Yerusalem, suma o sori sar’ati gi yu?
Suma o sari yu
èn suma o teki en ten fu aksi fa sani e go nanga yu?’
6 ’Na yu gwe libi mi’, na so Yehovah taki.
’Yu e tan drai baka gi mi.*
Mi o langa mi anu fu puru yu na pasi.
Mi kon weri fu yu. Mi no o sari yu moro.*
7 Mi o wai a pipel disi puru neleki fa sma e wai aleisi na den portu fu a kondre.
Mi o puru den pkin fu den na den anu.
Mi o kiri mi pipel,
fu di den no wani tapu nanga den sani di den e du.
8 Mi o meki furu uma lasi den masra. Den uma disi o furu moro a santi fu a se.
Na mindridei mi o meki wan sma kiri den m’ma nanga den manpkin fu den.
Mi o meki den frede èn den o bruya wantronso.
9 Na uma di kisi seibi pkin kon swaki.
En blo de na tapu.
A son fu en saka, aladi a de deiten ete.
A kisi syen èn en fesi fadon.’
’Mi o meki feanti kon nanga fet’owru
fu kiri den pkinso sma di tan abra’, na so Yehovah taki.”
10 Tye mi m’ma, fu san ede yu ben musu meki mi?
Na ini a heri kondre sma e meki trobi nanga mi èn den e feti nanga mi.
Mi no leni nowan sma wan sani èn mi no go leni sani na nowan sma.
Ma tòg den alamala e kosi mi.
11 Yehovah taki: „Yu kan de seiker taki mi o horbaka gi yu.
Yu kan de seiker taki mi o yepi yu
te yu de na nowtu èn te feanti kon feti nanga yu.
12 Wan sma kan broko isri na pispisi?
A kan broko na isri fu noordsei? A kan broko kopro na pispisi?
13 Mi o meki sma teki ala den gudu nanga tra sani fu unu.
Sondro fu pai den o teki ala den sani fu unu, fu di unu du sondu na ini a heri kondre.
14 Mi o meki den feanti tyari den sani fu unu
go na wan kondre di unu no sabi.
Bika mi ati e bron srefsrefi.
A de leki wan faya di o bron unu.”
15 Yehovah, yu sabi san e psa nanga mi.
Grantangi, no fergiti mi.
Poti prakseri na mi èn strafu den sma di e suku fu du ogri nanga mi.
No wakti moro langa fu puru atibron na den tapu, noso mi o dede.
Na fu yu nen ede sma e gi mi syen.
16 Di mi feni den wortu fu yu, mi nyan den.
Dan mi ati bigin prisiri. Iya, mi e prisiri srefsrefi,
bika mi e tyari a nen fu yu, Yehovah, a Gado di e tiri den legre.
17 Mi no e sdon nanga sma di lobi fesa èn di e meki prisiri nomo.
Fu di yu anu de na mi tapu, meki mi e sdon mi w’wan.
Yu furu mi nanga bigi atibron.*
18 Fu san ede mi abi pen ala ten?
Fu san ede a soro fu mi no man dresi?
A no wani kon betre.
Yu o de leki wan kriki di drei te sma e suku watra?
19 Fu dati ede Yehovah taki:
„Efu yu drai kon baka na mi,
dan mi o teki yu baka èn yu o wroko gi mi.
Efu yu meki muiti fu kon sabi san warti èn san no warti,
dan yu o tron mi takiman.
Den o kon na yu,
ma yu no o go na den.”
20 „Mi meki yu de leki wan tranga kopro skotu gi a pipel disi.
Den o feti nanga yu,
ma den no o man wini yu, bika mi de nanga yu.
Mi o kibri yu èn mi o ferlusu yu”, na so Yehovah taki.
21 „Mi o puru yu na a anu fu den ogriman
èn mi o ferlusu yu fu den ogr’ati sma.”