Yona
3 Dan Yehovah taki nanga Yona ete wan leisi. A taki: 2 „Opo go na a bigi foto Ninefei èn ferteri den sma san mi taigi yu.”
3 Ne Yona opo go na Ninefei, soleki fa Yehovah taki. Ninefei ben de wan foto di bigi srefsrefi.* A ben bigi so te, taki wan sma ben abi fu waka dri dei fu man doro na a tra sei fu a foto. 4 Sobun, Yona waka go na ini a foto. A waka wan heri dei èn a ben e taigi sma: „Ete 40 dei, dan Ninefei o kisi pori.”
5 Ne den sma fu Ninefei bigin bribi na ini Gado. Dati meki den taki dati ala sma ben musu faste* èn weri rowkrosi.* Ne ala sma, yonguwan nanga owruwan, guduwan nanga pôtiwan, du dati. 6 Di a kownu fu Ninefei yere a boskopu, a opo fu en kownusturu, a puru en kownukrosi, dan a weri rowkrosi* èn a saka sdon na ini asisi. 7 Dan a kownu seni a boskopu disi gi ala sma na ini Ninefei:
„Disi na wan boskopu fu a kownu nanga den heihei man fu en: Nowan sma, nowan meti, nowan kaw èn nowan skapu musu nyan wan sani. Den no musu nyan notnoti. Watra srefi den no musu dringi. 8 Meki den weri rowkrosi.* Iya, ala libisma nanga meti musu abi den krosi disi na den skin. Dan den musu bari kari Gado bun tranga fu gi den pardon. Meki den tapu nanga na ogri fasi fa den e tyari densrefi èn meki den tapu nanga den ogri sani di den e du. 9 Kande a tru Gado o kenki prakseri.* Kande en ati no o bron moro èn a no o kiri wi.”
10 Ne a tru Gado si san den du. A si taki den tapu nanga den ogri di den ben e du. A ben taki dati a ben o figi den puru, ma dan a kenki prakseri* èn a no du dati moro.