Preikiman
1 Den sani di e kon now, na san a leriman,* a manpkin fu David, taki. A ben de kownu na Yerusalem.
2 „Na fu soso!”, na so a leriman taki.
„Na fu soso! Iya, ala sani na fu soso!”
3 Sortu wini wan sma e kisi fu ala a tranga wroko di a e du dyaso na grontapu?*
5 A son e opo èn a son e saka.
A e go es’esi na a presi pe a kmoto èn fu drape a o opo kon baka.
6 A winti e wai go na zuidsei èn a e drai go na noordsei.
A e tan wai fu a wan sei, dan a e drai go baka na a tra sei.
A winti e drai lontu nomo.
7 Ala den liba e lon go na se, ma tòg a se no e furu.
Na a presi pe den liba e kmoto, na drape den e drai go baka, so taki den kan lon go baka na se.
8 Ala den sortu sani disi e weri sma.
Den sani furu so te, taki nowan sma kan taki fu den alamala.
San ai e si, no e sari en
èn san yesi e yere, no e sari en tu.
10 Wan sani de di wan sma kan taki fu en: „Luku, disi na wan nyun sani”?
Sensi ten a sani dati ben de kba.
Langa ten fosi wi ben de, a sani dati ben de kba.
11 Nowan sma e memre den sma fu fosten.
Nowan sma o memre den sma di musu kon ete
èn srefi den sma di o kon bakaten o fergiti den wan di ben libi fosi den.
12 Mi, a leriman, ben de kownu fu Israel na Yerusalem. 13 Mi gebroiki ala mi koni fu kon sabi èn fu ondrosuku ala sani di sma du na grontapu. Dati na ala den sani di Gado gi libisma fu du, ma di e tyari brok’ede kon gi den.
14 Mi si ala sani di sma du na grontapu.
We, ala sani di den du na fu soso èn a de leki na winti den e feti fu fanga.
15 A sani di kron, no kan meki kon reti baka.
Wan sani di no de, sma no man teri kwetkweti.
16 Mi ben taki na ini mi ati: „Luku, mi kon kisi furu koni, moro leki iniwan sma di ben de na Yerusalem fosi mi. Mi kon ferstan san na koni nanga sabi.” 17 Nanga mi heri ati mi ben wani kon sabi san na koni, san na law èn san na don. Ne mi kon si tu taki den sani disi de leki winti di sma e feti fu fanga.
18 Bigi koni e meki sma kisi moro span-ede.
Sobun, a sma di e kon sabi moro, e sari moro tu.